“გორდელას” წევრი, ოზურგეთელი ქეთი კვირკველია: _ პირველ რიგში, ძალიან მიხარია, რომ ამდენი ხნის შემდეგ, როგორც იქნა, “თსუ გორდელა” წარვდგებით გურული მაყურებლის წინაშე. მე თვითონ ოზურგეთელი ვარ და ცოტა არ იყოს, ვღელავ, რადგან მასპინძლის როლი უფრო ადვილია ამ შემთხვევაში, ვიდრე სტუმრის. რაც შეეხება რეპერტუარს, ჩვენი მოღვაწეობის პერიოდში დაგვიგროვდა ძალიან ბევრი სიმღერა და კომპოზიცია. ეს ძირითადად, ქართული ფოლკლორიდან წამოსული მარგალიტებია, თუმცა, ჩვენი შესაძლებლობები გვაძლევს იმის საშუალებას, რომ არ შევიზღუდოთ და ფოლკლორის გარდა, შევასრულოთ ქალაქური სიმღერები, ასევე უცხოური ჰიტებიც (ეს უკანასკნელი, განსაკუთრებით მოსწონს მსმენელს), ეს ყველაფერი გავაორკესტროთ და მივცეთ მას მრავალხმიანობა.
ვცდილობთ, მაყურებელი კონცერტის განმავლობაში ვირტუალურად ვამოგზაუროთ საქართველოს სხვადასხვა კუთხეში.
აქვე აღვნიშნავ, რომ წელს ანსამბლს საიუბილეო წელი ჰქონდა _ 5 წელი შეგვისრულდა და ჩავატარეთ ტურნე მთელი საქართველოს მასშტაბით. სამწუხაროდ, მხოლოდ გურიაში ვერ ჩამოვედით. დიდ მადლობას ვუხდით ოზურგეთის მუნიციპალიტეტს. ასევე არ შემიძლია, არ აღვნიშნო კულტურის ცენტრის თანადგომა.
ოზურგეთის საახალწლო კონცერტისთვის განსაკუთრებით ვემზადებით, სპეციალურად ამ კონცერტისთვის გვექნება რამდენიმე სიმღერის პრემიერა. ასევე, გვაქვს სიურპრიზიც ყველაზე აქტიური და ერთგული მსმენელებისთვის, _ თქვა ჩვენთან საუბრის დროს ქეთი კვირკველიამ.
ახალი წლის ღამეს, “გორდელასთან” ერთად, ჯგუფი “ლურჯი იალქანი” გამოვა.
