5 ოქტომბერს, დიპლომატიურ კორპუსთან შეხვედრისას, კოტე კუბლაშვილმა მოსამართლის მიმართ პოლიტიკურ ზეწოლაზე ისაუბრა და განაცხადა, რომ მოსამართლე რომელთანაც „ქართული ოცნების“ წარმომადგენელს არასწორი კომუნიკაცია ჰქონდა, დაისჯება, კერძოდ მას ჯარიმა დაეკისრება.
კოტე კუბლაშვილის განცხადებით, 5 ოქტომბერს, დილით, “ქართული ოცნების” პოლიტიკური წარმომადგენელი კონკრეტულ საარჩევნო დავასთან დაკავშირებით სახლში ეწვია მოსამართლეს, რითაც მან კომუნიკაციის წესი დაარღვია.
“ჩვენ ამასთან დაკავშირებით, რა თქმა უნდა, იუსტიციის უმაღლეს საბჭოში მივიღებთ შესაბამის გადაწყვეტილებას და კონკრეტული ადამიანი მიიღებს იმ ფინანსურ ჯარიმას, რაც არის გათვალისწინებული კანონით”, – განაცხადა იუსტიციის უმაღლესი საბჭოს სხდომის დაწყებამდე კუბლაშვილმა. მან არ დაასახელა არც პოლიტიკური წარმომადგენლის და არც მოსამართლის ვინაობა, თუმცა აღნიშნა რომ ამ ფაქტს ადგილი ჰქონდა ერთ_ერთ რეგიონში.
კოტე კუბლაშვილის განცხადებას „კონსტიტუციის 42-ე“ მუხლი გამოეხმაურა და განაცხადა, რომ დაუშვებელია მსგავსი შინაარსის განცხადების გაკეთება მაშინ, როდესაც იუსტიციის უმაღლეს საბჭოს გადაწყვეტილება ჯერ არ მიუღია.
,,კონსტიტუციის 42-ე მუხლი” ეხმიანება უზენაესი სასამართლოს თავმჯდომარის განცხადებას, სადაც იგი მოსამართლის დაჯარიმებაზე საუბრობს და აღნიშნავს, რომ „…ჩვენ ამასთან დაკავშირებით იუსტიციის უმაღლეს საბჭოში შესაბამის გადაწყვეტილებას მივიღებთ და ამ ადამიანს ფინანსური ჯარიმა დაეკისრება”.
„42-ე მუხლი“ მიიჩნევს, რომ დაუშვებელია წინასწარი განცხადების გაკეთება იმ საქმის შედეგებზე, რომელზეც იუსტიციის უმაღლეს საბჭოს გადაწყვეტილება არ მიუღიია. „42-ე მუხლი“ მოუწოდებს ყველა პასუხისმგებელ პირს, გადაწყვეტილებების მიღებამდე არ გააკეთონ წინასწარი განცხადებები მოსამართლეთა მიმართ დისციპლინარული ზომების მიღების შესახებ. ორგანიზაცია მიიჩნევს, რომ ამგვარმა განცხადებებმა შესაძლოა გავლენა მოახდინოს სხვა მოსამართლეთა დამოუკიდებლობასა და მიუკერძოებლობაზე,“- ნათქვამია განცხადებაში რომელსაც არასამთავრობო ორგანიზაცია „კონსტიტუციის 42-ე“ მუხლი ავრცელებს.
5 ოქტომბერს მოსამართლესთან კომუნიკაციის წესი მეორედ დაირღვა. ინფო 9-ის ჟურნალისტმა სიღნაღის რაიონულ სასამართლოში მისული ლევან ბეჟაშვილი და ვანო პეტრიაშვილი დააფიქსირა.
