გათავისუფლებულებს შორისაა რუსეთის მოქალაქე იური სტრელნიკოვი, რომელიც ე. წ. “პირველი “ენვერის” საქმეზე” ჯაშუშობის ბრალდებით დააკავეს. მან ციხეში, თითქმის 7 წელი დაჰყო და როგორც ის “გურია ნიუსთან” საუბარში ამბობს, უჭირს იმის დაჯერება, რომ თავისუფალია: “30 წელი მომისაჯეს და ჩემი ასაკის კაცს საერთოდ არ მქონდა ციხიდან ცოცხლად გასვლის იმედი. მთელი ოჯახი ჯაშუშებად გამოგვიყვანეს: მე, ჩემი შვილები, ცოლი, ჩემი ბიჭები 3 დღით ჰყავდათ დაკავებული. დღემდე ვერ ვხვდები, რას გვერჩოდნენ ან რის აღიარებას მთხოვდნენ.”
იური სტრელნიკოვი ბათუმში დაიბადა. 28 წელი პოლიციაში იმუშავა, პენსიაზე გასვლის დრო რომ მოუვიდა, საქართველო დატოვა, რადგან რუსეთში უფრო მაღალ პენსიას მიიღებდა. სტრელნიკოვების ოჯახს სწორედ ამის შემდეგ შეექმნა პრობლემები.
“მოულოდნელად დამაკავეს. არ ვიცოდი, რა საქმე იყო, რას მერჩოდნენ. საკანში რადიო გვქონდა და მოვისმინე, რომ რაღაც “ენვერის” საქმეში მდებდნენ ბრალს. ერთი თვე მეძებდა ოჯახი, ჩემს ადგილსამყოფელს არ ეუბნებოდნენ, მერე შემთხვევით მიპოვა “წითელმა ჯვარმა” და გათავისუფლებამდე ეს ორგანიზაცია მპატრონობდა,” _ ამბობს სტრელნიკოვი “გურია ნიუსთან” საუბარში.
“დემოკრატიული მოძრაობა _ ერთიანი საქართველოს” წევრი ვარ. 2009 წლის ივლისში დამაკავეს. ოფიციალურად ნარკოტიკების შეძენა-შენახვაში დამდეს ბრალი. სააკაშვილი პასუხს აგებს იმ ჯოჯოხეთისთვის, რომელიც ციხეში ჰქონდა მოწყობილი,” _ ამბობს მერაბ გორგაძე, რომელმაც ასევე დატოვა “მატროსოვის”ციხე.
“სახალხო კრების” წევრი გია სალუქვაძე მზადაა მონაწილეობა მიიღოს იმ პროცესში, რასაც სააკაშვილის მხილება ჰქვია: “წელიწადი და 8 თვე საპყრობილეში გავატარე და ძალიან მალე დავიწყებთ სააკაშვილის მხილებას. ჩვენ მას დავანახებთ, ვინ არის მოღალატე და ფარდას ავხდით ყველა იმ ფაქტს, რაც ამ კედლებში ხდებოდა. თქვენ ვერ წარმოიდგენთ, უბედურება ტრიალებდა ციხეებში, სადაც აბსოლუტურად ჯანმრთელი ადამიანები შემოდიოდნენ და ინვალიდებად რჩებოდნენ. შედით და გადაიღეთ ორთაჭალის “კრიტი”, ბათუმის ციხე, ზუგდიდის ციხე, ნახეთ, დღისით პატიმრებს როგორ ჭამენ ტარაკნები, ღამით კი _ ბაღლინჯოები; გადაიღეთ როგორ წვიმს ციხის შიგნით. ეს ყველაფერი არის მიშა სააკაშვილის “შემოქმედება,” _ ამბობს გია სალუქვაძე “გურია ნიუსთან”.
