კანონმდებლობის თანახმად, თუკი პრეზიდენტის მიერ წარდგენილი მთავრობის თავმჯდომარის კანდიდატურას უმაღლესი საბჭო ორჯერ არ დაამტკიცებს, ქვეყნის პირველ პირს უფლება აქვს დაითხოვოს უმაღლესი საბჭო.
მიხეილ სააკაშვილმა აჭარის პირველი პირი და თავისი კურსელი ლევან ვარშალომიძე უმაღლეს საბჭოს 2004 წელს წარუდგინა. მას შემდეგ ვარშალომიძე უცვლელად ხელმძღვანელობს რეგიონს.
2012 წლის დეკლარაციის მიხედვით, მას საბანკო ანგარიშებზე 386 ათასი ლარი აქვს. ყოველწლიურად კი ბანკებიდან ანაბრებზე საპროცენტო სარგებელი 26 ათასი ლარი აქვს.
ამჟამად აჭარის მთავრობის თავმჯდომარის ხელფასი წლიურად 58 ათასი ლარია. ვარშალომიძეების საკუთრებაშია ბათუმში, ბარათაშვილის 20-ში მდებარე 8 საცხოვრებელი ბინა და პირველ სართულზე მდებარე კომერციული ფართი. ხელვაჩაურში კი 5000 კვადრატამდე მიწის ნაკვეთი. თუმცა, ოჯახის მთელი ქონება ლევან ვარშალომიძის ძმის ირაკლი ვარშალომიძის და მამის გურამ ვარშალომიძის სახელზეა რეგისტრირებული.
ლევან ვარშალომიძეს ერთადერთი უძრავი ქონება თბილისში კრწანისის ქუჩაზე ჰქონდა, თუმცა, დეკლარაციის მიხედვით ეს უკანასკნელი გასულ წელს 50 ათას დოლარად გაყიდა.
დეკლარაციას თუ დავეყრდნობით, ლევან ვარშალომიძეს საკუთარი ბინაც კი არ აქვს და მშობლებთან ცხოვრობს.
2003 წლამდე ვარშალომიძეების ოჯახის შემოსავალი დეკლარაციების მიხედვით, მაქსიმუმ, 3 000 ლარამდეა. ლევან ვარშალომიძე საჯარო სამსახურში 2001 წელს ჩნდება და მისი წლიური ხელფასი 890 ლარია.
ლევან ვარშალომიძეს პრეზიდენტის რჩევა დაოჯახებასთან დაკავშირებით არ გაუთვალისწინებია და დღემდე დაუოჯახებელია.
ბათუმში აქტიურად საუბრობენ აჭარის მთავრობის თავმჯდომარეობის რამდენიმე კანდიდატზე. ერთი ვერსიით აჭარის პირველ პირად შესაძლოა ბიზნესმენი ქიბარ ხალვაში დაინიშნოს.
მეორე ვერსიით, არ არის გამორიცხული, რეგიონის პირველი პირის ამპლუაში ბათუმის მაჟორიტარი დეპუტატი საქართველოს პარლამენტში მურმან დუმბაძე მოგვევლინოს. ამ უკანასკნელმა თავისი კონკურენტი გიორგი ბარამიძე თავის საარჩევნო ოლქში ორჯერ მეტი ხმით დაამარცხა და ჯამში 48 ათასი ამომრჩევლის სიმპათია დაიმსახურა.
მთავრობის თავმჯდომარეობის შესაძლო კანდიდატებში არის “ელიტ ელექტრონიქსის” მფლობელი ანზორ ქოქოლაძეც.
ვინ იქნება აჭარის მთავრობის თავმჯდომარე, ბიძინა ივანიშვილთან კონსულტაციების შემდეგ გახდება ცნობილი. ივანიშვილმა მინისტრთა კაბინეტის წარდგენის დროს განაცხადა, რომ ამ გადაწყვეტილებას ბათუმიდან ჩასული საინიციატივო ჯგუფებთან შეხვედრის შემდეგ მიიღებს.
