ოზურგეთის მუნიციპალიტეტის სასპორტო სკოლის თანამშრომელი ლადო გიორგაძე და მისი მეუღლე თეა ხომერიკი, რომელიც #2 ბაღში დამხმარე თანამშრომლად მუშაობდა, გაათავისუფლეს. მათ სამი მცირეწლვანი შვილი ჰყავთ.
ლადო გიორგაძე “გურია ნიუსთან” აცხადებს, რომ მისი ოჯახი თავდასხმის ობიექტი გახდა “ნაციონალური მოძრაობის” მხრიდან.
_სპეციალობით ვარ მწვრთნელი ძალოსნობაში, მყავს სამი მცირეწლოვანი შვილი. ყველაფერი კი წინასაარჩევნო პერიოდიდან დაიწყო და ბოლოს ჩემი და ჩემი მეუღლის სამსახურიდან გათავისუფლებებით დამთავრდა. მე ახალი წლიდან გამომიშვეს, ვმუშაობდი ოზურგეთის სასპორტო სკოლაში, ჩემი მეუღლე კი, რომელიც ოზურგეთის #2 საბავშვო ბაღის თანამშრომელი იყო, პარასკევს, 11 იანვარს სამსახურიდან დაითხოვეს. ჩემი სამსახურიდან გათავისუფლების მიზეზად დამისახელეს ბიუჯეტი არ გვყოფნისო, ხოლო ჩემს მეუღლეს, ბაღების გაერთიანების ხელმძღვანელმა მაკა ჭყონიამ ასე განუცხადა ეს მოთხოვე „ნაციონალებს“ და კოტე შარაშენიძესო.
_ თქვენი აზრით რა იყო სამსახურიდან დათხოვის მიზეზი?
_ მიზეზი პოლიტიკური შეხედულებები იყო. არ გავითვალისწინე მათი მოთხოვნები, რასაც მავალებდნენ.
_ რას გავალებდნენ?
_ პირადობის მოწმობისა და ხელმოწერების შეგროვებას, აქტიურობას შეხვედრების დროს „ნაციონალური მოძრაობის“ მხარდასაჭერად აქციებზე. რა ვქნა, ვერ გამოვხატე, ვერ გავაკეთე, ვერ გავიზიარე, ვერ შევასრულე მათი მოთხოვნები და ახლა დავისაჯეთ ამის გამო? ახლა კი ყველაზე საშინელი და ფაქტი, რომელმაც სამი მცირეწლოვანის მამა შოკში ჩამაგდო, ისაა, რომ ჩემი მეუღლე სამსახურიდან გაათავისუფლეს.
_ თქვენი მეუღლის გათავისუფლების მიზეზი რა იყო?
_ სამი მცირეწლოვანი შვილის დედა, ქალბატონმა მაკა ჭყონიამ, ე.წ. ბაღების გაერთიანების დირექტორმა, რომელიც “ნაციონალური მოძრაობის” ყველაზე აქტიური მხარდამჭერი და მათი დავალებების უბადლო შემსრულებელია, ცინიკური და ამაზრზენი პასუხით გამოისტუმრა, _ ხელშეკრულებას აღარ ვაგრძელებო. რატომო რომ ჰკითხა, ეს “ნაციონალებს” და ახალ გამგებელს, შარაშენიძეს ჰკითხეო.
ჩვენი ოჯახის შემოსავალი ერთადერთი საშუალება ისაა, რომ მე ვმუშაობ არასრულ განაკვეთზე, სპორტის მასწავლებლად N1 საჯარო სკოლაში, ეს შემოსავალი სამი შვილის მამას, კომუნალურ გადასახადებს არ მიფარავს მხოლოდ.
_ წინასაარჩევნოდ არაერთხელ ვიყავი შევიწროვებული. სკოლის დირექტორმა მომთხოვა, იძულებით თავდებში ჩავდგომოდი ისეთ ადამიანს, ვისაც საერთოდ არ ვიცნობდი. ვუთხარი, რას მაიძულებ, მე ხელს არაფერზე მოვაწერ მეთქი და მიპაუხა, შენი ფეხი სკოლაში მოდგმული აღარ ვნახოო. ამით იმის თქმა მინდა, რომ ყველანაირად შევიწროებული ვარ, დღეს არანაირი საშუალება არ მაქვს ოჯახის, შვილების შენახვის. თუ მანამდე შეიძლებოდა სამსახურებში ამ ადამიანებისთვის ხელფასების გადახდა და ბიუჯეტი წვდებოდა, ახლა რატომ უშვებენ სახლში, რა მიზეზით ათავისუფლებენ ამ ადამიანებს? ესაა სამართალი? ან ათასი სისულელე ღონისძიების ჩატარება შეიძლება და ამას წვდება ბიუჯეტი? სპორტსკოლაში, ელემენტარულად, ცხვირი რომ იტკინოს ბავშვმა, მწვანე წამალი და ბამბა არ დევს და 2000 ლარს დირექტორის კაბინეტის რემონტში ხარჯავენ, ეს შეიძლება?
_ რას ითხოვთ ახლა?
უპირველესად ქალბატონი მაკა ჭყონიას სამსახურიდან გათავისუფლებას მოვითხოვ. მისი მუშაობა არ შეიძლება. ამ ქალბატონმა ბატონ რამაზ ნიკოლაიშვილს ლექსიც კი მიუძღვნა, ასეთი ადამიანი სამსახურის უფროსად უნდა მუშაობდეს? აღადგინონ ჩემი მეუღლე სამსახურში, გაუგრძელონ ხელშეკრულება.
