ჩხრეკის მოტივით მათ დააზიანეს ჩვენი უძრავი ქონება, ხოლო მოგვიანებით კი გაძარცვეს. ტყაჩირში დედაჩემის სახლიდან ამოიღეს და წაიღეს 1 700 000 (ერთი მილიონ შვიდასიათასი) ევრო (როგორც ნუგზარ ბოჭორიშვილი აღნიშნავს, ეს იყო ბიზნესკომპანიონებისგან სესხით აღებული თანხა, რომლითაც ის საქართველოში ბიზნესის განვითარებას აპირებდა), ხოლო ჩემი ნათესავები: მევლუდ სვანიძე, გიორგი ჩეჩელაშვილი, ანასტასია ზაუტაშვილი და რომან მესუმიანი დააპატიმრეს (მძევლად აიყვანეს),” _ მთავარ პროკურორთან, არჩილ კბილაშვილთან კიდევ ერთი საჩივარი შევიდა.
საბერძნეთში მცხოვრები ნუგზარ ბოჭორიშვილი თავისი ლიკვიდაციის მომზადებასა მცდელობაში პოლიციის მაღალჩინოსნებს ადანაშაულებს. ის ამ ფაქტს პირდაპირ უკავშირებს მისი და მისი ნათესავების მიმართ 2010 წელს საქართველოში აღძრულ სისხლის სამართლის საქმეს, რომელიც ეხებოდა ე.წ. 220 კგ კოკაინის ტრანზიტით შემოტანას კოლუმბიიდან საქართველოში და შემდგომ ევროპის ქვეყნებში გადაზიდვას. ფოთის საქალაქო სასამართლოს 2010 წლის 3 დეკემბრის განაჩენით, ნუგზარ ბოჭორიშვილი დამნაშავედ იქნა ცნობილი ნარკოტიკულ დანაშაულში, ასევე, იარაღის შეძენა-შენახვა-ტარება-გასაღებასა და განზრახ მკვლელობის მომზადებაში. მას დაუსწრებლად შეეფარდა უვადო თავისუფლების აღკვეთა, ხოლო მასთან ერთად მსჯავრდებულ ანასტასია ზაუტაშვილს, გიორგი ჩეჩელაშვილს, რომან მესუმიანს და მევლუდ სვანიძეს 30 და 24 წლით თავისუფლების აღკვეთა განესაზღვრათ. არც ერთი მსჯავრდებული თავს დამნაშავედ არ ცნობს და როგორც ადვოკატები მიუთითებენ, მთელი სისხლის სამართლის საქმე, მხოლოდ პოლიციის მიერ ფალსიფიცირებულ მტკიცებულებებს ემყარება.
ნუგზარ ბოჭორიშვილი: “თითქმის დანამდვილებით შემიძლია მოგახსენოთ, რომ სახეზე გვაქვს კორუფციისა და ქონების მითვისების ფაქტი ქვეყნის პირველი პირისა და პოლიციის უმაღლესი პირების მიერ. ამ ოპერაციის დაწყების მომენტში მე ვიმყოფებოდი ევროპაში და მხოლოდ ამან გადამარჩინა დაკავებას. 2010 წლის 2 ივნისს, ჩემი ნათესავების დაჭერისა და 1 700 000 ევროს ხელში ჩაგდების შემდეგ, მე დამიკავშირდა ოთარ ლომინაძე სკაიპით. ოთარ ლომინაძე მაშინ გახლდათ კუდ-ის ოფიცერი და ამავე დროს ჩემი ბიძაშვილის ქმარი. ოთარის თქმით, მას კუდ-ის ხელმძღვანელობამ დაავალა ჩემთვის გადმოეცა, რომ თუ გადავიხდიდი 10 მილიონ ევროს, მათ მიერ დაწყებული სპეცოპერაცია შეჩერდებოდა და მოგვიანებით ჩემს ნათესავებს გაათავისუფლებდნენ. თუ თანახმა იქნები, გარანტიებზე მოგვიანებით დაგელაპარაკებიანო. ოთარის ხმის გარდა, მე მესმოდა კიდევ ვიღაც ადამიანების ჩურჩული ჩვენი საუბრის დროს. მე მას ვთხოვე ჩაერთო ვიდეო თვალი. პაუზის შემდეგ მან ჩართო კამერა. ერთი წამით მოვასწარი და დავინახე დათა ახალაია, რომელიც განერიდა ვიდეო თვალს, მაგრამ იოლად შევამჩნიე, რომ ის კამერის უკნიდან ანიშნებდა ოთარს, თუ რა უნდა ელაპარაკა და მისმენდა, რას ვპასუხობდი.
