2013 წლის ბიუჯეტი საქართველოს პარლამენტმა 20 დეკემბერს დაამტკიცა. მომავალი წლის მთავარი ფინანსური დოკუმენტი 8 748.5 მლნ ლარს შეადგენს. ბიუჯეტის მიხედვით, ქვეყნის პრიორიტეტებია: განათლება, ჯანდაცვა და სოციალური მომსახურება, სოფლის მეურნეობა, ლტოლვილთა მდგომარეობის გაუმჯობესება, გარემოს დაცვა და ინფრასტრუქტურული პროექტები. ამ სფეროების დაფინანსებისთვის მომავალი წლის ბიუჯეტში მნიშვნელოვანი თანხებია გამოყოფილი.
საქართველოს ფინანსთა მინისტრმა ნოდარ ხადურმა მთავარი ფინანსური დოკუმენტის პარლამენტში წარდგენისას განაცხადა, რომ ბიუჯეტში კოალიცია „ქართული ოცნების“ ყველა წინა საარჩევნო დაპირებაა გაწერილი. “ადმინისტრაციული ხარჯები მაქსიმალურად შევამცირეთ და პრიორიტეტებზე მივმართეთ. წარმოდგენილი პროექტი მოსახლეობის სოციალურ კეთილდღეობაზე მაქსიმალურადაა ორიენტირებული,” – განაცხადა ფინანსთა მინისტრმა.
2013 წელს მთლიანი შიდა პროდუქტის ნომინალური ზრდა (ეკონომიკის ზრდა და დეფლატორი ერთად) მთავრობას 9,5-10 პროცენტის ფარგლებში აქვს დაანგარიშებული.
მთლიან შიდა პროდუქტთან ბიუჯეტის დეფიციტი 2.8 პროცენტზე არის გათვლილი. მიმდინარე წელს ეს მაჩვენებელი 3.5 %-ია.
ფინანსთა მინისტრის განცხადებით, საქართველოს ეკონომიკა ნომინალურ გამოხატულებაში 2013 წელს 2 მლრდ 600 ათასი ლარით გაიზრდება და დაახლოებით 29 მლრდ ლარს შეადგენს.
2013 წელს სახელმწიფო ბიუჯეტის შემოსულობების საპროგნოზო მაჩვენებელი 8 245.5 მლნ ლარია. გადასახადების საპროგნოზო მაჩვენებელი კი 6 920.0 მლნ ლარი.
გრანტების საპროგნოზო მაჩვენებელი მომავალ წელს 202.5 მლნ ლარს შეადგენს, მათ შორის საბიუჯეტო გრანტები 75 მლნ ლარია, ხოლო საინვესტიციო (ხარჯზე მიბმული) გრანტები 127.5 მლნ. ლარი.
2013 წლის სახელმწიფო ბიუჯეტის სხვა შემოსავლების საპროგნოზო მაჩვენებელი 300 მლნ ლარის ოდენობით არის განსაზრვრული.
მომავალი წლის სახელმწიფო ბიუჯეტის ასიგნებებიდან, რომელიც 8 748.5 მლნ ლარს შეადგენს, 7 971.0 მლნ ლარი საბიუჯეტო სახსრებია, გრანტები 127.5 მლნ ლარი, კრედიტები კი 650.0 მლნ ლარი.
2013 წელს დაფინანსება 15,2 მლნ ლარით უმცირდება შინაგან საქმეთა სამინისტროს, 30 მლნ ლარით კი თავდაცვის სამინისტროს. გამოთავისუფლებული 45,2 მლნ ლარით, როგორც ფინანსთა მინისტრი აცხადებს, გაიზარდა ჯანდაცვის, განათლებისა და სოფლის მეურნეობის სამინისტროების ბიუჯეტი. მომავალი წლიდან დაფინანსება ყველაზე მეტად ეროვნული უშიშროების საბჭოს შეუმცირდება.”ნაციონალური მოძრაობის” მიერ მომზადებული პირვანდელი ბიუჯეტის პროექტით უშიშროების საბჭოსთვის 21 მლნ ლარი იყო გათვალისწინებული. 2013 წლის დამტკიცებული ბიუჯეტით კი გიგა ბოკერიას უწყება 1.8 მლნ ლარს მიიღებს. მნიშვნელოვანი შემცირება შეეხო ფინანსთა სამინისტროსაც. უკვე დამტკიცებული ბიუჯეტით გათვალისწინებული თანხა, 2013 წლის პირვანდელი ბიუჯეტით გაწერილზე18.2 მლნ ლარით ნაკლებია. ასევე შემცირებულია პრეზიდენტის ადმინისტრაციისა და მთავრობის კანცელარიის დაფინანსება.
