“გურია ნიუსთან” საუბარში მრავალი ადამიანი გზის დაგებას, წყლისა და გაზის შემოყვანას ითხოვს. აქაურთა თქმით, ეს პრობლემა, რამდენიმე წელია, რაც აწუხებთ: _ გზა მაკვანეთის ცენტრს იქეთ დააგეს, სოფელში შესასვლელში კი ასფალტი ამოტეხილია და მხოლოდ “დაკერების” მეთოდით სცადეს მისი შეკეთება. გარე განათებას, რომელიც შარშან დაამონტაჟეს, მხოლოდ რამდენიმე ნათურა შემორჩა, _ ამბობს მოსახლეობა.
მაკვანეთში მცხოვრები ერთ-ერთი პენსიონერი ჩვენთან სოფლის გასაჭირზე საუბრობს: _ ისე მიდის საქმეები, ისეთები იწერება გაზეთებში, მაგი ივანიშვილიც თამაშობს, მგონია და მაგიც მაგათი კაცი ხომ არ არის? რაღა ვთქვა, არ ვიცი. მე, პირადად, სოციალურად შეჭირვებული არ ვარ, შვილები მუშაობენ, მაგრამ ქვეყანა რომ იქცევა, იმას კი ვხედავ.
_ რას გულისხმობთ ქვეყნის დაქცევაში?
_ რას ვგულისხმობ და ბათუმში რომ მეჩეთს აშენებენ, აი, იმას. საქართველოში კი ხედავთ, განათლების საქმე როგორცაა. 15 წლის ბავშვს რომ ციხეში გაუშვებენ, არ შეშფოთდები? გზა ჩვენ არ გვაქვს და კვალი. ხალხს უჭირს, ლუკმა-პურის ყიდვის საშუალება არ აქვს, ახლა გაზაფხულია და რამდენი პრობლემაა, სახნავ-სათესი სამუშაოები დასაწყებია, უფულობაა.
_ გასულ წელს, სოფლის დახმარების პროგრამით, რა გაკეთდა თქვენთან?
_ რა ვიცი, რაღაც ხიდი გააკეთეს, აგერ-ეგერ გზაც “წააკერეს”, ზოგან 10 მეტრი და ზოგან კიდე _100.
_ წელს რის გაკეთებას დაგპირდნენ სოფლის განვითარების პროგრამით?
შუქრი: _ სოფლის ცენტრში მოაწყვეს შეხვედრა, მაგრამ მე არ წავსულვარ. მგონი, გაზი გამოჰყავთ. რა არ მესმის, იცით? ჩემი თხოვნა რად უნდა გამგებელს? სოფელს იმიტომ ჰყავს დეპუტატი, რომ საკუთარი სოფლის პრობლემა და თითოეული მცხოვრების პრობლემა უნდა იცოდეს. მან უნდა დააყენოს ეს საკითხი. უთხრან გამგებელს, რომ გზა გვინდა, წყალი გვინდა, გაზი გვინდა! ეს არის ჩვენი სოფლის პრობლემები. ახლა, მგონი, 52 000 ლარი არის გამოყოფილიო, ეყოფა მაგი ფული ამ პრობლემებს?
ომარი: _ აი, უბრალოდ, ავად ვარ და ყველაფერზე _ გასინჯვაზე, მიღებაზე, წამლის ყიდვაზე _ პრობლემა შემექმნა. უფულობის გამო შავ დღეში ვარ. პენსია რამდენად გავყო? გამოვიტან წინასწარ ავანსად და მერე ვარ მშიერი. რა გამოვა ამ ლაპარაკით, ან თქვენ რომ დაწერთ, გამოსწორდებიან? მაგის იმედი არავის აქვს, ან რომ დავჯდე ახლა და დავიწყო, წამალი არ მაქვს,-მეთქი, მიყიდის ვინმე?
_ ვითომ შეგვიცვალეს კაბელები, მაგრამ რა? ერთი ქარი თუ ამოვარდა, დამთავრდა, შუქი უცებ ქრება. არაფერი შეღავათი არაა მაგ მხრივ, გზა არ გვაქვს, მთელი ზამთარი უშუქობაა. გაჭირვებულებს კიდევ უფრო მეტად გვიჭირვებენ. ამ უბანში წყალი საერთოდ არ აქვთ, ჩვენ ჭა გვაქვს ეზოში, მაგრამ ვისაც არ აქვს, ისინი როგორ წვალობენ, იცით?
_ გაზი გვინდა ყველაზე მეტად. წყალი არ გვაქვს, გზა უმეტესად გაფუჭებულია. ცენტრამდე გზა რა მდგომარეობაშია, თავადაც ხედავთ და ცენტრს იქით დაგება რაღა იყო? ფეხს მოიტეხავ, ისეთი გზაა. შარვალს რომ ჩააკერებს ადამიანი, ხომ იცით?! ისე გადააკერეს გზა. ერთადერთი, რაც გააკეთეს ისაა, რომ დენის მრიცხველები დადგეს. საარჩევნოდ გაზს და წყალს გამოვიყვანთო და გზასაც დავაგებთო, შეხვედრაზე უთქვამს გამგებელს. 54 000 ლარი ყოფილა გამოყოფილი, მაგრამ არც გზას ეყოფა ეგ ფული და არც გაზსო. თითქოს, გაზს “იტერა” გაგვიკეთებსო. ჩვენი მოთხოვნა, პირველ რიგში, წყალსადენის გამოყვანაა. აგერ ხართ, ბატონო და უყურეთ, რას გააკეთებენ.
ოზურგეთის მუნიციპალიტეტის სოფელ მაკვანეთის რწმუნებული, მერაბ ვასაძე “გურია ნიუსთან” საუბარში ამბობს, რომ მაკვანეთში მცხოვრებთა პრობლემა არის გაზის, გზისა და წყლის პრობლემა:
_ პირველ რიგში, გზის პრობლემაა. ერთი კვირის წინ, ჩვენთან, სოფელში, გამგებელთან იყო შეხვედრა და შეგვპირდნენ, რომ აუცილებლად გააკეთებენ გზას. ასევე, დაგვპირდნენ გაზისა და წყლის პრობლემის გადაწყვეტაც.
_ ბატონო მერაბ, რატომ დაიგო გზა მაკვანეთში მხოლოდ ცენტრს იქით და ცენტრამდე მისასვლელი გზა, უბრალოდ, “ჩააკერეს”?
_ ნამდვილად არ ვიცი. მაგ გზის გაკეთება თავიდან იყო სახელმწიფო ბიუჯეტში ჩასმული, მაშინ ცენტრალური გზა მშვენიერი იყო, ახლა გაფუჭდა. გაზიც შარშან უნდა გამოეყვანათ, მაგრამ ვერ მოხერხდა, წელს გამოიყვანენ აუცილებლად.
_ ფიქრობთ, რომ გზის, წყლის და გაზის პრობლემა მოგვარდება?
_ აუცილებლად. გზის პრობლემა მთელ სოფელში ნამდვილად ვერ მოგვარდება, ეს გამორიცხულია, დაიგება მხოლოდ ცენტრალურ გზაზე. სოფლის მხარდაჭერის პროგრამა 51 000 ლარით გვაფინანსებს და თანხას ისე გავანაწილებთ, როგორც მოხერხდება.