…მე განვუცხადე სასტიკი უარი და ვუთხარი, რომ ესეთ სიბინძურეს არასოდეს დავიბრალებ,-მეთქი. ოთარს რაღაც ანიშნეს და მან მიპასუხა “დაფიქრდი, ნუგზარ, ხომ წარმოგიდგენია, რა დაემართებათ შენი ოჯახის წევრებს, თუ ვერ შეთანხმდებითო?”
როგორც ბოჭორიშვილი აღნიშნავს თავის საჩივარში, კუდ-თან ჩაშლილი მოლაპარაკებების შემდეგ, ოფიციალურად წაუყენეს მას და მის ახლობლებს ბრალი ნარკოტიკების გადაზიდვაში და სპეციალურად 10 დღის განმავლობაში “აპიარებდნენ” ამ თემას მათი ტელევიზიების მეშვეობით, რათა ფსიქოლოგიურად მოეხდინათ მასზე ზეგავლენა: “კუდის ხელმძღვანელობამ ნახა რა, რომ დიდად არ ვეძებდი მათთან კონტაქტს, კიდევ ერთხელ დაარეკინეს ოთარ ლომინაძეს ჩემთან. ამჯერად ოდნვ შეცვლილი პირობებით და შემომთავაზეს, რომ ჯერ მოაგვარებდნენ ჩემს პრობლემას და მერე _ ჩემი ნათესავების. ოთარმა ასევე გადმომცა დათა ახალაიას მოადგილის, სოსო თოფურიძის წინადადება, რომ გადამერიცხა მათთის 3 მილიონი ევრო ანდა “ქეშად” ნაღდ ფულად გამეგზავნა მათთვის მილიონნახევარი ევრო _ ისინი ამის სანაცვლოდ მპირდებოდნენ ჩემი პრობლემის მოგვარებას და გამართლებას.
მინდა მოგახსენოთ, რომ სოსო თოფურიძე და დათა ახალაია არ მთავაზობდნენ საპროცესო შეთანხმებას. ისინი უბრალოდ ითხოვდნენ ქრთამს. პირველი ჩაშლილი მოლაპარაკების შემდეგ, ახალაიამ ნახა, რომ მე ვერ ვამხელ ვერავისთან ქრთამის მოთხოვნის ფაქტებს და ვერ ვილაპარაკებდი თუნდაც პრესასთან, თუ რას მთხოვდნენ ისინი, რადგან მუდმივად მახსენებდნენ, რომ ჩემს ნათესავებს მოკლავდნენ ციხეში,” _ წერს ბოჭორიშვილი თავის საჩივარში.
ამის შემდეგ, ნუგზარ ბოჭორიშვილმა გადაწყვიტა კუდ-ის მაღალჩინოსნების საუბარი ჩაეწერა, თუ კიდევ დაარეკინებდნენ მასთან ოთარს. ბოჭორიშვილთან კიდევ ერთხელ დარეკეს და ჩანაწერიც გაჩნდა.
ნუგზარ ბოჭორიშვილი: “ჩანაწერის გაკეთების შემდეგ მე ვინახავდი ფირს და მაინც ვიტოვებდი იმედს, რომ რაღაც შეიცვლებოდა, მაგრამ როცა დავრწმუნდი, რომ ჩემს იმედს საფუძველი არ ჰქონდა, ჩანაწერი გადავეცი ჟურნალისტებს და 2011 წლის 13 თებერვალს გადაცემა “კვირის რეპორტაჟში” გავიდა პირველი სიუჟეტი, თუ როგორ გააყალბეს საქმე პოლიციის პირველმა პირებმა, ჩამომართვეს მთელი ქონება და ფული (მათ შორის 2001 წელს ნაყიდი სახლიც კი), რისთვისაც მოიგონეს ნარკოტიკების არსებობა საერთოდ.”
