მისივე ვარაუდით, აქ რაღაც გარიგებას უნდა ჰქონოდა ადგილი. მაშინ კვერღელიძემ “გურია ნიუსთან” საუბრისას განაცხადა, რომ მამეშვილს აძლევს დროს, 24 საათს, გადადგას საჭირო ნაბიჯი, რაშიც, მისივე თქმით გადადგომა იგულისხმა.
ჩვენ, შევხვდით დიმიტრი კვერღელიძეს და ვთხოვეთ, განემარტა, რა მოხდა 24 საათის გასვლის შემდეგ.
“მას ჯერ კიდევ აქვს დრო, 24 საათი, რომ მიიღოს ადეკვატური გადაწყვეტილება”, _ ამბობდა მაშინ, საკრებულოს სხდომის დამთავრების შემდეგ, დეპუტატი.
რას ამბობს ახლა დიმიტრი კვერღელიძე: _ ჩემს მიერ დასახელებულ ფაქტში მე ვგულისხმობდი კონკრეტულად ერთ-ერთ ინდმეწარმეს, რომელმაც შეასრულა გარკვეული სამუშაო, ჯერ გადარიცხეს თანხა და შემდეგ შვებულებაში მყოფ საკრებულოს თავმჯდომარეს ხელი მოაწერინეს დეკემბრის თარიღით. ყოველივე ეს, წესისამებრ ასე უნდა ხდებოდეს, _ ნებისმიერ სუბიექტს, რომელიც ასრულებს გარკვეულ სამუშაოს, მასთან ჯერ ხელშეკრულება უნდა გაფორმდეს და შემდეგ გადაირიცხოს თანხა. ჩემს მიერ დასახელებულ ფაქტში კი პირიქით მოხდა, რაც პირდაპირ სისხლის სამართლის დანაშაულია. მე მაქვს ამის გონივრული ეჭვი. ჯერჯერობით, ვიცავ უდანაშაულობის პრეზუმციას.
_ თქვენგან ნათქვამს ულტიმატუმის სახე ჰქონდა. ახლა როცა 24 საათი და მეტია გასული, მამეშვილი არც გადადგა და საერთოდ არანაირ განცხადებას არ აკეთებს, რის გაკეთებას გეგმავთ თქვენ?
_ ჯერ მე თვითონ დავინტერესდები ამ საკითხით და არ მგონია, ჩემთან ერთად სხვა სტრუქტურებიც არ დაინტერესდნენ. ჯერ კიდევ ერთხელ ვიკავებ თავს და ვიცავ უდანაშაულობის პრეზუმციას.
_თქვენი აზრით, სამართალდამცავები დაინტერესდებიან, მამეშვილმა მართლა ჩაიდინა თუ არა, როგორც თქვენ ეჭვობთ, სისხლის სამართლის დანაშაული?
_ დიახ, უნდა დაინტერესდნენ, ჩემი აზრით. რა თქმა უნდა, ამ სახის დანაშაულია, თუ დამტკიცდა.
_ ასეთ ეჭვს რომ გამოთქვამთ, გაქვთ სრული საფუძველი?
_ ალბათ, მაქვს.
_ ბატონო დიმიტრი, თუ შეგიძლიათ, დაგვისახელოთ იმ ინდმეწარმის სახელი და გვარი, ვისაც “რაღაც ქაღალდზე” გამგებელმა ხელი მოუწერა ძველი რიცხვით?
_ ჯერ თავს ვიკავებ, მალე კი დავასახელებ ინდმეწარმესაც, თანხის რაოდენობასაც და მთლიანად ფაქტს, რაც მოხდა.
_ თქვენ ამბობთ, რომ საკრებულოს დეპუტატს, ლევან ნინიძეს ოზურგეთის მუნიციპალიტეტის საკრებულოს თავმჯდომარეობა სურს და კონკურენტად მიიჩნიეთ. რა გაძლევთ ამის თქმის საფუძველს?
_ თვითონ ამბობს, დადის ყველგან, საკრებულოს თითოეულ დეპუტატთან. ამასთანავე, ჩემი გამოსვლის დროს ცდილობს ამ გამოსვლის ჩაშლას. მე ამ საქციელს თვითლუსტრაციას დავარქმევ, რომ ის არანაირად არ წარმოადგენს “ქართულ ოცნებას” და დარჩა “ნაციონალების” მხარდამჭერი.
_ დანამდვილებით იცით, რომ თავმჯდომარეობა სურს?
_ ნამდვილად ვიცი და თუ ოზურგეთის საკრებულო იმას ფიქრობს, რომ არჩევანი მამეშვილსა და ნინიძეს შორის გააკეთოს, მაშინ იყოს ისევ ის მამეშვილი. მე ლევანის ქმედებებში ვხედავ არა პოლიტიკურ მოწინააღმდეგეს, არამედ კონკურენტს საკრებულოს თავმჯდომარეობისთვის ბრძოლაში.
