“მიუხედავად იმისა, რომ ფორმულირებები იცვლება, ნებისმიერ პარტიას ან იმ სუბიექტებს, რომლებიც ახორციელებენ უკანონო შემოწირულობებს, ყველას ექნება ვალდებულება, ფინანსები საჯარო გახადონ. სანქციები იქნება საკმაოდ მკაცრი და აკრძალული იქნება ნებისმიერი ფორმით კანონისთვის გვერდის ავლა”, _ ასეთი განცხადება გააკეთა პავლე კუბლაშვილმა არასამთავრობო სექტორთან შეხვედრის დასრულების შემდეგ.
კითხვაზე, დარჩება თუ არა კანონში “დაკავშირებული პირის ცნება”, პავლე კუბლაშვილმა განაცხადა: “დაკავშირებული პირი, როგორც ასეთი, განმარტების სახით არ არის, მაგრამ ბუნებრივია, განმარტებულია, რომ როდესაც პირს აქვს პოლიტიკური მიზანი და გასცემს ხარჯებს ამ მიზნის მისაღწევად, ასევე ის პირები, რომლებიც ცდილობენ კანონის დარღვევას ან გვერდს აუვლიან კანონს, ასეთი პირები მოექცევიან კანონის მოქმედების ქვეშ. ეს გულისხმობს მათი ფინანსების და მათი ხარჯების გამჭვირვალობას.”
ყადაღის დადების პროცედურის გადახედვასთან დაკავშირებით, პავლე კუბლაშვილის კომენტარი ასეთია: “დიახ, გადაიხედება. ამასთან დაკავშირებით არის გარკვეული დაზუსტება, ფორმულირებები, მათ შორის ოქმის შედგენის, ყადაღის დადების და სასამართლოს მიერ ამ საკითხების განხილვის”
ამომრჩევლის მიმართ სისხლის სამართლის პასუხისმგებლობასთან დაკავშირებით, პავლე კუბლაშვილის პოზიცია ასეთია: “ამომრჩევლის მხრიდან მოთხოვნა შეიძლება იყოს გათავისუფლებული სისხლის სამართლის პასუხისმგებლობიდან, მაგრამ სარგებლის, ფულადი თანხის ან ქონების მიღება იმის სანაცვლოდ რომ მან ხმა მისცეს ამა თუ იმ პარტიას, ეს ბუნებრივია მოსყიდვა იქნება. მოსყიდვა და ამომრჩევლის ხმებით ვაჭრობა, დამერწმუნეთ, ყველა ქვეყანაში დასჯადია.
არაა გამორიცხული, ამ პუნქტმა ადმინისტრაციული სახით სასჯელში გადაინაცვლოს. პარასკევს საბოლოო კომუნიკაცია გვექნება ამ საკითხთან დაკავშირებით”.
“გურია ნიუსის” კითხვაზე, იმსჯელებენ თუ არა ჯარიმების შემცირებაზე და ათმაგ ოდენობას ჩამოიყვანენ თუ არა სამმაგზე, კუბლაშვილმა განაცხადა: “ჯერჯერობით, ამაზე საბოლოო შეთანხმება არ გვაქვს, მაგრამ მსჯელობა მიდის. თუმცა, ეს იმას არ ნიშნავს, რომ ვინმესთვის მარტივი იქნება კანონის დარღვევა და ამაზე პასუხისმგებლობა არ მოუწევს”.