„თვითმხილველთა ინფორმაციით წუხელ, ღამის 11 საათზე, “ნაციონალური მოძრაობის” მაჟორიტარი დეპუტატობის კანდიდატი ლევან ბეჟაშვილი და ცესკოს წარმომადგენელი სიღნაღის საოლქო -საარჩევნო კომისიაში -ვანო პეტრიაშვილი, სიღნაღის რაიონულ სასამართლოში მივიდნენ. სასამართლოში იმყოფებოდა მოსამართლე ირაკლი ბონდარენკოც, რომელმაც დღეს სიღნაღის საოლქო -საარჩევნო კომისიის წინააღმდეგ “ქართული ოცნების” სარჩელი უნდა განიხილოს. როგორც თვითმხილველმა, ლაშა მაზიაშვილმა განუცხადა “ინფო9”-ს, იმ მანქანასთან ახლოს , რომელშიც ლევან ბეჟაშვილი და ვანო პეტრიაშვილი ისხდნენ, სიღნაღის საკრებულოს თავმჯდომარე ზაზა ზედელაშვილის მანქანაც იდგა. საოლქო კომისიის გადაწყვეტილებით, ვაქირში განმეორებითი არჩევნები უნდა ჩატარდეს, რასაც “ქართული ოცნება” არ ეთანხმება, რადგან აცხადებს, რომ ვაქირის N5 საარჩევნო უბნის შემაჯამებელი ოქმი ყალბია და სასამართლოსგან ამ ოქმის გაუქმებას ითხოვს.“-ამ ინფორმაციას ინფო- 9 ავრცელებს.
საქართველოს კანონი საერთო სასამართლოების მოსამართლეებთან კომუნიკაციის წესის შესახებ ცალსახად ადგენს რომ: საქმის სასამართლოში შესვლის მომენტიდან ამ საქმეზე გამოტანილი სასამართლო გადაწყვეტილების კანონიერ ძალაში შესვლამდე, აკრძალულია მოსამართლესთან პროცესის მონაწილეთა, დაინტერესებულ პირთა, საჯარო მოსამსახურეთა და სახელმწიფო-პოლიტიკური თანამდებობის პირთა კომუნიკაცია, რომელიც დაკავშირებულია კონკრეტული საქმის ან საკითხის განხილვასთან ან/და საქმის სავარაუდო შედეგთან და არღვევს სასამართლოს/მოსამართლის დამოუკიდებლობის, მიუკერძოებლობისა და სასამართლო პროცესის შეჯიბრებითობის პრინციპებს.ხოლო თუ ასეთი კომუნიკაცია მაინც შედგა მოსამართლე ვალდებულია აღნიშნულის თაობაზე დაუყოვნებლივ, წერილობით შეატყობინოს სასამართლოს თავმჯდომარეს ან მის მიერ უფლებამოსილ მოსამართლეს.
კანონი ცალსახად მიუთითებს რომ კომუნიკაციის წესის დარვევის შემთხვევაში პასუხისმგებლობა ეკისრება არა მხოლოდ მოსამართლეს, არამედ იმ საჯარო პირსაც, რომელსაც მოსამართლესთან არასწორი კომუნიკაცია ჰქონდა.
დააკისრებენ თუ არა კონტროლის პალატის ყოფილ შეფს ლევან ბეჟაშვილს ფულად ჯარიმას ეს უახლოეს დღეებში გაირკვევა.
რაც შეეხება მოსამართლეს, მის მიმართ დისციპლინური პასუხისმგებლობის საკითხს იუსტიციის უმაღლესი საბჭო გადაწყვეტს.
5 ოქტომბერს უზენაესი სასამართლოს თავმჯდომარემ განაცხადა,რომ მოსამართლესთან კომუნიკაციის წესი ბოლო 4 წლის განმავლობაში არ დარღვეულა. წლების განმავლობაში არაერთი საერთაშორისო ორგანიზაცია სწორედ პოლიტიზირებულ სასამართლო სისტემაზე მიუთითებდა და საკუთარ ანგარიშებში პირდაპირ აცხადებდა,მთელ რიგ გადაწყვეტილებებში აშკარად იკვეთებოდა სასამართლოზე პროკურატურისა და აღმასრულებელი ხელისუფლების სხვადასხვა შტოების ზეწოლის ფაქტები.
