საკრებულოს თავმჯდომარემ სხდომის მონაწილეებს დღის წესრიგი გააცნო. ვიდრე საკითხების ცალ-ცალკე განხილვა დაიწყებოდა, გაზეთ “ალიონის” რედაქტორმა, ნუგზარ ასათიანმა ალეკო მამეშვილს სხდომის დამთავრების შემდეგ განცხადების გაკეთების ნებართვა სთხოვა. მას შემდეგ, რაც მამეშვილმა განცხადების შინაარსი გაიგო, ასათიანს თანხმობა მისცა.
საკრებულოს სხდომაზე განსახილველი ოთხი საკითხიდან, ერთი დადგენილებაში ცვლილების შეტანას, სამი კი განკარგულების დამტკიცებას შეეხო.
“ოზურგეთის მუნიციპალიტეტის გამგეობის ზედამხედველობის სამსახურის დებულების დამტკიცების შესახებ” ოზურგეთის მუნიციპალიტეტის საკრებულოს 2010 წლის 4 აგვისტოს #22 დადგენილებაში ცვლილების შეტანის შესახებ” _ დადგენილების დამტკიცების თაობაზე პეტრე სალუქვაძემ ისაუბრა. მან თქვა, რომ “ნორმატიული აქტების შესახებ” საქართველოს კანონის მეოცე მუხლის შესაბამისად, რამდენიმე მუხლში ცვლილება შეიტანა.
მეორე საკითხზე _ “ოზურგეთის მუნიციპალიტეტის დაბა ურეკის ადმინისტრაციულ საზღვრებში არსებულ შავიზღვისპირა პლაჟზე ბაზირების პუნქტის განსაზღვრის შესახებ” _ ოზურგეთის მუნიციპალიტეტის საკრებულოს განკარგულების დამტკიცების თაობაზე, ისევ პეტრე სალუქვაძემ ისაუბრა და აღნიშნა, რომ “ადგილობრივი თვითმმართველობის შესახებ” საქართველოს ორგანული კანონის შესაბამისად, ოზურგეთის მუნიციპალიტეტის დაბა ურეკის ადმინისტრაციულ საზღვრებში არსებულ შავიზღვისპირა პლაჟზე მცირე ზომის გემების (კატარღა, მოტონავი, ჰიდროციკლი, წყლის ველოსიპედი, ნავი) ბაზირების პუნქტებად განისაზღვროს შემდეგი ადგილები: სასტუმროების: “პრემიუმის”, “ნექტარის”, “კოლხიდას”, “ბერმუხას”, “ელიტას” და “თოლიას” წინ მიმდებარე ტერიტორიები, ხოლო მიღებული განკარგულების თაობაზე, ეცნობოს საქართველოს შინაგან საქმეთა სამინისტროს სახელმწიფო საქვეუწყებო დაწესებულების _ საქართველოს სასაზღვრო პოლიციის სანაპირო დაცვის დეპარტამენტს. განკარგულების გასაჩივრება კი შესაძლებელია ოზურგეთის რაიონულ სასამართლოში, გაცნობიდან ერთი თვის ვადაში.
მესამე საკითხის ირგვლივ _ “ოზურგეთის მუნიციპალიტეტის საკუთრებაში არსებული ქონების სახელმწიფოს სასარგებლოდ საკუთრების უფლების მიტოვების შესახებ”, თამაზ სალუქვაძემ ისაუბრა. მან თქვა, რომ “ადგილობრივი თვითმმართველობის შესახებ” საქართველოს ორგანული კანონის შესაბამისი მუხლების თანახმად, ოზურგეთის მუნიციპალიტეტის საკუთრებაში არსებული ქონება, კერძოდ, ბახვის თემში მდებარე ადმინისტრაციული შენობის 6657.0 კვმ. ფართიდან 10.26 კვმ. ფართი და ძიმითის თემში მდებარე ადმინისტრაციული შენობის 11444.0 კვმ. ფართიდან 26,72 კვმ. ფართი გამოცხადდეს მიტოვებულად სახელმწიფოს სასარგებლოდ, შემდგომში მისი შპს “საქართველოს ფოსტას” კაპიტალში შეტანის გზით.
