რამდენად იცნობს ნინოწმინდის მუნიციპალიტეტის პრობლემებს, რა ვითარებაა და იციან თუ არა ნინოწმინდაში “ქართული ოცნების” შესახებ, ამასთან დაკავშირებით “გურია ნიუსი” ალბერტ ნურბეკიანს ესაუბრა.
_ ნინოწმინდის მუნიციპალიტეტი საკმაოდ რთული რეგიონია, სადაც ძირითადად სომხები ცხოვრობენ. მათ იციან “ქართული ოცნების” შესახებ?
_ მართალი ხართ, ძალიან რთული რეგიონია, მაგრამ მუშაობა უნდა…
_ როგორც ვიცით, უკვე მთელი რეგიონი შემოიარეთ. რა ვითარებაა ნინოწმინდის მუნიციპალიტეტში?
_ რთული. როდესაც მიდიხარ და ესაუბრები არა – არას ამბობენ, მაგრამ პირველ რიგში, შიში უნდა დავძლიოთ. ყველაფერი დანარჩენი მერე იქნება. მინდა გითხრათ, მზად არიან შიში დაძლიონ. როდესაც ნახავენ ადამიანს, რომელიც მათ დაეხმარება დასაქმებაში, პრობლემების მოგვარებაში, შიშის დაძლევაში, გაძლიერდებიან. ერთი კვირის შემდეგ, ჩემი ინტერვიუ აბსოლუტურად სხვა იქნება. ამის პირობას გაძლევთ.
_ ნინოწმინდის მუნიციპალიტეტში, სოფლებში ქართული ბეჭდური მედია, ტელევიზია თუ არის?
_ ძირითადად, “თეფშებით” რუსულ არხებს უყურებენ. ქართულ არხებს აჩვენებს, მაგრამ… ეგონათ ცარიელი და დაკარგული ადგილი იყო. ფიქრობდნენ, მაინც დაკარგული ადგილია, მაგრამ არ დაიკარგება. ხომ ხედავთ, ყველაზე ბოლოს მოხდა ჩვენი მაჟორიტარობის კანდიდატებად გამოცხადება.
_ იქ თუ გყავთ მომხრეები?
_ საკმაოდ ბევრნი არიან. ჩვენ როდესაც ახალქალაქში ჩავედით, ღამე იყო. ოფისი სავსე იყო ახალგაზრდებით, ხალხით. პირველ დღესვე არ ხდება ყველაფერი. ახლა იწყებენ წამოდგომას. შეუძლებელია მარადიულად შიშის ქვეშ გყავდეს ადამიანები. ადრე თუ გვიან, ისინი წამოდგებიან.
_ ბიძინა ივანიშვილმა “გურია ნიუსთან” განაცხადა რომ ნინოწმინდის მუნიციპალიტეტში უჭირდათ კანდიდატის პოვნა. თქვენ როგორ გიპოვეს?
_ მე თბილისის სომეხთა ასამბლეის ერთ-ერთი დამფუძნებელი ვარ. ასევე საქართველოს მფრინავთა ასოციაციის პრეზიდენტი. ბიძინა ივანიშვილა იყო ჩვენთან მოსული. მომისმინა. ჩემი გამოსვლა მოეწონა. ივანიშვილის იდეების მომხრე ვარ. მის ყველა გამოსვლას, სადაც საკმაოდ მშვიდად, აღელვების გარეშე და არგუმენტირებულად საუბრობს ანალიზს ვუკეთებ. არა ისე, როგორც სააკაშვილი გამოდის და ყვირის ისტერიულად.
_ თქვენ აღნიშნეთ, რომ თბილისის სომეხთა ასამბლეის დამფუძნებელი ხართ. რას ფიქრობენ თბილისში მცხოვრები სომხები საქართველოში მიმდინარე პოლიტიკურ მოვლენებზე?
_ იცით რა, რუსეთმა მხოლოდ თქვენ არ წაგართვათ აფხაზეთი, სოხებსაც და აზერბაიჯანელებსაც წაართვა. ეს ჩვენი სამშობლოა. დაპირისპირებით ჩვენ აფხაზეთს ვერ დავიბრუნებთ. ბიძინა ივანიშვილმა პირველ რიგში, უნდა დაალაგოს ურთიერთობები რუსეთთან. ყვირილითა და ტალახის სროლით ჩვენს სამშობლოს ვერ გავაერთიანებთ. მთავარი მიზანია საქართველოს ტერიტორიული მთლიანობის აღდგენა. ბოლოსდაბოლოს, ჩვენ, სომხებმა და აზერბაიჯანელებმა რეალურად უნდა შევიტანოთ წვლილი ამაში. რაც უფრო ტყის სიღრმეში შედის ბატონი სააკაშვილი, მით უფრო რთული იქნება ბიძინა ივანიშვილის შეჩერება.
ჩვენი, საქართველოში მცხოვრები სომხების მთავარი მიზანია, დავეხმაროთ ბიძინა ივანიშვილს საქართველოს ტერიტორიული მთლიანობის აღდგენაში. რთული ამოცანაა, მაგრამ უნდა ვიმუშაოთ.
