_ ზვიად, რა მდგომარეობაა ახლა პოლონეთისა და ბელორუსის საზღვარზე?
_ ამჟამად აქ 130-მდე ქართველი იმყოფება. მათ შორის არიან ოჯახები და მცირეწლოვანი ბავშვები. ხშირია პრეცედენტი, როდესაც პოლონეთის საზღვარს უპრობლემოდ კვეთს რამდენიმე ადამიანი, მაგრამ ამ ეტაპზე ბელორუსიის საზღვრიდან გადასვლას 130 საქართველოს მოქალაქე ცდილობს, რაც, რასაკვირველია, სირთულეებთან არის დაკავშირებული.
_ სხვა ქვეყნის მოქალაქეებსაც აქვთ მსგავსი პრობლემა?
_ საქმე იმაშია, რომ სხვა ქვეყნის მოქალაქეებს, მაგალითად, კავკასიური ქვეყნების მოქალაქეებს, უპრობლემოდ ატარებენ საზღვარზე, მაგრამ ქართველებს _ არა. ვფიქრობ, რომ ეს ჩვენი პრეზიდენტის განცხადებების დამსახურებაა.
_ როგორ გრძნობენ თავს მანდ მყოფი ემიგრანტები? სად ცხოვრობენ ან რითი იკვებებიან?
_ ახლადჩამოსულები ვინც არიან, ჯერ კიდევ აქვთ იაფიან სასტუმროში გაჩერების საშუალება, დანარჩენები კი ღამეს ქუჩაში ათენებენ. ძალიან გადაღლილები არიან და იმედი აქვთ გადაწურული. საქართველოს ერთმა მოქალაქემ, რომლის სახელსაც ვერ გეტყვით, მუცელი გადაისერა, რომ როგორმე პოლონეთში შეეღწია.
_ როგორია მისი ჯანმრთელობის მდგომარეობა?
_ მდგომარეობა დამაკმაყოფილებლია. პოლონეთში საავადმყოფოშია ახლა, მაგრამ გამოჯანმრთელებისთანავე დააბრუნებენ ბელორუსიაში.
_ ბელორუსიაში ჩასვლა ერთადერთი შანსია ევროპაში მოსახვედრად?
_ ხალხს არ აქვს იმის საშუალება, რომ ვიზა ოფიციალურად გააკეთონ. ამიტომ ერთადერთი გზა ევროპისკენ პოლონეთზე გადის, პოლონეთში კი ბელორუსიდან ახერხებდნენ გადასვლას.
_ თქვენ რას აპირებთ?
_ ჩვენ ვესაუბრეთ საქართველოს საკონსულოს ბელორუსში და მათი პასუხი ასეთია: რას ჩამოდიოდნენ, არ იცოდნენ, რა მდგომარეობაო.
საკონსულოსგან ელემენტარულ ყურადღებას ვითხოვთ, სხვა თუ არაფერი, ის ხომ მაინც შეუძლიათ, რომ რეგისტრაციის პრობლემის მოგვარებაში დაეხმარონ ემიგრანტებს და ამით საშუალება მისცენ სამი თვე პოლიციასთან პრობლემების გარეშე იარონ ქუჩაში. მერე იქნებ გადასვლაც მოახერხონ.
თუმცა ამ ეტაპზე, ერთადერთი შანსი, რაც დაგვრჩა, პოლონეთის საკონსულოსთვის ოფიციალური განცხადებით მიმართვაა. მივწერთ მათ, რომ საქართველოში არსებული პოლიტიკური და სოციალური მდგომარეობის გამო, ჩვენ ჩვენს სამშობლოში ვეღარ გავჩერდით, ამიტომაც მიგვიღონ თავის ტერიტორიაზე დევნილების სტატუსით.
