მურაბის მოყვარულებს ვურჩევ, გააკეთონ კომშისა და დემირა ვაშლის შერეული მურაბა, რომელიც ძალიან გემრიელია და თავისებური არომატით გამოირჩევა.
ყველამ კარგად იცის კომშის სიკეთე. მხოლოდ კომშის მურაბა რომ შესანიშნავია, ესეც მოგეხსენებათ. თუმცა, კომში გურიაში უფრო იშვიათობაა, ვიდრე დემირა ვაშლი და ბაზარშიც არც თუ იაფი ღირს. ამიტომ რამდენის ყიდვის საშუალებაც გვექნება, შევიძინოთ და თანაბარი რაოდენობით შევურიოთ მხოლოდ დემირა ვაშლი, რომელიც ახლა შემოდის გურიაში, ოქტომბრის ბოლოს უკვე სიმწიფის ფაზაშია და უმეტესად ყველგან ხელმისაწვდომია.
მომზადების წესი: ავიღოთ წონით თანაბარი რაოდენობის კომში და დემირა ვაშლი. გავთალოთ. დავჭრათ საშუალო სისქის (არა თხელ) ზომებად. კილოზე კილოგრამი რაოდენობით სჭირდება შაქარიც. გათლილ მასას ცოტაოდენი შაქარი მოვაყაროთ, ავურიოთ და დავდგათ ერთი ღამით. ცალკე მოვადუღოთ სიროფი შემდეგი პროპორციებით: ორჭიქანახევარი წყალი და ერთი კილოგრამი შაქარი. გაგრილებული სიროფი დავასხათ მომზადებულ მასას, გავაჩეროთ სამიოდე საათით და შემდეგ ვადუღოთ დაბალ ცეცხლზე. დუღილის დროს, ხანდახან გადმოვდგათ და ათიოდე წუთით დავდგათ. საბოლოოდ, ჩვეულებრივი წესით, წყლიან ჭიქაში სიროფის ჩაწვეთებით, შეამოწმეთ, დასრულებულია თუ არა დუღილი. მოათავსეთ ქილებში და შეინახეთ გრილ ადგილას. გურიაში მაინც სინესტეა და თუ მოხუფვის გარეშე შეინახავთ, მურაბით პირთამდე ავსებულ ქილას, ხუფის ქვეშ დააფარეთ აფთიაქის სპირტში დამუშავებული პერგამენტის ქაღალდი.