_ თქვენ ნამდვილად გსურთ თუ არა ოზურგეთის საკრებულოს თავმჯდომარეობა?
_ დიახ, ამას არც არასდროს ვმალავდი და ვაგრძელებ ბრძოლას თავმჯდომარეობისთვის. იცით, რატომ მსურს? იმიტომ, რომ ოზურგეთის საკრებულო გახდეს ქმედუნარიანი, დამოუკიდებელი და აქედან გამომდინარე, საზოგადოებამ საკუთარ თავზე იგრძნოს, რომ ქვეყანაში ცვლილება გახორციელდა. მე ალეკო მამეშვილილს, როგორც მხოლოდ “ნაცმოძრაობის” მხარდამჭერს, ისე კი არ განვიხილავ და იმიტომ კი არ მოვუწოდებ, გადადგეს, არამედ მაინტერესებს, 1 ოქტომბრის შემდეგ, რით დაამახსოვრა საზოგადოებას თავი მამეშვილმა, რომ უხეშად რომ ვთქვათ, მისი შენახვა სამ თვეში ბიუჯეტს 15 ათასი ლარი დაუჯდა? გაგახსენებთ ერთ ფაქტს, _ 9 ოქტომბერს უმრავლესობასთან შეხვედრის დროს, მან მოღალატე უწოდა საკრებულოს ყველა იმ წევრს, რომელიც დატოვებდა “ნაცმოძრაობას” და “ოცნებას” შეუერთდებოდა. მან ასევე ვერ მოახერხა გამგებლის დანიშვნა კანონის დაცვით. კიდევ ერთხელ ვაფიქსირებ ჩემს აზრს, მხარს ვუჭერდი და ვუჭერ კოტე შარაშენიძეს, თუმცა მისი დანიშვნა კანონდარღვევით მოხდა.
_ თქვენ თვითონ მხარი დაუჭირეთ მის არჩევას, მახსოვს, ხელი ასწიეთ. თუ იცოდით რომ უკანონობა იყო, ჯერ ხმა მიეცით და მერე ეწინააღმდეგებით?
_ მაშინ ეს არ ვიცოდი. მე იურისტი არ ვარ და საიდან უნდა მცოდნოდა? იურიდიულ საკითხთა კომისიას უნდა განეხილა წინასწარ და გაეცნო საკრებულოსთვის.
_ ბატონო დიმიტრი, მაინც ჩაგეკითხებით, თუ მამეშვილი არ გამოგეპასუხათ, ან თუ ასეთი ფაქტი მართლა არსებობს და გაჩუმება შემოგთავაზეს რაღაცის სანაცვლოდ, რას იზამთ?
_ მე არაფრის სანაცვლოდ არ გავჩუმდები და ეს კითხვა არ უნდა მაკადროთ. არცერთი თანამდებობის სანაცვლოდ თვალს არ დავხუჭავ, არც ახლა და არც მომავალში.
დიმიტრი კვერღელიძესთან საუბრის შემდეგ, ჩვენ არაერთხელ ვცადეთ დავკავშირებოდით საკრებულოს თავმჯდომარეს ალეკო მამეშვილს, თუმცა მან ჩვენს ზარს არცერთხელ არ უპასუხა.
რაც შეეხება საკრებულოს დეპუტატ ლევან ნინიძეს, რომელიც ახლა ფრაქცია “ქართულ ოცნებას” შეუერთდა, “გურია ნიუსთან ” ამბობს, რომ არასოდეს აზრად არ მოსვლია, გამხდარიყო საკრებულოს დეპუტატი.
_ გეტყვით პირდაპირ, დიმიტრი კვერღელიძე შემოსული არ იყო საკრებულოში, რომ იძახდა, გინდა თუ არა, საკრებულოს თავმჯდომარე უნდა გავხდეო. მას აქვს რაღაც შიშები, რომ მისი მოწინააღმდეგე ვარ.
_ რა შიშებზე საუბრობთ?
_ ის, რომ არ შეუძლია ადამიანებთან ურთიერთობა, არ იცნობს არავის, არის კონფლიქტური და საუბრობს ქადნებით.
_ ბატონო ლევან, კვერღელიძე ამბობს, რომ მამეშვილმა რაღაც დოკუმენტს ხელი ადრინდელი რიცხვით მოაწერა, რაც სისხლის სამართლის დანაშაულია და მის გადადგომას ითხოვს.
_ თუ ასეა და იცის, წავიდეს და იჩივლოს, გაარკვიოს, რა ხდება. მე არ ვიცი. შეიძლება, რაღაც გადაცდომა იყოს ან პატარა დარღვევა, მაგრამ არა მგონია, სისხლის სამართლის დანაშაული იყოს. რაც შეეხება თავმჯდომარის გადაყენების საკითხს, ეს საკრებულოს პრეროგატივაა.
