“გურია ნიუსი” სამივე მათგანს დაუკავშირდა.
ლევან კონჯარია, ზუგდიდის მუნიციპალიტეტის საკრებულოს თავმჯდომარე.
_ ბატონო ლევან, საუბრობენ იმაზე, რომ ზუგდიდში “ნაციონალურ მოძრაობის” მაჟორიტარობის კანდიდატი თქვენ იქნებით, ადასტურებთ?
_ რას მელაპარაკებით, ვინ გითხრათ? თქვენ გინდათ ასე იყოს?
_ ჩემს აზრს აქ არ აქვს მნიშვნელობა. ადასტურებთ, რომ თქვენ იქნებით კანდიდატი?
_ არა. ვერაფერს გეტყვით. ჯერჯერობით ამაზე საუბარი არ ყოფილა.
ვახტანგ ცხადაია, სამეგრელოს გუბერნატორის მოადგილე.
_ ბატონო ვახტანგ, საუბრობენ იმაზე, რომ ზუგდიდში “ნაციონალური მოძრაობის” მაჟორიტარობის კანდიდატი თქვენ იქნებით. ადასტურებთ?
_ არა. ასეთი ოფიციალური შემოთავაზება არ ყოფილა. ვინმეს თუ აქვს სურვილი და ამას ამბობს, ეს ნამდვილად არ ვიცი.
ფრიდონ თოდუა, ზუგდიდის მაჟორიტარი დეპუტატი.
_ ბატონო ფრიდონ, საუბრობენ, რომ ზუგდიდის მაჟორიტარობის კანდიდატი “ნაციონალური მოძრაობიდან” ოქტომბრის საპარლამენტო არჩევნებში ისევ თქვენ იქნებით.
_ მე ვამთავრებ ჩემს დეპუტატობას. ამ საკითხზე არავისთან მისაუბრია და არც არავის შემოუთავაზებია. არაფერი ვიცი. თქვენ თუ იცით, მაშინ მომიყევით.
_ ჩვენ დასაზუსტებლად თქვენ გირეკავთ.
_ გეუბნებით, არაფერი ვიცი. ჩემი პროფესია – ექიმობა ყველაფერს მირჩევნია, მაგრამ თუ ქვეყანას დაჭირდა, კი ბატონო, ვიყრი კენჭს.
_ არჩევნებში მმართველი პარტიიდან თქვენ თუ იყარეთ კენჭი, ხოლო “ქართული ოცნებიდან” ირაკლი ალასანიამ, მიიჩნევთ თუ არა მას რეალურ მოწინააღმდეგედ?
_ ყველას დიდ პატივს ვცემ. ჩემგან ვერავინ გაიგონებს ცუდ საუბარს _ ის ისეთია, ან ეს ასეთია. ყველას აქვს მინუსები _ თოდუასაც და ირაკლი ალასანიასაც.
ხალხი თავად გადაწყვეტს. როდესაც კენჭს ვიყრიდი არჩევნებში, არავისთვის მიმიცია პირობა, ამას გავაკეთებ, იმას გავაკეთებ,-მეთქი. მხოლოდ ვთქვი _ თუ გაგიჭირდათ, დაგეხმარებით,-მეთქი. ზოგიერთი ხალხს პირდება, ამას გაგიკეთებთ, სოციალურ საკითხებს გადაგიწყვიტავთო, მაგრამ არავინ ამბობს, ამას როგორ გააკეთებს. არც მე ამიშენებია ზუგდიდი ხელახლა, მაგრამ გაიხსენეთ 4 წლის მანძილზე, რამდენი რამე გაკეთდა. ავადმყოფ კაცს რომ დავეხმარები, ჩემთვის ეს ყველაზე დიდი საქმეა. ვიქნები დეპუტატი თუ არ ვიქნები, ყოველთვის დავეხმარები ზუგდიდელებს.
რამდენი გზა გავაკეთეთ, რამდენ სოფელს დავეხმარეთ. ზუგდიდში გაზი ვინ შემოიყვანა? თოდუამ!
აზერბაიჯანში ყოფნის დროს, აზერბაიჯანის პრეზიდენტ ალიევს ვთხოვე, ზუგდიდამდე გაზი გამოეყვანა და გამოიყვანა კიდეც “სოკარმა”, მაგრამ გული მწყდება იმაზე, რომ ცენტრალურ ქუჩაზე გაზია შეყვანილი, ხოლო ზუგდიდელების უმეტესობას სახლში არ აქვს. ჩვენ გაზი მოვიყვანეთ. ხოლო ამ არჩევნებში ხალხი ვისაც აირჩევს, დანარჩენი იმან გააკეთოს. ძალიან ბევრ ადამიანს ვეხმარებოდით ტექნიკით. ახლა დამირეკა ახალგაზრდა ადამიანმა, მთხოვა კომპიუტერით დავხმარებოდი, მაგრამ ვერ დავეხმარე. მაშინ მქონდა დახმარების უფლება, ახლა არ მაქვს. ოქტომბრის არჩევნების მერე შევპირდი დახმარებას.
_ მაინც არ მითხარით, მიგაჩნიათ თუ არა ირაკლი ალასანია რეალურ მოწინააღმდეგედ?
_ როგორ გითხრათ, ირაკლი ალასანიას ვიცნობ, მაგრამ… მე არ მიფიქრია, ვიყრი კენჭს თუ არა. ალბათ, არ ვიყრი. არც მაშინ მინდოდა, მაგრამ პირადად პრეზიდენტმა მთხოვა.
_ ისევ რომ გთხოვოთ პრეზიდენტმა?
_ მე ჩემს არგუმენტებს ვიტყვი. თუ საჭირო იქნება, სახელმწიფოს და ჩემს კუთხეს დასჭირდა, რა ვქნა?! ისე, ჩემი საქმიანობის გაგრძელება მინდა სამეცნიერო საქმეში.
დიდი სურვილი მაქვს სამეგრელოს ჰყავდეს ისეთი გუბერნატორი, ჰქონდეს ისეთი უნივერსიტეტი… უნივერსიტეტი ვინ აღადგინა, ის ხომ დაშლილი იყო? ჰკითხეთ ერთი?! თოდუამ! მარტო გუბერნატორი კი არა, ჩვენ ყველანი უნდა ვიყოთ ისეთი, როდესაც მომავალი თაობა მოვა, თქვან: ამ ადამიანმა ჩვენთვის გააკეთა ეს და ეს.
_ თქვენ საუბრობთ, რომ გსურთ სამეგრელოს ჰყავდეს “ისეთი გუბერნატორი”, ჰქონდეს “ისეთი უნივერსიტეტი”. არ გინდათ, ზუგდიდს ჰყავდეს “ისეთი გამგებელი”?
_ ზუგდიდს გადასარევი გამგებელი ჰყავს. დაანებეთ თავი! ის ადამიანი მუშაობს, აშენებს, ყველაფერს აკეთებს. ნუ ხართ თქვენ მეგრელები პრეტენზიულები! თქვენ გინდათ უკეთესი? მონახეთ უკეთესი.
_ თქვენს გარდა, საუბარია მმართველი გუნდიდან მაჟორიტარობის ორ კანდიდატზე.
_ თქვენ მომინახეთ, თოდუა რომ წავა, ვინ უნდა იყოს დეპუტატობის კანდიდატი ზუგდიდში?! შეიძლება უნდათ, მაგრამ….
ალბათ, თქვენც ბევრი რამ გინდათ ცხოვრებაში, მაგრამ ამის შესაძლებლობა გაქვთ?!
