ბრძანება ოზურგეთის მუნიციპალიტეტის წარმომადგენლობით და აღმასრულებელ ორგანოში მოქალაქეთა მიღების მიზნით გასახორციელებელი ღონისძიებების თაობაზე _ ოზურგეთის მუნიციპალიტეტის საკრებულოს თავმჯდომარის ეს #52 ბრძანებულება, პირველ რიგში, ჟურნალისტებს შეეხო.
გუშინ, დილით, ოზურგეთის მუნიციპალიტეტის გამგეობის შენობაში “გურია ნიუსის” ჟურნალისტი ჟანა მეგრელიშვილი დაცვის პოლიციის თანამშრომლებმა არ შეუშვეს. ის პირველი იყო, რომელსაც აცნობეს, რომ შენობაში ვერ შეუშვებდნენ, მის მსგავსად სხვა ჟურნალისტებმაც “იგემეს” ახალი ბრძანებულების გემო. არ არის გამორიცხული, რომ მსგავსი პროცესი კვლავაც გაგრძელდეს. გამართლდება თუ არა ეს პროგნოზი ამას რამდენიმე დღეში გავიგეთ, როდესაც კონტროლის პალატა დაამთავრებს მოსახლეობის დაკითხვას.
ჩვენ იმავე დღეს მივმართეთ ოზურგეთის მუნიციპალიტეტის საკრებულოს საჯარო ინფორმაციაზე პასუხისმგებელ პირს წერილობითი განცხადებით, სადაც ვწერდით, რომ მოეცათ საშუალება, დედანში გავცნობოდით ადმინისტრაციულ აქტს, რომლის საფუძველზეც, 2012 წლის 14 მარტიდან, ოზურგეთის მუნიციპალიტეტის ადმინისტრაციულ შენობაში შეიზღუდა თავისუფლად გადაადგილების უფლება. 14 მარტს, 17 საათსა და 35 წუთზე პასუხად მივიღეთ, რომ ბრძანება 12 მარტს გამოცემულა ანუ ორი დღით ადრე, სანამდე კონტროლის პალატა ოზურგეთის ადმინისტრაციულ შენობას დაიკავებდა.
“ადგილობრივი თვითმმართველობის შესახებ” საქართველოს ორგანული კანონის 43-ე მუხლის მე-3 პუნქტის “ა” ქვეპუქტის და “ოზურგეთის მუნიციპალიტეტის საკრებულოს დებულების დამტკიცების შესახებ” ოზურგეთის მუნიციპალიტეტის საკრებულოს 2010 წლის 19 ივლისის #2 დადგენილების 117-ე მუხლის შესაბამისად:
1. ოზურგეთის მუნიციპალიტეტში (საკრებულოსა და გამგეობაში) მოქალაქეთა (საქართველოს მოქალაქეთა და უცხოელთა) მიღების, განცხადებების და საჩივრების განხილვის პროცესის სრულყოფისა და მუნიციპალიტეტის შეუფერხებელი ფუნქციონირების უზრუნველყოფის მიზნით: მოქალაქეთა მიღება მოხდეს მხოლოდ ადმინისტრაციულ შენობაში მდებარე მოქალაქეთა მომსახურების ცენტრის მეშვეობით; მოქალაქეთა მიღების დროს განიხილება ზეპირი, წერილობითი განცხადებები და საჩივრები, მუნიციპალიტეტის კომპეტენციას მიკუთვნებულ საკითხებზე; მუნიციპალიტეტის თანამდებობის პირებთან და საჯარო მოსამსახურეებთან მოქალაქეთა მიღების ჩაწერა უზრუნველყოს საკრებულოსა და გამგეობის შესაბამისმა მთავარმა სპეციალისტებმა დადგენილი წესის მიხედვით, რომლებიც ვალდებულია აწარმოოს მოქალაქეთა მიღების აღრიცხვა სპეციალურ ჟურნალში. ჟურნალში შედის მონაცემები მოქალაქის ვინაობის, მიღების თარიღის, განხილული საკითხისა და მიღების შედეგის თაობაზე. ჟურნალში სააღრიცხვო ჩანაწერს ხელს აწერს მიმღები თანამდებობის პირი; მოქალაქის განცხადებაში (საჩივარში) დასმული საკითხის მნიშვნელობიდან გამომდინარე, აპარატის უფროსის და/ან ადმინისტრაციული სამსახურის უფროსის შუამდგომლობით, მუნიციპალიტეტის თანამდებობის პირი აწარმოებს მოქალაქის მიღებას; მუნიციპალიტეტის ადმინისტრაციულ შენობაში (საკრებულოს და გამგეობის 1-ელ და მე-2 სართულზე) მოქალაქეთა გადაადგილება მოხდეს მოქალაქეთა მიღებაზე პასუხისმგებელი მოსამსახურის (მოსამსახურეების) მეშვეობით; მუნიციპალიტეტში მოქალაქეთა მიღება არ წარმოებს საქართველოს კანონმდებლობით გათვალისწინებულ უქმე და დასვენების დღეებში;
მუნიციპალიტეტის საჯარო მოსამსახურეებმა საკუთარი კომპეტენციის ფარგლებში უზრუნველყონ მოქალაქეთა უფლებებისა და კანონიერი ინტერესების დაცვა.
2. ამ ბრძანების 1-ლი პუნქტის მოქმედება არ ვრცელდება მუნიციპალიტეტის საკრებულოს, საკრებულოს კომისიების, ფრაქციების სხდომებისა და საჯარო განხილვების ჩატარების დღეს.
3. ამ ბრძანების შესრულებაზე კონტროლი დაევალოს ოზურგეთის მუნიციპალიტეტის საკრებულოს აპარატის უფროსს პაატა ბურჭულაძეს.
4. ბრძანება შეიძლება გასაჩივრდეს ოზურგეთის რაიონულ სასამართლოში გაცნობიდან ერთი თვის ვადაში (მის: ქ. ოზურგეთი სიორიძის ქ #14).
5. ბრძანება ძალაშია გამოქვეყნებისთანავე.
ამ ბრძანებას ხელს საკრებულოს თავმჯდომარე ალეკო მამეშვილი აწერს.
