“გურია ნიუსისთვის” ორიოდე დღის წინ ცნობილი გახდა, რომ ამავე ცენტრის 35 ექიმმა ცენტრის ხელმძღვანელების სახელზე კოლექტიური განცხადება დაწერა _ ისინი ითხოვდნენ, გაეგოთ, რამდენია მათი ხელფასი და რატომ არ ფორმდება მათთან შრომითი ხელშეკრულება.
ამ საკითხებში გასარკვევად, თბილისიდან, სამედიცინო ცენტრის გენერალური დირექტორი ზაზა ჯაფარიძე ჩამოვიდა და ექიმებს შეხვდა. შეხვედრაზე რამდენიმე ექიმმა დაწვრილებით ისაუბრა იმ პრობლემების შესახებ, რაც ცენტრში ხდება. ჩვენი წყაროს ცნობით, ზაზა ჯაფარიძემ კატეგორიულად აუკრძალა მედპერსონალს პრესასთან კომენტარების გაკეთება, კონკრეტულად კი “გურია ნიუსთან”. წყარო ამტკიცებს, რომ ჯაფარიძეს ექიმებთან შეხვედრაზე საკმაოდ ხმამაღლაც უსაუბრია, რის გამოც, რამდენიმე ექიმს შეხვედრა დაუტოვებია, თუმცა, თავად ჯაფარიძის თხოვნით, ისინი დარბაზში დაბრუნებულან. შეხვედრაზე, ცენტრის უფროსმა, თურმე, ერთ-ერთ ექიმს განუცხადა, _ შენ დანიშვნაზე ნახევარი საქართველო შეწუხდა და ახლა რა პრეტენზიები გაქვსო. ამ ექიმმა კი ჯაფარიძეს დაკონკრეტება მოსთხოვა, თუ ვინ ჩაერია მის დანიშვნასთან დაკავშირებულ საკითხში, მაგრამ ბატონ ჯაფარიძეს აღარ განუვრცია საკუთარი მოსაზრება. აღნიშნული თათბირი, როგორც ყოველთვის, ზღაპარივით დამთავრებულა _ ყველანი დაარწმუნეს, რომ მათ ხელფასები გაეზრდებათ. მიუხედავად ამ დაპირებისა, დაძაბულობა მეორე დღესაც გაგრძელდა _ როგორც წყარო ამბობს, თბილისიდან ბრძანება მოვიდა რვა ექიმის გათავისუფლების შესახებ, მათ შორის არიან ისეთებიც, რომლებიც აქტიურობით არ გამოირჩეოდნენ.
“გურია ნიუსთან” სამედიცინო ცენტრის ერთ-ერთი წამყვანი ექიმი საუბრობს, რომლის სახელს და გვარს ინკოგნიტოდ ვტოვებთ: _ რამდენიმე დღის წინ ჩატარებული შეხვედრა ხელფასებთან დაკავშირებით ჩატარდა. უკმაყოფილებას ყველა არ გამოხატავდა. ზაზა ჯაფარიძე რომ ჩამოვიდა, უკვე ყველაფერი გადაწყვეტილი იყო. მისი წასვლის შემდეგ, მეორე დღესაც გაგრძელდა დაძაბულობა, მაგრამ, მე მგონი, ყველაფერი მოგვარებულია _ ყოველ შემთხვევაში, ჩვენ ასე გვითხრეს. იყო საუბარი რამდენიმე განყოფილებაში ხელფასების შემცირებაზე. ჩვენს განყოფილებას პრეტენზია ნამდვილად არ უნდა ჰქონდეს. შემცირებები რამდენიმე განყოფილებაში იგეგმებოდა და დალაგდა ეს სიტუაცია. უნდა ითქვას, რომ ამ ყველაფერს ცოტა პოლიტიკური ელფერი მისცეს.
_ გავიგეთ, რომ რამდენიმე ექიმს, რომლებსაც სიმპათია აქვთ ოპოზიციური პარტიების მიმართ, ესეც შეახსენეს.
_ ამ საკითხზე ნამდვილად არ ყოფილა საუბარი _ ლაპარაკი იყო მედპერსონალზე და მათ ხელფასებზე. ნებისმიერ სამსახურშია საუბარი ხელფასებზე, თან ეს სამედიცინო ცენტრი კერძო სტრუქტურაა. ადრე ვმუშაობდი სახელმწიფო სტრუქტურაში იქ უფრო მეტი პრეტენზია გვქონდა. აქ ჯერ ყველაფერი დალაგებული არ არის.
_ როგორც ჩვენთვის არის ცნობილი, რამდენიმე ადამიანმა ზაზა ჯაფარიძეს კონკრეტულად მოუთხრეს პრობლემების შესახებ, მისგან კი პასუხად მიიღეს, ვინც უკმაყოფილოები ხართ, შეგიძლიათ განცხადება დაწეროთ განთავისუფლების შესახებო.
_ ეს კერძო სტრუქტურაა და გეტყვის, თუ არ მოგწონს, დამიწერე განცხადებაო. კურტანიძე რომ ჩვენს ჭკუაზე არ ივლის, ეს ხომ გასაგებია?!
_ ადრე ოზურგეთის ცენტრალური საავადმყოფოს თანამშრომელი იყავით, იქ უფრო დიდი ხელფასი გქონდათ თუ აქ გაქვთ?
_ აქ პრობლემა იმიტომ შეიქმნა, რომ დაგვიანგარიშეს ხელფასი, მაგრამ შემდეგ თქვეს, პირველი თვეა, ხარჯი ბევრია და უნდა მომხდარიყო დაქვითვა. მე, პირადად, ხელფასი მომემატა.