_ მიმართეთ თუ არა გამგებელს, კოტე შარაშენიძეს?
_ მივმართე, მაგრამ მითხრა, რომ სამ თვეში ყველაფერი გამოსწორდებაო. მე ამ დაპირებას ბავშვებს სახლში ვერ მივუტან. ამ საახალწლოდ საქორწილო ბეჭედი დავაგირავე ბანკში, რომ ბავშვებისთვის ტკბილეულობა მიმეტანა.
ოზურგეთის მუნიციპალიტეტის ა.ა.ი.პ. ბაღების გაერთიანების ცენტრის დირექტორი მაკა ჭყონია “გურია ნიუსთან” აღნიშნავს, რომ ბაღებში ბევრ თანამშრომელს შეუწყდა და აღარ გაუგრძელდა ხელშეკრულება.
_ არა მარტო თეა ხომერიკი, ჩვენთან გათავისუფლდა 36 თანამშრომელი, რომელიც 2012 წელს იყო ხელშეკრულებით აყვანილი. მოხდა შემცირება,დამხმარე თანამშრომლებს ყველას შეუწყდა ხელშეკრულებები და აღარ გაუგრძელდათ.
_ ქალბატონო მაკა, თეა ხომერიკის მეუღლე გათავისუფლების მიზეზად პოლიტიკურ შეხედულებებს ასახელებს და დასძენს, რომ თქვენი პასუხი იყო ასეთი: _ ეს ჰკითხეთ „ნაციონალურ მოძრაობას“ და გამგებელსო.
_ ნამდვილად არ მითქვამს ასეთი რამ, მსგავსი ფაქტი არ ყოფილა. თქვენ შეგიძლიათ ნახოთ სხვა გათავისუფლებული თანამშრომლები, თუ გეტყვიან ასეთ რამეს. წარმოუდგენელია, მე არავისთვის ასეთი პასუხი არ მითქვამს.
_ ქალბატონო მაკა, ეს ადამიანი ითხოვს თქვენს ხელმძღავნელობიდან გათავისუფლებას, რადგან, მისი თქმით, თქვენ იყავით “ნაციონალური მოძრაობის” დავალებების ერთ-ერთი უბადლო შემსრულებელი…
_ ეს არის აბსურდული განცხადება და სრული ტყუილი. _ გვითხრა მაკა ჭყონიამ.
ამ ფაქტთან დაკავშირებით ა.ა.ი.პ. ბაღების გაერთიანების ცენტრის პრესსამსხურის ხელმძღვანელი ხათუნა შარაშე ასეთ კომენტარს აკეთებს:
_ თითოეული გათავისუფლებული ადამიანი აპელირებს პოლიტიკური ნიშნით. თუ ეს ადამიანი, თეა ხომერიკი დაასაქმეს “ნაციონალებმა”, ახლა აღმოჩნდა „ქართული ოცნების“ მხარდამჭერი? რა თქმა უნდა, სამწუხაროა, როცა სამსახურიდან გათავისუფლებენ, თუმცა მათი მხრიდან გაკეთებული განცხადებები აბსურდულია. მინდა გითხრათ, რომ ეს უკვე მეორე შემთხვევაა, როცა გეუბნებიან, რომ არიან „ქართული ოცნების“ მხარდამჭერები და გვემუქრებიან, რომ არცერთ ჩვენგანს სამსახურში არ დაგვტოვებენ, _ გვითხრა შარაძემ.
ჩვენ დავუკავშირდით ოზურგეთის მუნიციპალიტეტის სასპორტო სკოლის დირექტორს გოჩა კვირჩილაძეს.
_ 31 დეკემბერს, ჩემს თანამშრომლებს შეუწყდათ ხელშეკრულებები, მათ შორის იყო ლადო გიორგაძეც. 6 თანამშრომელს ხელშეკრულება აღარ გაუგრძელდა. ესენი არიან: მწვრთნელები, მუშაკები, ამის მიზეზი კი ბიუჯეტის შემცირება გახლავთ, _ამბობს კვირჩილაძე „გურია ნიუსთან“.
_ბატონო გოჩა, ბატონი ლადო ამბობს, რომ თქვენი კაბინეტის მოსაწყობად იხარჯება ათასობით ლარი…
_სასპორტო სკოლაში რემონტი გააკეთა გამგეობამ, ჩვენ აქ არაფერ შუაში ვართ, შეგიძლიათ ესეც მოიკითხოთ, მოიძიოთ რისი გაკეთება, რამდენი ლარი დაჯდა და როგორ, _ გვითხრა სასპორტო სკოლის დირექტორმა გოჩა კვირჩილაძემ.
“გურია ნიუსთან” ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე ამბობს, რომ ამ გათავისუფლებებთან დაკავშირებით ის არაფერ შუაშია.
_ ეს პროცესი მიმდინარეობს ჩვეულებრივად, რომელიც ჩემი დავალებით არ ხდება. მე არაფერ შუაში ვარ, სამსახურებში თანამშრომლების დანიშვნა – გათავისუფლება ხელმძღვანელების გადასაწყვეტია, – გვითხრა შარაშენიძემ
