საკრებულოს თავმჯდომარემ ალეკო მამეშვილმა სხდომის მონაწილეებს დღის წესრიგით გათვალისწინებული ხუთი საკითხი გააცნო.
დიდი ინტერესი გამოიწვია პირველმა საკითხმა _ “ოზურგეთის მუნიციპალიტეტის 2012 წლის ბიუჯეტის დამტკიცების შესახებ”, ოზურგეთის მუნიციპალიტეტის საკრებულოს 2011 წლის 9 დეკემბრის # 49 დადგენილებაში ცვლილების შეტანის შესახებ” ოზურგეთის მუნიციპალიტეტის საკრებულოს დადგენილების დამტკიცების თაობაზე.
საკითხის ირგვლივ გიორგი ჩაგანავამ ისაუბრა და აღნიშნა, რომ აუცილებლობიდან გამომდინარე, საჭიროა, გაიზარდოს გაჭირვებულთა სამედიცინო მომსახურების პროგრამა.
საქართველოს მთავრობის ამ წლის # 772 განკარგულების შესაბამისად, ოზურგეთის მუნიციპალიტეტს გამოეყო 599 000 ლარი, მათ შორის: კურორტ ურეკში ბულვარის მოწყობისთვის _ 500 000 ლარი და ამერიკული თეთრი პეპელას საწინააღმდეგო ღონისძიებების გასახორციელებლად _ 99 000 ლარი.
ალეკო მამეშვილმა საგანგებოდ მიანიშნა თეთრი პეპლის საწინააღმდეგო ღონისძიების აუცილებლობაზე: _ ყველას კარგად გვახსოვს, რომ შარშან ხელი შეგვეშალა ამ მხრივ. წელს გამოყოფილია 99 000 ლარი, გაიმართება ტენდერი და ვინც გაიმარჯვებს, ის კომპანია იმუშავებს მწვანე მასივების დამუშავებაზე. არც ერთი ქუჩა, უბანი თუ სოფელი არ დარჩება შეუწამლავი, უკმაყოფილო არავინ არ უნდა დარჩეს, _ თქვა მან.
მეორე საკითხზე “ოზურგეთის მუნიციპალიტეტის 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ” განკარგულების დამტკიცების თაობაზე ამირან გირკელიძემ ისაუბრა: _ გამგეობის კომპიუტერული ტექნიკის შეძენის ხარჯები 1 800 ლარით შემცირდეს და გამოყენებული იქნეს პროექტორის შესაძენად. წარმომადგენლობითი ხარჯები კი გაიზარდოს 7 000 ლარით, _ თქვა გირკელიძემ.
“გარე რეკლამის განთავსების ნებართვის შემოღებისა და გარე რეკლამის განთავსების ნებართვის მიღების წესის დამტკიცების შესახებ”, თამაზ სალუქვაძემ ისაუბრა. მან გააცნო დეპუტატებს რეკლამის გასათავსებელი ადგილებისა და ფასების შესახებ.
მეოთხე და მეხუთე საკითხები ოზურგეთის მუნიციპალიტეტის ტერიტორიაზე ქუჩების, ხეივნების, შესახვევების, ჩიხების სახელწოდების მინიჭების შესახებ დადგენილების შემოღების დამტკიცებას და სათამაშო ბიზნესის მოსაკრებლის შემოღების შესახებ” დადგენილებაში ცვლილების შეტანის შესახებ განხილვას შეეხო, რაზეც, შესაბამისად, პეტრე სალუქვაძემ და ალეკო მამეშვილმა ისაუბრეს.
დღის წესრიგით გათვალისწინებული ხუთი საკითხის განხილვას არც ისე ხანგრძლივი დრო დასჭირდა, თუმცა, საკრებულოს სხდომაზე ღიად გამოიკვეთა ხელისუფლების მკვეთრი პოზიცია _ დავდგეთ გაჭირვებულთა გვერდით და ამერიკული პეპლის წინააღმდეგ! ვნახოთ, რა მოხდება უახლოეს მომავალში _ თეთრი პეპელა ხომ კარსაა მომდგარი და ასე ადვილად არც თავს დაგვანებებს. აქედან გამომდინარე, ამ თემაზე საგაზეთო სტატიების წერაც ხშირად მოგვიწევს.
