საქართველოს გენერალური პროკურორის არჩილ კბილაშვილის თქმით, ეს იქნება ერთ-ერთი პირველი საქმე, რომელსაც პროკურატურა გახსნის.
რამდენიმე დღის წინ, გაზეთ “ქრონიკისათვის” მიცემულ ინტერვიუში, მამა ელიზბარი განაცხადა, რომ მისთვის ცნობილია ჟვანიას მკვლელობის დეტალები. უფრო დაზუსტებით, სწორედ მას ესაუბრა მოწმე და დაწვრილებით მოუყვა ყველაფერს. მამა ელიზბარის თქმით, ჟვანიას მკვლელობაში ყოფილი ჩინოვნიკი, გადაცემა “კონსილიუმის” წამყვანი ვასილ მაღლაფერიძეც არის გარეული.
მამა ელიზბარის დასახელებული მოწმე, ნათელა მოდებაძე, მამაოს თქმით, აღნიშნავს, რომ სწორედ ვასილ მაღლაფერიძემ იქირავა აღნიშნული ბინა საბურთალოზე და მასვე ჰქონდა ბინის გასაღები. შესაბამისად, მას რომ არ გაეღო ბინის კარი, ცხედრებს ვერც შეასვენებდნენ. ითქვა ისიც, რომ ჟვანია სახლიდან ვასილ მაღლაფერიძის სატელეფონო ზარის შემდეგ გამოვიდა.
ამ თემაზე ვასილ მაღლაფერიძეს კომენტარი ამ დრომდე არ გაუკეთებია. “გურია ნიუსი” პირველი მედიასაშუალებაა, რომელთანაც ჟვანიას ერთ-ერთი უახლოესი მეგობარი ამ საკითხზე საუბრობს.
_ ბატონო ვასილ, როგორც ამბობენ, ზურაბ ჟვანია თქვენი სატელეფონო ზარის შემდეგ გამოვიდა სახლიდან. ითქვა ისიც, რომ ბინა, სადაც გარდაცვლილი პრემიერი იპოვეს, თქვენ გქონდათ ნაქირავები.
_ სრული სისულელეა. კი არ ამბობენ, გუშინწინ თქვა ვიღაცამ. ახლაც არ ვიცი, ის ბინა სად არის.
_ სატელეფონო ზარზე რას იტყვით?
_ ესეც სიცრუეა. პროკურატურამ ხომ იცის ეს ყველაფერი?
ზარის ამბავი გუშინწინ დაწერეს პირველად. აქამდე არ უთქვამთ ეს სისულელე და ამით უნდათ კვალის არევა.
_ როგორ ფიქრობთ, კვალი სად გადის, ანუ ვის აწყობდა ჟვანიას მოცილება?
_ რასაც ვუყურებ, გულმოდგინედ ფარავდნენ კვალს და ავრცელებდნენ უამრავ ვერსიას. იმედი მაქვს, რომ მალე აეხდება ფარდა ყველაფერს _ ამაში დარწმუნებული ვარ.
_ კითხვაზე არ გვიპასუხეთ… შეგიძლიათ, კონკრეტული გვარები დაგვისახელოთ, ვის აწყობდა ჟვანიას მოცილება?
_ არა, ცხადია. ასეთი რამის თქმა როგორ შეიძლება გამოძიების გარეშე? ჩამდენმა ერთი ცოდვა ქნა და დამბრალებელმა _ ასიო. თუმცა, ძიება რომ არ დასრულდა, ეს ბადებს ბევრ კითხვას.
_ ახალი ხელისუფლება ამ საქმის გახსნას შეძლებს?
_ აუცილებლად უნდა გახსნას. ერთ-ერთი პირველი საქმე იქნებაო, კბილაშვილმა თქვა.
_ ჟვანიას ოჯახთან თუ გაქვს ურთიერთობა?
_ განსაკუთრებული არა. ნინოს ვხვდები იშვიათად. ოჯახთან არ ვიყავი ასე ახლოს.
_ გარდაცვალებამდე თუ გქონდა ზურასთან საუბარი, რაიმეს თუ ეჭვობდა?
_ ბოლოს დაახლოებით ერთი თვით ადრე ვნახე ცოტა ხნით და არ გვქონია ჩაძიებული საუბარი, _ გვითხრა მაღლაფერიძემ და დასძინა _ ისე, რომ გაირკვევა ყველაფერი, ამ ადამიანებს შერცხვებათ ნეტავ, ამ ტყუილებს რომ თხზავენ? ეტყობა, ამით ცხოვრობენ, ეს არის მათი შემოსავლის წყარო.
