შეგახსენებთ, რომ ინციდენტი 22 ივლისს მოხდა, როდესაც ბიძინა ივანიშვილი სტიქიით დაზარალებულ კახელებს შეხვდა. მისი სტუმრობის შემდეგ, სამართალდამცავებმა ვაჩნაძიანში მცხოვრები გიორგი ნატროშვილი დააკავეს და თელავის დროებითი მოთავსების იზოლიატორში მოათავსეს.
გიორგი ნატროშვილი იგი თავს უდანაშაულოდ თვლიდა და საჩივრით მიმართა საქართველოს მთავარ პროკურორს მურთაზ ზოდელავას; “ქართული ოცნება – დემოკრატიული საქართველოს” თავმჯდომარეს ; საქართველოს პარლამენტის ადამიანის უფლებათა დაცვის კომიტეტის თავმჯდომარეს; სახალხო დამცველს; უწყებათაშორის კომისიას, საქართველოს ადვოკატთა ასოციაციის თავმჯდომარეს ზაზა ხატიაშვილს.
“მოგმართავთ საქართველოს მთავარ პროკურორს და გთხოვთ, გააუქმოთ თქვენი ქვემდგომი პროკურორის გადაწყვეტილება, დაუყოვნებლივ გამათავისუფლოთ, შეწყვიტოთ გამოძიება და მოახდინოთ რეაგირება ჩემი უკანონო დაკავების გამო”, _ ნათქვამია საჩივარში.
ასევე ითხოვს დაიწყოს გურჯაანის გამგეობის თანამშრომლის მიმართ გამოძიება ხულიგნობისთვის, ცრუ დასმენისთვის, სიტყვის, შეკრების, პოლიტიკური მრწამსის, თავისუფლების შეზღუდვისა და განსხვავებული აზრის დევნის გამო”
“გურია ნიუსი” გიორგი ნატროშვილის განცხადებას უცვლელად გთავაზობთ. საჩივრის ტექსტში მოყვანილი არაეთიკური სიტყვების გამო რედაქცია მკითხველს ბოდიშს უხდის.
“როდესაც ბატონი ბიძინა წავიდა, იქ მყოფმა, გურჯაანის გამგეობაში მომუშავე ქალბატონმა დაიწყო ივანიშვილის ლაძღვა. რაზეც ვუთხარი, რომ არ იყო სწორი საქციელი ადამიანის შეურაცხყოფა. მეზობლებიც მყავდა “ნაციონალები”, თუმცა ერთმანეთის ლიდერებს არ ვლანძღავდით და ხალხი არჩევნებზე გამოხატავდა თავის დამოკიდებულებას ამა თუ იმ პოლიტიკური ძალის მიმართ.
შემდეგ, ზემოაღნიშნულმა ქალბატონმა ბიძინას ბრალი დასდო რუსეთის აგენტობაში, მისი მისამართით დაიწყო შეურაცხმყოფელი სიტყვებით საუბარი და თქვა, რომ ივანიშვილმა მოაკვლევინა ჩვენი სოფლელი – ალექსი ნატროშვილი.
გურჯაანის გამგეობის თანამშრომელი ასევე იქ მყოფ “ქართული ოცნების” მხარდამჭერებს გვიწოდებდა რუსეთის აგენტებს, რაზედაც ჩემმა ცოლმა – ნათელა ბიწკინაშვილმა უთხრა, _ “ჯერ კიდევ საკითხავია, ვინ არის აგენტიო.”
აღნიშნულის შემდეგ ქალბატონმა, რომელიც ერთ-ერთ სახელისუფლებო უწყებას წარმოადგენდა, ჩემს მეუღლეს უთხრა – “შე კახპაო.” როდესაც ხულიგან ქალბატონს ვუთხარი, ჩემი ცოლისთვის შეურაცხყოფა არ მიეყენებინა, მან ნათელაზე მიპასუხა: “შენი ცოლი კი არა ივანიშვილის პუტანკაა და თვითონ ბიძინაც გათახსირებული და ნაბიჭვარი კაცია და ამ კახპასაც, მან დაულურჯა ფეხებიო.”
ასევე აღვნიშნავ, რომ ჩემს ცოლს მართლაც ჰქონდა დალურჯებული ფეხები სტიქიის გამო.
ყოველივე ამის შემდეგ, უზრდელ საჯარო მოხელეს სახეზე მივადე ხელი, რომ დავეტოვებინეთ და აღარ გაემეორებინა ის სალანძღავი სიტყვები, რითიც შეურაცხყოფდა “ქართული ოცნების” ლიდერს, იქ შეკრებილ მოსახლეობას, ჩემს მეუღლეს და პირადად მე.
აქვე აღვნიშნავ რომ გურჯაანის გამგეობის უზრდელ თანამშრომელს ხელი ერთიანად მივადე პირზე და სათვალეებზე, რის შემდეგაც იგი ცოტა უკან გაიწია. თუმცა, კვლავ განაგრძო ბატონი ივანიშვილის ლანძღვას და დაიწყო დამუქრება, რომ “დააჭერინებდა ჩემს თავს.
დაახლოებით ერთ საათში მართლაც დამაკავეს,” _ ნათქვამია ნატროშვილის განცხადებაში.
