ამომრჩევლის მოსყიდვით და დაშინებით გართულმა ხელისუფლებამ გზის მოსასწორებლად ვეღარ მოიცალა და არჩევნებს ჭანჭათელები გზაზე აღმართული ბარიერებით შეხვდნენ.
ჭანჭათში, რომელიც ტერიტორიულად აკეთის თემში შედის, “ნაციონალური მოძრაობა” და მისი კანდიდატი გია გოგუაძე “ქართულმა ოცნებამ” დიდი უპირატესობით დაამარცხა. ხელისუფლების უმტკივნეულოდ გადაბარების პროცესს, რომელზეც ხმამაღლა საუბრობს ოპოზიციაში გადაბარგებული დავით ბაქრაძე, ადგილობრივ დონეზე სოფლის რწმუნებულები და მათი მოვალეობის შემსრულებლები ხელს უშლიან _ მათ ქმედებები აშკარად, საბოტაჟის მოწყობის და სახელმწიფო სტრუქტურების პარალიზების სურვილითაა განპირობებული. ამით მოქმედი ჩინოვნიკები, საკუთარი მოსახლეობის დასჯას ცდილობენ არჩევნებისას გამოხატული უნდობლობის გამო.
როგორც ჭანჭათელები ამბობენ, სოფლის რწმუნებულის მოვალეობის შემსრულებელი სოსო ბარამიძე უარს აცხადებს გზის მოსასწორებელი სამუშაოების დასრულებაზე. ჭანჭათელი გულო ჩიჩუას თქმით, რწმუნებული უარს აცხადებს გზის მოხრეშვაზე და ამბობს, რომ ეს საქმე ახალმა მთავრობამ დაასრულოს. უფრო სწორად, ხელს “ქართული ოცნებისკენ” იშვერს. თანამდებობაზე ჯერ კიდევ მყოფი რწმუნებული, რომელიც ხელფასს სახელმწიფო ბიუჯეტიდან იღებს, პრინციპულად გაურბის საკუთარი მოვალეობების შესრულებას.
ჩვენ შევეცადეთ თავად ბარამიძეს დავკავშირებოდით და უშუალოდ მისგან გაგვეგო, რა მოსაზრებით მოქმედებს კონკრეტულ სიტუაციაში, მაგრამ მისი ტელეფონი გამორთული აღმოჩნდა.
ეს შემთხვევა გამონაკლისი არაა და შეიძლება ითქვას, ტენდენციადაა ქცეული _ როგორც “ქართული ოცნების” ლანჩხუთის რაიონული ორგანიზაციის ხელმძღვანელი სოსო ბოლქვაძე ამბობს, მთელი ქალაქის მასშტაბით მიტოვებულია კეთილმოწყობის ყველა სამუშაო. თუ არჩევნების წინა დღეებში ინტენსიურად მიმდინარეობდა ქუჩების მოპირკეთების სამუშაოები, დღეს ყველა შეჩერებულია.