2012 წლის თებერვალში ბოჭორიშვილის ადვოკატებმა სარჩელი სტრასბურგის სასამართლოში გაგზავნეს. გაგზავნამდე ცოტა ხნით ადრე, საბერძნეთის დედაქალაქ ათენში, ქუჩის ტელეფონიდან განხორციელდა რამდენიმე ზარი ბოჭორიშვილის მობილურ ტელეფონზე წინადადებით და “მეგობრული” რჩევით, თავი დაენებებინა ევროსასამართლოსთვის. ამ სატელეფონო ზარის აუდიოჩანაწერი ექსკლუზიურად სწორედ “გურია ნიუსის” ვებგვერდზე გამოქვეყნდა.
ნუგზარ ბოჭორიშვილი: “დამრეკავმა შემომთავაზა, ახლა მაინც გადამეხედა რეალობისთვის და მივსულიყავი საქართველოს საელჩოში, სადაც კომპეტენტური კაცი გამიკეთებდა “რეალურ” შეთავაზებას უკვე ყველა ჩვენგანის ადამიანის (ვინც ამ საქმით დავზარალდით) პრობლემის გადასაწყვეტად. როცა ჩემგან უარი მიიღო, კიდევ ერთხელ “მეგობრულად” მირჩია, რომ “დათა” რასაც დამპირდებოდა, ეგრე გაკეთდებოდა ყველაფერი. დავუკონკრეტე, შენ რა, ახალაიას ბიჭი ხარ,-მეთქი? ის გადავიდა მუქარის ენაზე და მითხრა, თუ გონზე არ მოხვალ, ნახავ რა დაგემართებაო.”
უკვე 21 მარტს, საბერძნეთის დედაქალაქ ათენში, დაახლოებით, საღამოს 9 საათზე, ნუგზარ ბოჭორიშვილზე შეიარაღებული თავდასხმა მოხდა _ ის საკუთარი ავტომანქანით გადაადგილდებოდა, როცა უცხო პირებმა ცეცხლსასროლი იარაღიდან რამდენჯერმე ესროლეს. ბოროტმოქმედებმა ავტომანქანა მთლიანად დაცხრილეს, ბოჭორიშვილი სიკვდილს შემთხვევით გადაურჩა. დამნაშავეები შემთხვევის ადგილიდან მიიმალნენ. საბერძნეთის პოლიციამ სისხლის სამართლის საქმე განზრახ მკვლელობის მცდელობის ფაქტზე აღძრა.
P.S. 2010 წლის 2 ივნისს ქართველმა სამართალდამცველებმა სოფელ ტყაჩირში, სათბურიდან ერთი მილიონ შვიდასი ათასი ევრო ამოიღეს. ამ რეიდს შინაგან საქმეთა სამინისტროს მაღალჩინოსნებმა და ხელისუფლების კონტროლირებადმა მედიასაშუალებებმა უპრეცედენტო მასშტაბის სპეცოპერაცია უწოდეს(?!). თავისი მოსაზრება კი იმით გაამყარეს, თითქოს, ბოლო ათწლეულის ყველაზე მასშტაბური ნარკოდანაშაული გახსნეს. ამ საქმეს რეზონანსი ნამდვილად ექნებოდა, სამართალდამცავებს ფულთან ერთად, 220 კილო კოკაინი მართლა რომ აღმოეჩინათ. როგორც ამბობენ, სპეცოპერაციას პირადად ვანო მერაბიშვილი ხელმძღვანელობდა. ამბობენ იმასაც, რომ გრანდიოზულად გატელევიზორებულ უკოკაინო სპეცოპერაციას, ქალაქ ქუთაისის კუდ-ისა და სოდ-ის უფროსების თანამდებობებიც შეეწირა, საკმარისი მტკიცებულებების ვერ შეთხზვის გამო. მიუხედავად ამისა, მიხეილ სააკაშვილმა ამ საქმეზე ბრიფინგი მოაწყო და პირდაპირ ეთერში გამოუტანა განაჩენი ბოჭორიშვილსაც და მასთან დაკავშირებულ სხვა პირებსაც. იმ დროისთვის, როცა პრეზიდენტი სააკაშვილი ნარკოკარტელსა და დანაშაულებრივ ჯგუფზე საუბრობდა, ქართველი სამართალდამცავების მიერ ამოღებული ერთადერთი მტკიცებულება, ნუგზარ ბოჭორიშვილის სათბურიდან ამოღებული ფული იყო. საქმის მასალებს, კოკაინის სახით, რაიმე სახის მტკიცებულება დღემდე არ შემატებია…
