“გურია ნიუსი” ცოტა ხნის წინ, ლანჩხუთის მუნიციპალიტეტის სოფელ ნიგვზიანის რწმუნებულის მოადგილის ავთანდილ სურმანიძის სამსახურიდან გათავისუფლების მცდელობაზე წერდა. რაიონის ხელისუფლებას სურმანიძესთან იმის გამო ჰქონდა პრეტენზია, რომ მან სამუშაო საათებში მიატოვა სამსახური და პარტიულ შეხვედრაზე წავიდა.
სურმანიძემ გამგებლის სახელზე დაწერილი განცხადებაც გვაჩვენა, რომელშიც არ ეთანხმებოდა მისი განთავისუფლების მიზეზს. იგი არ აპირებდა, საკუთარი ნებით დაეწერა განცხადება სამსახურიდან წასვლის თაობაზე.
ჩვენ საკრებულოს თავმჯდომარის პოზიციაც დავაფიქსირეთ _ რევაზ ჩიტიძის თქმით, სურმანიძე სამსახურიდან არ გაუთავისუფლებიათ, უბრალოდ, ახსნა-განმარტება მოთხოვეს, რატომ არ იმყოფებოდა სახელისუფლებო შეხვედრაზე სამუშაო საათებში. ჩიტიძემ ხაზგასმით აღნიშნა, რომ სურმანიძე სამსახურიდან გათავისუფლებული არ არის არც პოლიტიკური და არც სხვა მოტივით.
ამ მასალის გაზეთში გასვლის შემდეგ დაგვიკავშირდა ავთანდილ სურმანიძე და გვაჩვენა გიორგი გოგუაძის მიერ ხელმოწერილი ბრძანება მისი სამსახურიდან განთავისუფლების შესახებ. ბრძანება 26 მარტითაა დათარიღებული. ანუ იმ დროისთვის, როცა საკრებულოს თავმჯდომარის პოზიციას ვეცნობოდით, სურმანიძის განთავისუფლების ბრძანება უკვე დაწერილი იყო!
გამგებლის ბრძანებაში მითითებულია განთავისუფლების მოტივი _ დისციპლინარული გადაცდომისთვის “სამსახურებრივ მოვალეობათა ბრალეული შეუსრულებლობა ან არაჯეროვნად შესრულება”, კერძოდ: 2012 წლის სოფლის მხარდაჭერის პროგრამის ფარგლებში შესასრულებელი პროექტების ადგილობრივ მოსახლეობასთან შეთანხმებაში მონაწილეობის მიუღებლობა”.
ავთანდილ სურმანიძე აღნიშნავს, რომ ამ შეხვედრაზე იმყოფებოდა და ხალხის მობილიზებაშიც მიიღო მონაწილეობა. შეხვედრა მას შემდეგ დატოვა, რაც თავისი მოვალეობა შეასრულა.
ხელისუფლების წარმომადგენლები კატეგორიულად არ ეთანხმებიან მის მოსაზრებას: “ის საჯარო მოხელეა და ვალდებულია სამუშაო საათებში _ ცხრიდან ექვსამდე სამსახურში იმყოფებოდეს,” _ თქვა რევაზ ჩიტიძემ.
ავთანდილ სურმანიძე 26 მარტის შემდეგ სამსახურეობრივ მოვალეობას აღარ ასრულებს. “თუ განთავისუფლებული არ არის, მაშინ ხვალვე გავა და იმუშავებს, მას ოჯახი ჰყავს სარჩენი”, _ ამბობს “თავისუფალი დემოკრატების” ლანჩხუთის ორგანიზაციის მდივანი ელგუჯა ჩხაიძე.
ავთანდილ სურმანიძის თანაგუნდელებს მიაჩნიათ, რომ სურმანიძე პოლიტიკური რეპრესიის მსხვერპლია.
საკრებულოს თავმჯდომარემ რევაზ ჩიტიძემ სატელეფონო საუბარში დაგვიდასტურა, რომ 26 მარტის ბრძანებულებით სურმანიძე განთავისუფლებულია სამსახურიდან.
_ 26 მარტს თქვენ თქვით, რომ სურმანიძე გათავისუფლებული არ იყო.
_ ჩვენი შეხვედრა შედგა დილით, ბრძანება კი დღის მეორე ნახევარში დაიწერა, მას შემდეგ, რაც გამგებელი არ დააკმაყოფილა სურმანიძის მიერ მოცემულმა ახსნა-განმარტებამ.
_ რა იყო გათავისუფლების მოტივი?
_ ამაზე დაწვრილებით თავად გამგებელს ჰკითხეთ.
ტელეფონით დავუკავშირდით რაიონის გამგებელს გიორგი გოგუაძეს და ამ ფაქტის კომენტირება ვთხოვეთ.
_ ბატონო გიორგი რა იყო სურმანიძის სამსახურიდან გაშვების საფუძველი?
_ ბრძანებაში ნათლადაა მითითებული.
_ მას მიაჩნია, რომ პოლიტიკური დევნის მსხვერპლია.
_ არავითარი დევნა აქ არ არის _ იგი რამდენიმე წელი მუშაობდა ამ თანამდებობაზე და ჩემგან პრობლემა არ შექმნია. მან სოფლის პროგრამის ფარგლებში შეხვედრა ჩამიგდო მოსახლეობასთან, თავხედურად მიატოვა ეს შეხვედრა და პირად საქმეზე წავიდა. სამსახურეობრივი მოვალეობის შეუსრულებლობა იყო მისი გაშვების მიზეზი.
