კოალიციის წარმომადგენლის, მაია გიორგაძის თქმით, საარჩევნო უბნები, ადმინისტრაციულ შენობებშია განთავსებული, მიუხედავად იმისა, რომ სხვა ალტერნატიული ფართებიც არსებობს:
_ ასეთი რამდენიმე უბანია. რომ დავკონკრეტდე გეტყვით, რომ ზემო ფარცხმის საარჩევნო უბანი სხვა შენობაში არ გადააქვთ. საოლქოსაც მივმართეთ და საუბნო კომისიის თავმჯდომარესაც, თუმცა უშედეგოდ, _ აღნიშნა გიორგაძემ.
ბრიფინგზე ვიდეო ფაილიც წარმოადგინეს, სადაც კარგად ჩანს, როგორ არიგებს საარჩევნო სიებთან მჯდარი საუბნო კომისიის თავმჯდომარის მოადგილე ნონა ცინცაძე ფულს.
როგორც გავარკვიეთ, ცინცაძე "ლიბერთი ბანკის" თანამშრომელი და გასვლითი მოლარეა. ბანკში განგვიმარტეს, რომ ის პენსიებს არიგებდა. თავად მისი ნახვა არ მოხერხა _ ის საარჩევნო უბანზე არ დაგვხვდა, საარჩევნო სიებიც მეორე სართულზე იყო ატანილი.
"ქართულ ოცნებაში" ეჭვობენ, რომ პენსიების დარიგება მხოლოდ მიზეზია და არ გამორიცხავენ, რომ ადგილი ამომრჩეველთა მოსყიდვას ჰქონდა.
კოალიციის წარმომადგენლები ამ საკითხზე დეტალურ ახსნა-განმარტებას და მომხდარის გამოძიებას ითხოვენ.
ჩოხატაურის საოლქო კომისიის თავმჯდომარეს, თემურ კუტუბიძეს ეს ფაქტი პრობლემად არ მიაჩნია: _ მოადგილე კი არ არიგებდა ფულს, ბანკის ოპერატორი, გამსვლელი ოპერატორი არიგებდა. ადამიანი, რომელიც ყოველთვის არიგებდა ფულს.
_ თუმცა, ის ქალბატონი, ამავდროულად, საუბნო საარჩევნო კომისიის თავმჯდომარის მოადგილეა.
_ მერე რა, კაცო?! კომისიის თავმჯდომარის მოადგილე თუა, ეს არ მაქვს დაზუსტებული მე (არადა, კუტუბიძის მიერ მოწოდებულ ოფიციალურ დოკუმენტში გარკვევით წერია, რომ ზემო ფარცხმაში კომისიის თავმჯდომარის მოადგილე ნონა ცინცაძეა. ნ. გ.). ჯერ ერთი, რომ იყოს, რა პრობლემაა. ხომ იცით, რომ მანდ ცამეტივე წევრი ყოველდღე არ არის და ერთმანეთს ენაცვლებიან. საკუთარ მოვალეობას თუ ასრულებს, პრობლემაა რამეში?
_ სარჩევნო სიებს ფონზე ფულის დარიგება პრობლემა არ არის?
_ საარჩევნო კომისია ზის მეორე სართულზე და ეგ ხდებოდა პირველ სართულზე.
_ კადრები გვაქვს, სადაც ამ თანხის დარიგება საარჩევნო სიების ფონზე ხდებოდა.
_ საარჩევნო სიები პირველ სართულზე იმიტომ არის, რომ ეს საჯაროა და ყველამ უნდა ნახოს.
_ უკვე აღარ არის… მეორე სართულზე აიტანეს…
_ კარგია, თუ აიტანეს. თქვენ თავზე აიღეთ (?!) და ვინც პრეტენზია გამოთქვა იმან აიღოს პასუხისმგებლობა მის თავზე, რომ გაჭირვებულს და მოხუცს მოუწევს მეორე სართულზე ასვლა.
_ ბატონო თემურ, რატომ არის საუბნო საარჩევნო კომისია ადმინისტრაციულ შენობაში განთავსებული, როცა იქ რამდენიმე ალტერნატიული ფართი არსებობს?
_ არ არის ალტერნატიული ფართი. მე ასეთი ინფორმაცია მაქვს, რომ უნდა იყოს იქ.
_ ვინ მოგაწოდათ ეს ინფორმაცია?
_ გარედან ხედავთ, რომ ლამაზია. შიგნით ნახეთ, რა ხდება.
_ დაზუსტებულს და გადამოწმებულს გეტყვით, რომ იქვე არის კლუბის შენობა, რომლის გარემონტებაზე თითქმის 50 000 ლარია დახარჯული…
_ არ მცალია, ბოდიშს გიხდით, _ ასეთია საოლქოს თავმჯდომარის ახსნა-განმარტება ფაქტზე, რომელსაც ბევრი კითხვითი ნიშანი ახლავს.
