“მინისტრმა დაგვიძახა და გვითხრა იყიდება და იყიდეთო. არ იყო დიდი ფული საჭირო და ვიყიდეთ. მერე აღარავის გვახსოვდა ამის შესახებ, მაგრამ მას შემდეგ, რაც მე ბავშვთა საავადმყოფოდან წამოვედი, ამ კომპანიას ჩავუდექი სათავეში და უკვე მოგებაზე წავედით. ჩემი მოსვლის დროს, კომპანიას ვალები ჰქონდა და იძულებული გავხდით შენობის ნაწილი გაგვეყიდა,” _ ამბობს ჟღენტი.
კომპანიას 11 დამფუძნებელი ჰყავს. მათ შორის არის კომპანიის მოქმედი დირექტორი ზურაბ ჟღენტი, რომელიც “ბათუმის დედათა და ბავშვთა საავადმყოფოს” 25 წლის განმავლობაში დირექტორობდა. კომპანიის დამფუძნებელია აჭარის ჯანდაცვის მინისტრი ნუგზარ სურმანიძეც. მას კომპანიის აქციების 10% ეკუთვნის.
“ვიტაფარმი”, ძირითადად, სამედიცინო მოწყობილობების საავადმყოფოებისათვის მიწოდებაზე მუშაობას. კომპანია რეგიონში ერთადერთია, რომელიც სამედიცინო სფეროში გამოსაყენებელი ნარკოტიკების ექსკლუზიური დისტრიბუტორია. “1500 ლარს ვუხდით არასაუწყებო დაცვას, რომ თავისი მანქანით და ჩვენი წარმომადგენლის თანხლებით ჩამოიტანოს ნარკოტიკები. მერე ამას ვინახავთ პოლიციაში, სპეციალურ ოთახში და იქედან, მოთხოვნის შესაბამისად, ვაწვდით საავადმყოფოებს,” _ ამბობს “ვიტაფარმის” დირექტორი.
კომპანიამ, 2011-12 წლებში, ბათუმის რესპუბლიკური საავადმყოფოს თითქმის ყველა მაღალფასიანი ტენდერი მოიგო. 2012 წლის 4 დეკემბერს, რესპუბლიკური საავადმყოფოს მიერ გამოცხადებული 56 400-ლარიან ტენდერში შპს “ვიტაფარმმა” შპს “თბილისი მედიკს” 99 ლარით მოუგო და დამკვეთს სამედიცინო მოწყობილობების შესყიდვა 49 900 ლარად შესთავაზა. იგივე კომპანიას “ვიტაფარმმა” ოთხ დეკემბერსვე გამოცხადებული კიდევ ერთი (330 000 ლ.) ტენდერი მოუგო. ჯამში კომპანიამ 2012 წელს 882 ათასი ლარის ღირებულების ტენდერები მოიგო. 2011 წელს კი, ნახევარი მილიონის ღირებულების ტენდერები.
“ვიტაფარმის” დირექტორის თქმით, კომპანია თანდათან ვითარდება. “აქამდე ბავშვთა საავადმყოფო, სამშობიარო სახლი და სხვა კერძო საავადმყოფოები არ ყიდულობდნენ ჩვენგან, და “ავერსისგან” ან “პსპ”-სგან ყიდულობდნენ. ახლა უკვე წამოვიდნენ თანამშრომლობაზე და თითქმის ყველა ჩვენი მომხმარებელია,” _ ამბობს იგი.
კითხვაზე, არის თუ არა ეს იმის დამსახურება, რომ კომპანიაში წილს ფლობს აჭარის ჯანდაცვის მინისტრი, ამბობს, რომ არა. “მე, ნუგზარის ოჯახით ვიცნობ 30 წელია. ახლა მინისტრად მოხდა მაგი იმიტომ, რომ მაქ რამდენი მსურველი იყო, იცი?! ერთი ოცი კაცი იყო, მგონი. მინისტრად თავისი სიწესიერით მოხვდა. ჯერ ერთი, უწესიერესი კაცია და მერე ჩვენ ეს ტენდერები და ისინი არ დაგვიწყია მაშინ, როცა ნუგზარი მოვიდა. ნუგზარი მოვიდა ახლა და ჩვენ ვმუშაობთ წელიწადნახევარია. ეს ჩვეულებრივად გრძელდება. გამორიცხულია მაქ ვინმე დაგეხმაროს,” _ ამბობს ჟღენტი.
“ჩვენ იმას ვფიქრობდით, რომ ნუგზარის კი არა, ჩვენ არ შეგვშლოდა ხელი, მაგრამ გაიკითხა-გამოიკითხა და თქვა, რომ მე დეკლარაციაშიც მაქვს ეგ მითითებულიო და არ არის პრობლემაო” (რესპონდენტის მოთხოვნით, კომენტარებს სტილის სრული დაცვით გთავაზობთ. ავტ.)
კომპანიაში წილის ფლობას ადასტურებს აჭარის ჯანდაცვის მინისტრიც. მისი თქმით, კომპანიისგან იგი შემოსავალს არ იღებს. “მე ამ კომპანიაში კი მაქვს წილი, მაგრამ ჯერ არ მიმიღია არანაირი სარგებელი. კაპიტალი დავაბანდე მომავალში. ამ წილს მე მინისტრობის დროს არ ვფლობ, მანამდე მქონდა და კანონით არ იკრძალება წილის ფლობა,” – ამბობს ჯანდაცვის მინისტრი.
ნუგზარ სურმანიძე “ვიტაფარმის” მიერ ტედერებში ხშირად გამარჯვებაზე ამბობს, რომ მას არ აქვს არც კომპეტენცია და არც სხვა საშუალება, რომ ელექტრონულ ტენდერზე გავლენა მოახდინოს _ ამას, უბრალოდ, არც გააკეთებს.
იურისტების განმარტებით, საჯარო მოხელეს წილის ფლობის უფლება აქვს და ეს სამართლებრივ დარღვევას არ წარმოადგენს, თუმცა, ეს უფრო პოლიტიკური საკითხია ვიდრე სამართლებრივი, რადგან კომპანია, იმავე უწყების ტენდერებს ხშირად იგებს, რომელსაც წილის მფლობელი განაგებს.
“ვიტაფარმმა”, ჯანდაცვის ახალი მინისტრის თანამდებობაზე დანიშვნის შემდეგ, უფრო მეტი ტენდერი მოიგო. იგი ქალაქის კერძო საავადმყოფოების ძირითადი მიმწოდებელი გახდა. კომპანიამ მოიგო “ბათუმის ინფექციური პათოლოგიის, შიდსის და ტუბერკულოზის რეგიონალური ცენტრის” 2013 წლის იანვარში გამოცხადებული ტენდერიც; ასევე, “თბილისის სახელმწიფო სამედიცინო უნივერსიტეტისათვის” ფარმაცევტული პროდუქტების მიწოდების ტენდერი; ნოემბერში კი “ტუბერკულოზისა და ფილტვების დაავადებათა ეროვნული ცენტრის” ტენდერი.
