დაბა ურეკისა და სოფელ წვერმაღალას განვითარებისთვის 2011 წელს 20 879 ლარი გამოიყო და დაიხარჯა.
ოზურგეთის მუნიციპალიტეტის დაბა ურეკის განვითარებისთვის 2011 წელს “სოფლის მხარდაჭერის პროგრამით” გასახორციელებელი სამუშაოების შესასრულებლად, 13 604 ლარი იყო გამოყოფილი. პრიორიტეტები კი შემდეგნაირად განისაზღვრა და გამოყოფილი თანხა ასე გადაანაწილეს:
მაგნიტოში არხის და მე-2 რაიონში არხის გაწმენდა, შესასვლელი გზის ტროტუარების გაწმენდა და ხეების შეთეთრება, 5 ერთეული მოსაცდელების შეღებვა, ურეკის წყალმომარაგების სისტემის შეკეთება და გზის მოხრეშვა-დაგრეიდერება.
სოფელ წვერმაღალაში 2011 წელს “სოფლის მხარდამჭერი პროგრამით” გასახორციელებელი სამუშაოების ჩასატარებლად 7 275 ლარი გამოიყო და შემდეგი სამუშაოები გახორციელდა: 1500 მმ. დიამეტრის მილხიდის მოწყობა და ჭაბურღილის წყლის ძრავისა და პლასტმასის მილების შეძენა.
დაბა ურეკში წყალგაყვანილობის სისტემის რემონტისთვის 3890 ლარი, წყალსაქაჩი ტუმბოს შეკეთებისთვის 800 ლარი, ფოტო აპარატის შეძენისთვის 329 ლარი, ცენტრალური გზის გვერდულების მოწესრიგებისთვის 1358 ლარი, სანიაღვრე არხების გასაწმენდად 3209, გზის მოხრეშისთვის 1905 ლარი, ხოლო ხუთი მოსაცდელის რემონტისთვის 486 ლარი დაიხარჯა. ურეკისა და წვერმაღალის მილხიდის მოწყობა 6248 ლარი დაჯდა. წვერმაღალაში წყალგაყვანილობის მილების და ტუმბოს შეძენა კი _ 2654 ლარი.
ურეკის რწმუნებულის, ემზარ გოგიტიძის თქმით, ურეკის ერთ-ერთი უბანი, “ხუტორი” წვიმების შედეგად იტბორებოდა. მდინარეს გასასვლელი არ ჰქონდა და არხის გაწმენდის შემდეგ მოსახლეობას ეს პრობლემა აღარ აწუხებს.
_ ჩვენ შეცვალეთ წვერმაღალაზე მილხიდი, მოსახლეობას მივაწოდეთ წყალი, რომელიც რამდენიმე წლის განმავლობაში არ მიეწოდებოდა, გავაკეთეთ ჭაბურღილი, შევიძინეთ ტუმბო და მოსახლეობას წყალი მივაწოდეთ.
_ რამდენი ოჯახი იყო წყლის გარეშე? ახლა ეს პრობლემა ურეკს აღარ აწუხებს?
_ ეს იყო 60 ოჯახი წვერმაღალაზე. ურეკშიც იყო მსგავსი პრობლემა, დაზიანებული იყო ტუმბო, რომლის გარემონტებისთვის ძალიან დიდი თანხა და დრო დაგვჭირდა, თითქმის ნახევარი საქართველო მოვიარეთ და ბოლო-ბოლო ქუთაისში გავაკეთეთ. ახლა, წყლის პრობლემა მეტ-ნაკლებად მოგვარებულია.
როგორც ყველა სოფელში, ჩვენც შევარემონტეთ მოსაცდელები, გავწმინდეთ გზის ტროტუარი, რომელიც მთლიანად ეკალ-ბარდში იყო გახვეული, გაიწმინდა ის არხები, რომელიც მოსახლეობას ძალიან აწუხებდა, მოვაწესრიგეთ გზები, რადგან იყო ორმულები და მოასფალტდა, მოწესრიგდა შიდა გზები.
_ ბატონო ემზარ, ის თანხა, რაც იყო გამოყოფილი დაბა ურეკისა და სოფელ წვერმაღალას განვითარებისთვის, ყველა დაიხარჯა იმ პროექტების შესასრულებლად, რაც პრიორიტეტებად დასახელდა?
_ კი, რა თქმა უნდა. ჩვენ გავითვალისწინეთ მოსახლეობის ინტერესები და ისე გავაკეთეთ.
_ თქვენი აზრით, მოსახლეობა კმაყოფილია შესრულებული სამუშაოებით?
