_ ბატონო გია, სად და როგორ აღმოაჩინეთ მოსასმენი აპარატურა?
_ მეზობელმა დამირეკა, რომელსაც დიდი ხანია დაკეტილი და გაურემონტებელი ჰქონდა ბინა. რემონტის დაწყება უნდოდა. დღეს მოვიდა სახლში და აღმოაჩინა, რომ მისი ბინიდან, ჩემთან შემოაღწიეს.
_ იქ არავინ ცხოვრობდა? როგორ შეაღწიეს მის ბინაში?
_ სწორედ ეს არის მთავარი. ორ დანაშაულთან გვაქვს საქმე _ სხვის კერძო საკუთრებაში უკანონო შეღწევა და ჩემი პირადი უფლებების დარღვევა.
_ სამართალდამცავ ორგანოებს თუ აცნობეთ მოსასმენი აპარატურის აღმოჩენის შესახებ?
_ რა თქმა უნდა. კრიმინალისტები ამ წუთებშიც ჩემს სახლში მუშაობენ. უფრო სწორად, მიმდებარე ტერიტორიაზე.
_ თქვენ არასდროს შეგიმჩნევიათ ვინმე საეჭვო?
_ არა. ახალი აშენებული კორპუსია და ბევრი გაურემონტებელი ბინაა ჩემი ბინის თავზე. საინტერესოა, რას უსმენდნენ. დილის ცხრის ნახევარზე გავდივარ და 12 საათზე შემოვდივარ სახლში. მაგრამ ერთი ეჭვი მაქვს და მინდა გაგიზიაროთ, რადგან გურულებს კარგად ესმით ასეთი ვერსიები. მე მყავს მალტესის ჯიშის ძაღლი, რომელიც მეგობრობს ივანიშვილის ძაღლთან. დამყავს ხოლმე სასეირნოდ. რა ვიცი აბა?! ასეთი კარგი სიახლოვე რომ აქვთ ჩვენს ძაღლებს, შეიძლება ჩემს ძაღლს უსმენდნენ, იმიტომ, რომ სახლში მთელი დღე ის არის. მე რომ მოვდივარ სახლში, ვიძინებ. ჩემგან ვერაფერს გაიგებენ. მაინტერესებს და შსს მინდა ვთხოვო _ თუ რამე გაარკვიეს ჩემი ძაღლისგან, მეც მომაწოდონ ინფორმაცია.
_ ახლა არ მითხრათ, ძაღლი დასაკითხად უნდა წაიყვანონო…
_ რა ვიცი. შეიძლება წაიყვანონ კიდეც…
