ის ამავე საოლქო საარჩევნო კომისიის თავმჯდომარის თინა ბანცურის მიერ შედგენილი ( ქრისტეფორე ჯანგირაშვილის, ზაზა კახურაშვილის, გოჩა ნათაძისა და გოჩა წიკლაურის მიმართ) ადმინისტრაციული სამართალდარღვევათა ოქმების ბათილობას მოითხოვდა; ვინაიდან ოქმების შესახებ მსჯელობა და გადაწყვეტილების მიღება სასამართლოს უფლებამოსილებაა, კომისიამ განუხილველი დატოვა საჩივრები და თანდართულ მასალებთან ერთად უკან დაუბრუნდება მომჩივან მხარეს წარდგენიდან 5 დღის ვადაში.
ცსკო-მ მიიღო განკარგულება, რომელშიც ვკითხულობთ: „სხდომაზე „საქართველოს პარლამენტის 2012 წლის 1 ოქტომბრის არჩევნებისათვის საქართველოს ცენტრალური საარჩევნო კომისიის წამომადგენლების დანიშვნისა და მათი უფლებამოსილების განსაზღვრის თაობაზე“ განკარგულებაში ცვლილებები შევიდა; კერძოდ, №47 მესტიის საარჩევნო ოლქში ცესკოს წარმომადგენელს, არჩილ სოფრომაძეს უფლებამოსილება შეუწყდა.“
„გურია ნიუსი“ არჩილ სოფრომაძეს იმის გასარკვევად დაუკავშირდა, რა იყო მისი უფლებამოსილების შეწყვეტის მიზეზი. მან ჩვენს სატელეფონო ზარს უპასუხა, თუმცა, კითხვის დასმის შემდეგ განაცხადა, _ მე მგონი, ნომერი შეგეშალათო.
არჩილ სოფრომაძე ის ადამიანია, რომელმაც ნინა ხატისკაცის მეუღლის, კახა ჟორჟოლიანის წინააღმდეგ, პოლიციას ჩვენება მისცა.
როგორც სასამართლოზე გაირკვა, ყველა ის ადამიანი, რომლებმაც ახსნა-განმარტება დაწერეს პოლიციასთან იმის შესახებ, რომ ჟორჟოლიანმა კომისიის სხდომაზე იკამათა, “ნაციონალური მოძრაობის” წარმომადგენლები არიან.
კახა ჟორჟოლიანის ადვოკატმა, მოსამართლე კეკენაძეს განუმარტა, რომ “სოფრომაძეს არ აქვს უფლება, იმყოფებოდეს საარჩევნო ოლქში სხდომებზე, რადგან მისი სტატუსი უცნობია. ადვოკატის განმარტებით, სოფრომაძე აშინებს მესტიის პოლიციას, გამგებელს, ყველას ხელებს უბრახუნებს მაგიდაზე. მესტიაში, ხელისუფლების წარმომადგენლებს, ყველას ეშინია მისი. რასაც იტყვის სოფრომაძე, ყველა იმას აკეთებს”
მოსამართლე კეკენაძემ ჟორჟოლიანს უთხრა: “დავიჯერო, თბილისიდან ჩამოსული სოფრომაძე მესტიაში ხალხს აშინებს?”
კახა ჟორჟოლიანის სასამართლო პროცესს მესტიიდან ჩამოსული ხალხი და სასულიერო პირები ესწრებოდნენ.
კახა ჟორჟოლიანმა, როდესაც ბადრაგს ციხეში გადაჰყავდა, ჟურნალისტების კითხვაზე, რას უკავშირებდა მის დაკავებას, განაცხადა: “პოლიტიკას, რადგან იციან, რომ მესტიაში მათ არავინ მისცემს ხმას.” კახა ჟორჟოლიანს ადმინისტრაციული სამართალდარღვევის მუხლით, ორმოცდღიანი პატიმრობა შეეფარდა.
