იმიტომ, რომ ვარ დევნილი აფხაზეთიდან, თავისიანად არ მთვლიდნენ. ჩემს თავს, ასე ვთქვათ, ჩემი დიპლომით ვუწევ პროტექციას. თუმცა, სამსახური ჩემთვის არ მოიძებნა სამი წლის განმავლობაში”, _ ამბობს ოზურგეთის მუნიციპალიტეტის სოფელ ძიმითში მცხოვრები მარინა პატიეშვილი.
_ ვარ აფხაზეთიდნ დევნილი, ვცხოვრობ სოფელ ძიმითში. სამი წელია, არა ერთი განცხადება მაქვს დაწერილი გამგეობაში _ გამგებლის მოადგილესთან ლადო ქვილორიასთან, სააღმზრდელო ცენტრის დირექტორთან მაკა ჭყონიასთან. ამდენი ხნის განმავლობაში მპირდებოდნენ სამსახურს, გამომიგზავნეს პასუხი, რომ როგორც კი გამოჩნდება ვაკანსია, დაგასაქმებთო, მაგრამ, ამდენი ხნის განმავლობაში ჩემს თვალწინ, არა ერთი ადამიანი დაასაქმეს და მე ისევ დამტოვეს. ვფიქრობ, რომ მათ ჩემი დიპლომის შეეშინდათ, იმიტომ, რომ ვინც მუშაობს საბავშვო ბაღში, სააღმზრდელო პედაგოგის დიპლომი არც ერთს არ აქვს. მე არ ვითხოვდი კონკრეტულ თანამდებობას _ სულერთი იყო ჩემთვის, ოღონდ დავესაქმებინე. დამთავრებული მაქვს ივანე ჯავახიშვილის სახელობის უნივერსიტეტი, სკოლამდელი აღზრდის ფსიქოლოგისა და პედაგოგის აღზრდის სრული კურსი. თუ კი ძიძის ადგილი იქნებოდა ან დამლაგებლის, არც ერთს არ ვთაკილობდი _ მე მჭირდებოდა დასაქმება, ჩემს შვილებს რომ ლუკმა-პური ჰქონოდათ. მეუღლე უმუშევარი მყავს, მაქვს მხოლოდ დევნილისთვის განკუთვნილი დახმარება 24 ლარი და ეგაა სულ ჩემი საარსებო წყარო. 30 სექტემბერს დაინიშნა კიდევ ერთი თანამშრომელი, ის არის გუბერნატორის ნათესავი… სადაც გინდა, იქ მიჩივლეო, მე არავის არ ვნიშნავ, ეს ყველაფერი ზევიდან მოდიოდაო, მითხრა მაკა ჭყონიამ. კიდევ ასე მითხრა მაკამ, მე შენ მაინც ჩაგჭრიდიო. ახლა ვითხოვ სამართალს, რატომ მდევნიდნენ და ხომ მაქვს უფლება, მივმართო სასამართლოს, დავიცვა ჩემი უფლებები?
გადაიხედოს ბაღებში მომუშავე ყველა თანამშრომლის ცენზები. რატომ უნდა მოხდეს ჩემი იგნორირება, მეც ხომ ამ ქვეყნის მოქალაქე ვარ, მეც ხომ უნდა ვიმუშაო ოდესღაც? არც ერთ პარტიაში არა ვარ, გაიკითხონ ესეც. როდესაც ადამიანი სიმართლეს ეძებ და ამის გამო გჩაგრავენ, ეს სამართალია? მაგათ ჩათვალეს, რომ არ მთვლიდნენ ნაციონალების მომხრედ და არც დამასაქმეს, _ ამბობს მარინა პატიეშვილი, _ ყველა არჩევნებზე “ხუთიანს” ვხაზავდი, მეგონა, რომ მეშველებოდა, მაგრამ წლები ისე გავიდა, რომ არაფერი მეშველა. ვინც კი დაინიშნა სამსახურებში, ყველა “ნაციონალური მოძრაობის” მხარდამჭერია, მე რაკი მაგათი მხარს არ ვუჭერდი, თუმცა, არ ვიყავი არც ერთი პარტიის წევრი, ამის გამო დამტოვეს უმუშევარი.
მივმართე ახალგაზრდა იურისტთა ასოციაციას და მითხრეს, არ უნდა ახლა ჩივილი, რა აზრი აქვსო? მიმართე “ქართულ ოცნებას,” დაგეხმარებიანო.
ჯერ იყო, რომ პროგრამა გამოცხადდა, დევნილები დაასაქმესო. არც მაშინ დამასაქმეს, რომ მივედი ქვილორიასთან, რად გინდა განცხადების დაწერა, შენ მართლა გჯერა, რომ დაგასაქმებენო? _ ასე მითხრა.
მარინა პატიეშვილის დედა ნანი ჭელიძე წლების განმავლობაში ოზურგეთის მუნიციპალიტეტის სოფელ ძიმითის ექიმად მუშაობდა.