მეოთხე, არცთუ უმნიშვნელო საკითხის _ “სახელმწიფო შესყიდვების 2012 წლის გეგმაში ცვლილებების შეტანის შესახებ”, _ ირგვლივ, რამდენიმე სიტყვით შემოიფარგლა ამირან გირკელიძე. გირკელიძის გამოსვლა საწვავის ხარჯის გაზრდას შეეხებოდა, კერძოდ: მუნიციპალიტეტის 2012 წლის ბიუჯეტი 2012 წლის 1 აგვისტოს მდგომარეობით საავტომობილო საწვავის შესაყიდად ითვალისწინებს 141 200 ლარს, სახელმწიფო შესყიდვების გეგმა კი _ 137 056 ლარს. სახელმწიფო შესყიდვების გეგმის მუნიციპალიტეტის 2012 წლის ბიუჯეტთან შესაბამისობაში მოყვანისთვის, მუნიციპალიტეტის სახელმწიფო შესყიდვების გეგმაში საწვავის შეძენის ხარჯი გაიზარდოს 4144 ლარით და საბოლოოდ, განისაზღვროს 141 200 ლარით.
სხდომის ბოლოს, ჟურნალისტმა ნუგზარ ასათიანმა, შეპირებისამებრ, სიტყვა ითხოვა: “ჩვენ არასდროს დაგვიძალებია დეპუტატებისთვის გაზეთის გამოწერა. ნაწილს აქვს გამოწერილი, ნაწილს ჴ არა. მიგვაჩნია, რომ ეს არის ნებაყოფლობითი პროცესი, თუმცა, ახლა დაიწყო პროცესი, რის გამოც შეზღუდულია ადგილობრივი მედიის გამოცემა.”
ნუგზარ ასათიანმა დასტურად მოიშველია მცენარეთა დაცვისა და სურსათის უვნებლობის სამსახურის უფროსის, კახა თავბერიძის ქმედება, რომელმაც “ალიონის” გამოწერაზე უარი განაცხადა: _ მან მითხრა, რომ მე არანაირ ადგილობრივ მედიას არ გამოვიწერო. ჩვენ ვართ საარჩევნო პროცესში და მიმაჩნია, რომ მედიის საჯარო სამსახურების ურთიერთობა იყოს ჯანსაღი, არ ვამბობ, რომ ამ ყველაფრის უკან დგას საკრებულო, მაგრამ ასეთი პროცესი არის, რომლის უკან დგას გარკვეული საზოგადოება, _ თქვა ასათიანმა და საკრებულოსა და დეპუტატებს სთხოვა, რომ მიაქციონ ყურადღება, რათა ეს საკითხი დარეგულირდეს.
ალეკო მამეშვილმა აღნიშნა, რომ ეს არ არის ადგილობრივი თვითმმართველობის სამსახური და თვითონ არასოდეს არავის ეუბნება, რომ რომელიმე გაზეთი გამოიწეროს ან არ გამოიწეროს.
ოპოზიციონერმა დეპუტატმა, თემურ სალუქვაძემ ითხოვა სიტყვა და ისაუბრა სოფელ ცხემლისხიდში მომხდარი ფაქტის შესახებ, სადაც ამავე სოფლის მცხოვრებ ნუგზარ გიორგაძეს პავლონიის ნარგავები აუჩეხეს.
_ ნუგზარი ძალიან აქტიური ადამიანია, ჩვენ პოლემიკა გვაქვს ერთმანეთთან, მაგრამ ასეთი ვანდალობა არ უნდა მოხდეს. ყველამ უნდა დავგმოთ ასეთი ქმედება. სალუქვაძეს მიაჩნია, რომ ეს ქმედება პოლიტიკური ნიშნითაა ჩადენილი.