_ კი, რატომაც არა. მადლობას გვეუბნებიან. რატომ არ უნდა იყვნენ კმაყოფილები? დღე და ღამე მათ სამსახურში ვართ და ის პრობლემები, რომელიც მათ აწუხებთ, ვცდილობთ შეძლებისდაგვარად მოვუგვაროთ. შეგიძლიათ, იკითხოთ სხვადასხვა უბანში, წვერმაღალაზე, მესხის ქუჩაზე და თქვენ თვითონ დარწმუნდებით, რომ სიმართლეს გესაუბრებით. ყოველ წელს სჭირდება არხებს გაწმენდა, მანამ, სანამ კაპიტალურად არ გაკეთდება და მოწესრიგდება წყალკანალიზაციის პრობლემა ურეკში. წყალდიდობამ დააზიანა წვერმაღალაზე გზა საერთოდ, ჩაშვავდა. შევიტანეთ ხრეში.
_ ბატონო ემზარ, ურეკში, თქვენი აზრით, იყო თუ არა ისეთი პრობლემა, რომლის მოგვარება უფრო მნიშვნელოვანია და არ გაკეთებულა?
_ თქვენ იცით, რომ ურეკს წლებია, უდგას წყლის პრობლემა, რომელიც ძალიან მნიშვნელოვანია თითოეული მოსახლისთვის, თუმცა ამ ეტაპზე ჩვენ ურეკში 35 ოჯახს გადავუწყვიტეთ წყლის საკითხი.
_ კანალიზაციის სისტემა მოუწესრიგებელია…
_ დაგეთანხმებით, მოუწესრიგებელია კანალიზაციის პრობლემა, მაგრამ, ალბათ, შეამჩნევდით, დაიწყო მუშაობა, მიმდინარეობს გადაღებები, აზომვითი ნახაზები, ფაქტობრივად, დაიწყო წყალკანალიზაციის სისტემის მოწესრიგება ურეკისა და წვერმაღალას ტერიტორიაზე. ამ სამუშაოებს ასრულებენ წყალკანალის თბილისის წარმომადგენლები. ეს დაფინანსდება სახელმწიფო ბიუჯეტიდან.
წვერმაღალაზე მოსახლეობას სახლის სახურავების შეცვლა სჭირდება, დაწყებულია ეს პროექტიც, ასევე გაკეთდა გარე განათებებიც, იგეგმება გზის კაპიტალური რემონტიც.
ლია შალამბერიძე, ურეკში, სანაპიროს ქუჩის მცხოვრები: _ ურეკს, ალბათ, 15 წელია, წყალი არ მიეწოდება. თითქმის ყველა ოჯახს აქვს საკუთარი ჭაბურღილი, მას კი ელექტროენერგია სჭირდება, ისე როგორ მოიხმარ? ადგილობრივი, ჩვენს მიერ დაბურღილი წყლებია. საკუთარი ძალებით გაკეთებული.
_ იცნობთ სოფლის პროექტებს ურეკში? რა გაკეთდა?
_ კაი, შვილო, რა ვიცი. ჩვენ დამოკიდებული ვართ სეზონზე, უნდა გავაქირავოთ ოთახები. ყველას ბანკის ვალი გვაქვს.
ავთანდილ მახარაძე: _ მე ვცხოვრობ აქ 1972 წლიდან. ამდენი წლის განმავლობაში მოსახლეობის მისამართით არავითარი დახმარება არ ყოფილა. ყველაფერი ჩემი ხელით და შრომით მაქვს გაკეთებული. ჩემს სახლში ხელისუფლება ყველა თვეში გადასახადს მთხოვს. სეზონზე 840 ლარს ვიხდი, ორი თვის განმავლობაში. მთავრობის წყალი არ გვქონია წლების განმავლობაში. არსად არ არის. ჩვენ გვაქვს ჩვენი ჭაბურღილი, მაგრამ წყალს ამოტუმბვა უნდა, შუქის ამბები კი იცით…
სესილი გვარჯალაძე, მიხეილ მესხის ქუჩაზე მცხოვრები: _ ყველაზე დიდი პრობლემა ჩვენი მოსახლეობისთვის იყო წყალი. მადლობა ღმერთს, რომ ეს ყველაზე დიდი პრობლემა ამ ეტაპზე მოგვიგვარეს რწმუნებულმა და დეპუტატმა. აქ იცით, რა მდგომარეობა იყო? _ საშინელი, წყალი სახლში შემოგვივარდა, გაწმინდეს არხები და წყალიც მოგვეწოდება. სულ კარდაკარ იარეს რწმუნებულმა და მაჟორიტარმა და შეამოწმეს ყველა ოჯახი, მადლობა ღმერთს და მათ, რომ ეს პრობლემა ურეკის უმეტეს ნაწილს მოუგვარეს.