_მე ახლაც ვემსახურები სოფელს. მე სოფელ ძიმითის სასწრაფო დახმარება ვიყავი, რასაც უანგაროდ ვაკეთებდი წლების განმავლობაში. იცოდნენ, რომ მე ჩემს სოფელში ძალიან დიდი გავლენა მქონდა, ისიც იცოდნენ, რომ ასეთი უსამართლობის გამო, დიდი წინააღმდეგი ვიყავი მაგათი პოლიტიკის. არჩევნების წინა დღეს ჩემს ბიჭს დაურეკა დევნილების სამსახურის სპეციალისტმა მერაბ ჭელიძემ და უთხრა, ოღონდ შენმა ოჯახმა არჩევნებზე ხუთიანი შემოხაზოს და გარანტიას ვაძლევ, 2 ოქტომბერს სამსახურს დაიწყებსო.
მე დაველაპარაკე მერაბ ჭელიძეს და ვუთხარი, თუ აქამდე შემეძლო მართლა მეფიქრა თქვენს სასარგებლოდ, ახლა აღარ გქონდეთ ჩემი იმედი, თქვენს წინააღმდეგ ვიმუშავე,-მეთქი. შეეშინდათ ამის, მე მივხვდი, მატყუებდნენ კიდევ ერთხელ, პატარა ბავშვივით. მეუბნებოდნენ, ხომ იცი, ხმა ხუთიანს რომ უნდა მისცეო, მაგრამ მაგათი ტყუილების აღარ მჯეროდა.
ჩვენ როგორც დევნილებს, ღირსეულ ადამიანებად არ მიგვიჩნევდნენ. ჩვენ არავის წინააღმდეგი არ ვართ, იმუშაონ იმათაც, მაგრამ მეც მინდა სამსახური, _ აღნიშნავს ქალბატონი ნანი ჭელიძე.
სააღმზრდელო ცენტრის პრესსამსახურის ხელმძღვანელი ხათუნა შარაძე “გურია ნიუსთან” ამბობს, რომ მენეჯერებსაც და აღმზრდელებსაც აქვთ უმაღლესი განათლება, შესაბამისი დიპლომით. ტექნიკურ თანამშრომლებს, მზარეულებს, ძიძას, დარაჯს და ა.შ. ამ პოზიციებზე მუშაობისთვის უმაღლესი განათლების არქონა არ ზღუდავთ: _ რაც შეეხება იმას, რომ ქალბატონმა მარინა პატიეშვილმა განუცხადა ქალბატონ მაკა ჭყონიას, რომ არ დაგტოვებ თანამდებობაზე და გიჩივლებო, მაკამ უპასუხა, მიჩივლეთ ქალბატონო, თუ ასე თვლით საჭიროდო. ინფორმაცია იმის შესახებ, რომ მარინა პატიეშვილმა დასაქმება ითხოვა, ამის შესახებ მაკა ჭყონია საქმის კურსში ნამდვილად იყო. იცოდა, რომ ქალბატონი მარინა დასაქმებას ითხოვდა საბავშვო ბაღში, აღმზრდელის თანამდებობაზე, _ გვითხრა შარაძემ.
ოზურგეთის მუნიციპალიტეტის გამგეობის ლტოლვითა, დევნილთა და იძულებით გადაადგილების სამსახურის მთავარი სპეციალისტი მერაბ ჭელიძე “გურია ნიუსთან” უარყოფს ქალბატონ ნანი ჭელიძის მიერ გაჟღერებულ ინფორმაციას, იმის შესახებ რომ მან დაურეკა არჩევნებში წინა დღეს და მოთხოვა ხმა “ნაციონალური მოძრაობის” მიეცათ, სანაცვლოდ კი 2 ოქტომბერს მისი შვილი მარინა პატიეშვილი სამსახურს დაიწყებდა: _არავითარი “ხუთიანის” შემოხაზვა არ მითხოვია არავისთვის, არ არის სიმართლე, _ გვითხრა მერაბ ჭელიძემ.
რაც შეეხება ახალგაზრდა იურისტებთან მარინა პატეიშვილის ურთიერთობას, მან კონსულტაციები მიიღო არა იურისტებისგან, არამედ საქართველოს დემოკრატიული განვითარების კავშირის აღმასრულებელი დირექტორის ლევან ხინთიბიძისგან, რომელიც ამ ფაქტთან დაკავშირებით ასეთ კომენტარს აკეთებს:
“კანონმდებლობა მაგ თვალსაზრისით არ ითვალისწინებს მასეთი პრეტენზიების განხილვას, რადგან ბაღების გაერთიანება _ ააიპ არის კერძო სამართლის იურიდიული პირი და ამ შემთხვევაში, თვითონ დამოუკიდებლად წყვეტს, ვის მიიღებს თანამშრომლად ბაღების გაერთიანებაში. ამ კუთხით, ეს ფაქტი საკრებულოსთან არაფერ შუაში არ არის. საჩივარი ამასთან დაკავშირებით არ იწერება, რადგან ეს არის კერძო იურიდიული პირის სუბიექტური გადაწყვეტილების მიღების საფუძველი”.
