რამდენიმე თვის წინ, საქართველოს პრეზიდენტმა საზოგადოებას აუწყა, რომ ახალი გეგმის ხორცშესხმას აპირებს – საქართველოში მცხოვრებ 50 წელს გადაცილებულ ყველა ადამიანს კარგი კბილები და ვარსკვლავური ღიმილი უნდა ამშვენებდეს!
იდეა თავისთავად ცუდი არ არის, მაგრამ მის გახორციელებაში ბევრს ეჭვი ეპარებოდა და ის ის იყო მიივიწყეს კიდეც, მაგრამ აღმოჩნდა, რომ საარჩევნოდ სულაც არ იქნება ცუდი, თუ ადამიანებს ძვირადღირებული სტომატოლოგიური მომსახურებით დაასაჩუქრებ.
სუფსის ცენტრში მდგარ მობილურ პოლიკლინიკასთან, რომელიც ორ ავტობუსშია განთავსებული, მკურნალობის უამრავი მსურველი ირევა.
პროექტის მთავარი კოორდინატორია ახალგაზრდა ექიმი-სტომატოლოგი ნუცა ზურაბიანი, რომელიც საორგანიზაციო საკითხებს აგვარებს. თბილისიდან ჩამოყვანილია 12 გამოცდილი ექიმი, შრომითი ხელშეკრულებები გაუფორმეს 8 ადგილობრივ მედპერსონალს, რომელთა შორის არიან სტომატოლოგები, მედდები, სანიტრები.
როგორც იქაურებმა გვითხრეს, პროექტი სამი კვირის განმავლობაში გაგრძელდება და სუფსის 300-ზე მეტ მცხოვრებს მოემსახურება.
ნუცა ზურაბიანი “გურია ნიუსთან” საუბრისას განმარტავს, რომ ეს არის საპილოტე ანუ საცდელი პროგრამა: “დაახლოებით ერთი კვირის შემდეგ გვეცოდინება, სუფსის შემდეგ რომელ სოფელში გავაგრძელებთ მუშაობას. სავარაუდოდ, ისეთ სოფელს შევარჩევთ, სადაც სტომატოლოგიური მომსახურების ხელმისაწვდომობა ძალიან დაბალია”.
თავდაპირველად გადაწყვეტილი იყო პროგრამაში ჩართულიყვნენ მოქალაქეები 45 წლიდან, მაგრამ იმდენი მსურველი მოაწყდა მობილურ პოლიკლინიკას, გადაწყვეტილება შეცვალეს და ასაკი 50 წელს მიუახლოვეს.
დავინტერესდით, რა შეფასებით მოხდა სოფლების არჩევა. გავარკვიეთ, რომ ეს პრეზიდენტის “პირადი საჩუქარი” ყოფილა გურიისთვის – საქართველოს ყველაზე დაბალშემოსავლიანი რეგიონისთვის, სუფსის არჩევა კი ადგილობრივი მოსახლეობის მიმართვიანობის მაღალი პროცენტით ყოფილა განპირობებული. გაირკვა, რომ სუფსის მცხოვრებლების აბსოლუტური უმრავლესობისთვის დღემდე მიუწვდომელია სტომატოლოგის მომსახურება.
პროექტის კოორდინატორი ამბობს, რომ ადგილობრივი მოსახლეობა ძალიან კმაყოფილია ამ პროგრამით. აქ არიან ადამიანები, რომლებიც ბოლო 10-15 წელია, სტომატოლოგის სავარძელს არ კი მიახლოებიან.
ჩვენ რამდენიმე ადგილობრივ პაციენტს გავესაუბრეთ.
ირინა მეგრელაძე: “მთელი ცხოვრება არ მქონდა იმის საშუალება, რომ მემკურნალა. ახლა ქირურგიული მკურნალობა ჩავიტარე და კბილების ჩასმასაც ვაპირებ. მე არ მიმაჩნია, რომ ეს არჩევნებთანაა დაკავშირებული”.
ერთ-ერთმა იქაურმა, რომელიც სვეტლანა ჩხაიძედ გაგვეცნო, თავად გამოთქვა სურვილი “გურია ნიუსთან” კომენტარი გაეკეთებინა: “ძალიან კმაყოფილები ვართ, პრეზიდენტის გაკეთებული ყველაფერი მომწონს, დაწერეთ ეს. სხვებს ჰკითხეთ აგერ, ყველა კმაყოფილია. ვის ჰქონდა იმის საშუალება, კბილებზე ემკურნალა? დაწერეთ, წერთ?”
ცოტა ხნის შემდეგ ქალბატონმა სვეტლანამ საიდუმლო ხმით და ცოტა არ იყოს შეწუხებული გამომეტყველებით გვკითხა, ისეთი რამე ხომ არ ჩაიწერეთ, ესენი (ხელით ადმინისტრაციულ შენობაზე მიგვანიშნა) რომ გაბრაზდნენ და აღარ მიმკურნალონ კბილებზეო(?!) როცა მას ჩანაწერი ვაჩვენეთ, დაწყნარდა და პოლიკლინიკასთან შეკრებილ მეზობლებს შეუერთდა.
მოსახლეობა ამბობს, რომ მოსწონთ ეს პროგრამა, მაგრამ ეჭვები მაინც უჩნდებათ _ რატომ ახსენდება მთავრობას ხალხი მხოლოდ საარჩევნოდ?
