რამდენიმე დღეა, ოზურგეთის მუნიციპალიტეტის დაბა ლაითურში, მოსახლეობის ნაწილი ოზურგეთელი ბიზნესმენის ლევან თოიძის მიერ მიწის ნაკვეთის გაყიდვას აპროტესტებს. ადგილობრივები ამბობენ, რომ მათ გვიან გაიგეს, როგორ მიყიდა თოიძემ 50 ჰექტარი მიწის ნაკვეთი ებრაელ ბიზნესმენს, რომელიც უკვე ოზურგეთში იმყოფება და ამ დრომდე პრესასთან კომენტარს არ აკეთებს. ლევან თოიძე "გურია ნიუსთან" ამბობს, რომ 2006 წელს დაბა ლაითურში 49,3 ჰექტარი მიწის ნაკვეთი იყიდა და მისი გაყიდვით არანაირი კანონი არ დაურღვევია. მოსახლეობის თქმით, ახალმა ინვესტორმა მათ გაშენებული თხილის ბაღების წართმევა დაუპირა.
ნუნუ აბაშიძე, ლაითურის მცხოვრები: _ მშიერ-მწყურვალი ვიყავით. აქაურობას ეკალი, ბარდი მოვაშორეთ და დავიწყეთ სასოფლო-სამეურნეო საქმიანობა. ჩემი შვილი ლაითურში ჯარში სამსახურის შემდეგ ჩამოვიდა. როდესაც ეს ადგილი გავწმინდეთ და ვიშრომეთ, არავინ მოსულა და არ უთქვამს, ჩემიაო. ათის წლის მერე გამოჩნდა ვიღაც და ამ მიწის ნაკვეთს გვართმევს. თოიძემ ისე გაყიდა ეს მიწა, ხალხს არაფერი შეგვეკითხა. მოულოდნელად დაგვადგნენ თავზე და დაიწყეს შეღობვა. რაც საბუთი მომცა მთავრობამ, 3 000 მეტრზე კი მქონდა გაკეთებული, მაგათმა კი მითხრეს, აქ 1 ჰექტარზე გაქვთ გაშენებულიო. ზოგი ვიყიდე, ზოგი მოვიმატე. ბევრი ნამუშევარი გვაქვს ამ მიწაზე, შეიძლება ამის წართმევა?! 4 000 მეტრ მიწას მართმევს ეს ახალი ინვესტორი.
_ ხელისუფლებას თუ მიმართეთ?
_ ლაითურის რწმუნებულსაც და ოზურგეთის მუნიციპალიტეტის გამგეობასაც მივმართე, მაგრამ ისინი ამბობენ, რომ კერძო პირს ჰქონდა ნაყიდი მიწის ნაკვეთი და მან გაყიდაო.
ებრაელი ბიზნესმენი მეუბნება, შემოჭრილი ხარ ჩემს ტერიტორიაზეო. მას 2 000 წელს აქვს საბუთი აღებული, მე კი _ 1978 წელს. ეს ამბავი ალბათ სააკაშვილის ყურამდე არ არის მისული _ ის არ იტყოდა, გლეხებს წაართვი და გაყიდეო.
ვახტანგ საგინაძე: _ საძოვარსაც არ გვიტოვებენ. ლაითურში გზა არ არის, წყალი არ მოდის. 1 000 მეტრი მიწის ნაკვეთი გექნება თუ 1 ჰექტარი, ერთია. მე ფული არ მაქვს და ვერ ვაფორმებ, ვერ ვყიდულობ. მინდა საქონელიც გავუშვა, ღორიც, ქათამიც. ახლა ამ მიწის ნაკვეთებზე პრობლემა შეიქმნა. როგორც ჩამოგვასახლეს, გეგმიური წესით, ისე მოიყვანონ ვაგონები და გადაგვასახლონ ციმბირში.
ნათელა საგინაძე: _ როგორც კი მოვიდა ეს ბიზნესმენი, შემოღობვა დაიწყო. ვკითხეთ, რა უფლებით ღობავდა მიწის ნაკვეთებს. გვიპასუხა, მე ეს მიწის ნაკვეთები ვიყიდე, წადით და სააკაშვილს ჰკითხეთო. ოზურგეთის მუნიციპალიტეტის გამგებელი იყო ამოსული ლაითურში, მაგრამ არაფერი…
მიხეილ სააკაშვილი გამოვიდა ტელევიზიით და ბრძანა _ დარჩენილი, გაფუჭებული ადგილები დაურიგდეს გლეხებს, ბიზნესი წამოიწყონ, გააკეთონ საქმე, მაგრამ ვინ გაცლის? ლაითურში მცხოვრებმა ჟორა მიქელაძემ, რომლის ოჯახში ათი ადამიანი ცხოვრობს, იშრომა, ფერმა ააშენა. მოვიდა ეს კაცი და ერთი მეტრი მიწა არ დაუტოვა. შოკშია კაცი!
ლევან თოიძე ჩვენთან საუბრისას ამბობს, რომ მას კანონი არ დაურღვევია და არავის უფლებების შელახვას არ აპირებს: _ 2002 წელს იჯარით ავიღე 52 ჰექტარი მიწის ნაკვეთი; 2006 წელში ვიყიდე 49,3 ჰექტარი, დღეს კი ვყიდი. როდესაც ავედით ლაითურში და დავიწყეთ აზომვა, აღმოჩნდა, რომ ერთი მცხოვრები უნებართვოთ არის შემოჭრილი 4 200 მეტრზე, სადაც გაუშენებია თხილი. მინდა, რომ ჩემი ტერიტორია გამითავისუფლოს. ჯერ არ გამიყიდია, ვყიდი. მაგათ იცოდნენ, რომ მიწის ნაკვეთი ჩემი იყო _ უთხრეს, ლევან თოიძის საკუთრებააო. არავინ მოსულა ჩემთან და არაფერი უთქვამს.
"გურია ნიუსისთვის" ცნობილი გახდა, რომ ებრაელი ბიზნესმენი ლაითურში კივის პლანტაციის გაშენებას და სათბურის გაკეთებას აპირებს. ლაითურში ისიც გვითხრეს, რომ მან ადგილობრივი მოსახლეობის დასაქმებაც დაიწყო, მაგრამ რამდენიმე ადამიანმა მასთან მუშაობას მეორე დღესვე დაანება თავი _ როგორც ერთ-ერთმა მათგანმა გვითხრა, ანაზღაურება დაბალი იყო, თანაც უცხოელს თანხის გაცემაც გაუჭირდა.
ჩვენ შევეცდებით, ამ დღეებში ებრაელ ბიზნესმენსაც დავუკავშირდეთ. ლაითურში ყოფნის დროს, იგი სახლში არ დაგვხვდა.
