პროფესიონალი სპორტსმენი, ვეტერანი ფეხბურთელი, რომელსაც არასოდეს ჰქონია შეხება პოლიტიკასთან, როგორც თვითონ ამბობს, ქვეყანაში გამეფებულმა განუკითხაობამ და ქაოსმა, აიძულა რადიკალურად შეეცვალა ცხოვრების წესი და პოლიტიკურ ორომტრიალში ჩართულიყო.
“გურია ნიუსმა” დეპუტატობის კანდიდატს რამდენიმე კითხვა დაუსვა.
_ საზოგადოებისთვის ცნობილია კოალიციის სამოქმედო პრიორიტეტების შესახებ, მაგრამ მისი საარჩევნო პროგრამა ჯერ არ გამოქვეყნებულა, რაზეც ხშირად საუბრობენ თქვენი პოლიტიკური ოპონენტები. დამთავრდა თუ არა პროგრამაზე მუშაობა და როდის გახდება იგი საზოგადოებისთვის ცნობილი?
_ პროგრამაზე მუშაობა მიმდინარეობს. დამთავრებისთანავე გამოვაქვეყნებთ, რათა საქართველოს ყველა მოქალაქისთვის ხელმისაწვდომი იყოს. რაც შეეხება ჩვენს პოლიტიკურ ოპონენტებს, მათ ძალიან კარგად იციან ოთხზე გამრავლება.
_ გავრცელდა ინფორმაცია,რომ ლაჩხუთის საფეხბურთო სამყარომ ღიად დააფიქსირა თქვენდამი სოლიდარობა და მხარდაჭერაზეუარი განუცხადა დეპუტატობის სავარაუდო კანდიდატს “ნაციონალური მოძრაობიდან” გია გოგუაძეს…
_ ეს კულუარებიდან მეც გავიგე, მაგრამ დანამდვილებით ვერაფერს გეტყვით. სიმართლე საარჩევნო ყუთთან გამოჩნდება.
_ ცნობილია, რომ წარსულში თქვენ და გოგუაძე მეგობრობდით. ახლა რა ურთიერთობა გაქვთ?
_ ჩვეულებრივი, როგორიც მქონდა, მაგრამ პოლიტიკაში სხვადასხვა პოზიციებზე ვდგავართ. იმედს ვიტოვებ, ჩატარდება ნორმალური და სამართლიანი არჩევნები. ბრძოლა იქნება კანონის ფარგლებში და არა წესების გარეშე. ამას ვურჩევ ჩემს პოლიტიკურ მოწინააღმდეგესაც (თუმცა, ჯერ არ ვიცი ვინ იქნება კონკურენტი).
ერთი რამ მინდა გავიხსენო _ 2003 წელს, ლანჩხუთის მაჟორიტარი დეპუტატობის კანდიდატები იყვნენ მერაბ ჟორდანია, ჯონი ფირცხალაიშვილი და ბიძინა გუჯაბიძე. სამივე ღირსეული ადამიანი და ჩემი უახლოესი მეგობარია, მაგრამ მე მერაბ ჟორდანიას ვედექი გვერდით. ჩემ თავზე ავიღე მათი შეხვედრისა და გაცნობის ორგანიზება. სამივემ გადაკოცნეს და წარმატებები უსურვეს ერთმანეთს. ქვეყნის გადარჩენისთვის რომელი გზაც იქნება მისაღები საზოგადოებისთვის, ეს ოქტომბრის არჩევნებში გადაწყდება.
_ რა გახდა თქვენი პოლიტიკაში მოსვლის კონკრეტული მიზეზი?
_ მთელი ცხოვრება სპორტს, კერძოდ კი ფეხბურთს ვემსახურებოდი. არასოდეს არ მქონია პოლიტიკაში მოსვლის ამბიცია, რადგან ვთვლიდი, რომ პოლიტიკოსი არ ვარ და ეს არ არის ჩემი საქმე. ქაოსმა, გაუტანლობამ, ღირსების შელახვამ, ამდენი დაჩაგრული ხალხის ყურებამ მაიძულა გადამედგა ეს ნაბიჯი და ჩემი წვლილი შემეტანა ქვეყნის აღორძინებაში.
_ როგორია თქვენი დამოკიდებულება იმ ძალადობრივი ფაქტების მიმართ , რაც გამუდმებით თან სდევს “ქართული ოცნების” წინასაარჩევნო შეხვედრებს მოსახლეობასთან? თქვენც ხომ არ გამხდარხართ მსგავსი ინციდენტის მსხვერპლი?
_ არა, ნამდვილად არ გავმხდარვარ მსგავსი ინციდენტის მსხვერპლი. რა თქმა უნდა ძალადობას ვგმობ, მით უმეტეს, ისეთ ღირსეულ მამულიშვილზე როგორიც კახი კალაძეა.
საერთოდ, ყოველთვის ძალადობის წინააღმდეგი ვარ. ვურჩევ “ნაციონალებს”, თავი შეიკავონ ყოველგვარი უკანონო ქმედებისგან და ღირსეულად შევეჭიდოთ ერთმანეთს.
_ როდიდან დაიწყებთ ფართომაშტაბიან შეხვედრებს მოსახლეობასთან?
_ შეხვედრები დაწყებული გვაქვს. მალე პროგრამის შესაბამისად ვიმუშავებთ.