სამედიცინო ცენტრის კლინიკურმა დირექტორმა დავით მდინარაძემ “გურია ნიუსთან” სატელეფონო საუბრის დროს თქვა, რომ სამედიცინო ცენტრში ყველაფერი კარგადაა და პრობლემები მოგვარებულია: _ ექიმებს არ ჰქონდათ სწორი ინფორმაცია. როდესაც გაიგეს ყველაფერი, ყველამ გაიტანა განცხადება და დღეს არავის პრეტენზია არ აქვს. ჩვენ განვუმარტეთ, თუ რამდენი ექნებოდათ ხელფასი. მათ თქვეს, რომ არასწორი ინფორმაცია ჰქონდათ და თავისი სიტყვები წაიღეს უკან. ჩვენ მათ ისიც ვუთხარით, რომ ვისაც სურვილი ჰქონდა, შეეძლო დაეწერა განცხადება წასვლასთან დაკავშირებით, მაგრამ არც ამის შესახებ არ არის განცხადება შემოტანილი.
_ როგორც გვითხრეს, ამ შეხვედრის შემდეგ თბილისიდან მოვიდა ბრძანება, რომ რვა ექიმის გაგეთავისუფლებინათ სამსახურიდან.
_ ასეთი რამ ბუნებაში არ არსებობს, თუმცა, შეიძლება რაღაც რეაგირება ყოფილიყო. ახლა მეტს ვერაფერს გეტყვით, რადგან არ ვარ ოზურგეთში. თუმცა, არც ერთი ექიმის განცხადება წასვლასთან დაკავშირებით არ დევს ჩვენს მაგიდაზე.
_ მართალია, რომ ზაზა ჯაფარიძესთან შეხვედრა რამდენიმე ექიმმა პროტესტის ნიშნად დატოვა, როცა მან საუბრის დროს ხმას აუწია?
_ დაახლოებით 60 ადამიანი იჯდა დარბაზში. დარბაზი ხუთი წუთით დატოვა 10 ადამიანმა და ისინი კვლავ შემოვიდნენ თავისი სურვილით. არანაირ ხმამაღალ საუბარს ადგილი არ ჰქონია.
_ თუ საიდუმლო არ არის, იქნებ გვითხრათ, რამდენია მედპერსონალის ხელფასი?
_ მაგალითად, მორიგე მეაგინეკოლოგის ხელფასი მერყეობას 1 000-დან 1600-ლარამდე, მოქმედი ქირურგის ხელფასი 900-1600 ლარამდეა. საუბარი მაქვს იმათ შესახებ, რომლებიც ოპერაციებს აკეთებენ და დატვირთულები არიან. ეს ხელფასები კიდევ მოიმატებს. ერთი თვეც არ არის გასული, რაც დაწესებულებამ სრული დატვირთვით დაიწყო მუშაობა. ერთი თვე რომ გავა, დაითვლება კლინიკის შემოსავალი, კლინიკის გასავალი და თანდათანობით აუცილებლად გაიზრდება შემოსავალი.
_ შემცირებები ხომ არ იგეგმება?
_ ჯერჯერობით, არაფერი არ იგეგმება.
_ ხელშეკრულებების გაფორმების საკითხი მოგვარდა ცენტრში?
_ ყველაფერი გაირკვა და არანაირი პრობლემა არ არის.
_ ბატონო დათო, მართალია თუ არა, რომ იმ შეხვედრაზე ზაზა ჯაფარიძემ მედპერსონალს პრესასთან და კონკრეტულად, “გურია ნიუსთან” კომენტარების გაკეთება აუკრძალა.
_ კონფერენციაზე, რომელსაც მე, როგორც კლინიკური დირექტორი ვატარებდი, მსგავს საკითხზე საუბარი არ ყოფილა.
“გურიის თავისუფალი დემოკრატების” თავმჯდომარე თემურ სალუქვაძე ჩვენთან საუბრის დროს ამბობს, რომ ახალგახსნილ ცენტრში გახნისთანავე იყო პრობლემები:
_ სამი დღის წინ (საუბარი ჩაწერილია 28 იანვარს) ჩვენამდე მოვიდა ინფორმაცია, რომ სამედიცინო ცენტრში საქმე არ იყო კარგად. მე, როგორც საკრებულოს დეპუტატმა, აღნიშნულ დაწესებულებაში გავუშვი პარტიის წევრები, რომ ადგილზე გვენახა, რა ხდებოდა. იქ ყველაფერი გარკვეული არ არის _ საქმე ეხება სახელფასო განაკვეთებს. არ ვაძლევ თავს უფლებას, კლინიკის შიდა სამზარეულოზე ვისაუბრო, მაგრამ რადგან პრობლემა ჩვენს ექიმებს და მათ სოციალურ მდგომარეობას ეხება, ვალდებულები ვართ, სწორ ინფორმაციას ვფლობდეთ და თუ ვხედავთ რაიმე არასწორ ქმედებას, მივუთითოთ კიდეც და გარკვეული ღონისძიებები მივიღო. აქ არაფერ შუაში არ არის პოლიტიკა _ მე ვსაუბრობ, როგორც ოზურგეთის მუნიციპალიტეტის საკრებულოს წევრი.
კლინიკა მოუმზადებელი იყო ფუნქციონირებისთვის და ამიტომ შეიქმნა ეს პრობლემები. არ ვიცი, შემდეგ პროცესები როგორ განვითარდა, მაგრამ მაქვს ინფორმაცია, რომ სიტუაცია გამოსწორებადია. ვნახოთ, როგორ განვითარდება მოვლენები.
