მთავრობაში ამბობენ, რომ ეს სასაჩუქრე პაკეტებისათვის იყიდეს. რა იყიდეს და რის ყიდვას აპირებენ მთავრობაში, ამას შესახებ “გურია ნიუსი” ოფიციალური დოკუმენტების მიხედვით გაგაცნობთ.
ვარშალომიძის მთავრობამ გასულ წელს ავტომობილის “ჰიუნდაი” 45 000 ლარად შეიძინა. ასევე, შეიძინეს 3 ცალი მობილური ტელეფონი და მასში 2 220 ლარი გადაიხადეს. ახალ მთავრობაში ამბობენ, რომ ჯერ მობილურები არ შეუძენიათ, რადგან წინამორბედებისაგან გადმოეცათ. “მე მაქვს ის ტელეფონი, რომელიც ჩემი წინარმორბედისგან გადმომეცა. კარგ ფორმაშია და, შესაბამისად, არ მიყიდია,” _ ამბობს აჭარის მთავრობის აპარატის ხელმძღვანელი ირაკლი ჭეიშვილი. მობილური ტელეფონის გამოცვლას საჭიროებს მთავრობის იურიდიული სამსახურის ხელმძღვანელი პარმენ ჯალაღონია, თუმცა, ჯერჯერობით ტენდერი არ გამოცხადებულა. მობილური ტელეფონების შეძენისათვის 2013 წლის შესყიდვებში 10 ათასი ლარია გამოყოფილი. ამ მოცულობის თანხები იყო გამოყოფილი წინა წლებშიც, “თუმცა აუცილებელი არ არის 10 ათასივე მობილურებში დავხარჯოთ, შეიძლება უფრო ნაკლები თანხა დაიხარჯოს, მაგრამ შესყიდვებში აუცილებელია დაიწეროს მიახლოებითი თანხა,” _ ამბობს ჭეიშვილი.
ოფიციალური დოკუმენტების მიხედვით ირკვევა, რომ მთავრობის აპარატის შენობისთვის შეძენილ იქნა ფარდები, რომელიც ბიუჯეტს 106 ათას ლარზე მეტი დაუჯდა. შესყიდვა შპს “ინტექსში” განხორციელდა. მხოლოდ ფარდები შენობაში კომფორტს ვერ შექმნიდა და “აუცილებელი” გახდა ავეჯის შეცვლაც. “რანდისაგან” საოფისე ავეჯი 135 ათასი ლარად შეიძინეს, ხოლო საოფისე ინვენტარი 301 ათასი ლარზე მეტი დაჯდა. წინა ხელისუფლებას კომფორტი რომ უყვარს, ისიც მოწმობს, რომ 750 ლარი დაჯდა ბილიარდის მაგიდის რესტავრაცია. დიდი თანხა არ არის, თუმცა, შესყიდვიდან ჩანს, რომ აჭარის მთავრობაში საჯარო მოხელეთა გართობისთვის ბილიარდიც არის!
1 ნოემბრის შემდეგ, ანუ როცა უმაღლესმა საბჭომ მთავრობის ახალი თავმჯდომარის უფლებამოსილება ცნო, პირველი შესყიდვაც გამოჩნდა _ რამდენადაც სასაცილო არ უნდა იყოს, პირველად ახალ მთავრობამ “ახალ ნათებაში” 500 ცალი ნათურა შეიძინა. გასაკვირი არცაა _ წინა მთავრობისაგან მემკვიდრეობით დატოვებულ კომფორტს, მხოლოდ კარგი განათება და დანახვა სჭირდება.
2013 წლის შესყიდვების გეგმიდან ირკვევა, რომ ახალი ხელისუფლებამ შესყიდვებში გაზარდა “სასმელების, თამბაქოს და მონათესავე პროდუქტების” და “ყავის, ჩაის და მონათესავე პროდუქტების” შეძენის, თანხები. ასევე, დაემატა ახალი მუხლი, რომელიც გასული წლის შესყიდვებში არ იყო _ “სამკაულები, საათები და მონათესავე პროდუქტები”, რომლისთვისაც 90 000 ლარი განისაზღვრა.
მიმდინარე წელს, საოფისე ავეჯის შესყიდვის მოცულობა თითქმის ნახევარი მილიონით შემცირდა. 2013 წელს არ არის გათვალისწინებული ახალი ავტომანქანების შეძენა. შემცირება შეეხო რესტორნებში სტუმართა დაპატიჟებისათვის გამოყოფილ თანხებს. ეს მუხლი 100 ათასი ლარით შემცირდა.
ჯამში, 2012 წლისგან განსხვავებით, 2013 წელს აჭარის მთავრობის აპარატი ბიუჯეტს უფრო ეკონომიურად გამოიყენებს. გასულ წელს, აპარატის შესყიდვების მოცულობა 5 მილიონ 200 ათასი ლარით განისაზღვრებოდა, ხოლო წელს იგი მილიონ 252 მილიონამდე ჩამოვიდა.
ახალი ხელისუფლება შემოჭერილი ქამრებითა და ეკონომიური ხარჯვით ვერ გაგვაკვირვებს. ყველას გვახსოვს ხელმომჭირნე მამასახლისები და ჭამაში მოსული მადა. რამდენად ეკონომიური მხარჯველია რეგიონის ახალი მთავრობა მარტში, პირველი კვარტლის ანგარიშში გამოჩნდება.
