საიას ოზურგეთის ოფისის ხელმძღვანელის, თამაზ ტრაპაიძის თქმით, საჯარო სამსახურში თანამშრომელთა გათავისუფლებამ, ბოლო პერიოდში, მასშტაბური სახე მიიღო.
_ საზოგადოების ერთის ნაწილის მოსაზრებაა, რომ ჯერ კიდევ არ არის ისე ფართომასშტაბიანი გათავისუფლებები დაწყებული. ექიმის ენაზე რომ ვთქვათ, ამას ეპიდემიის სახე არ აქვს მიღებული, _ განაცხადა თამაზ ტრაპაიძემ.
მისივე თქმით, საია საჯარო სამსახურებიდან გათავისუფლების და დანიშვნის ფაქტებს თვალყურს ადევნებს და ისინი მზად არიან, მიმართვის შემთხვევაში, თუ რაიმე დარღვევას ჰქონდა ადგილი, მათი უფლებები დაიცვან.
_ სამსახურიდან დათხოვნა ან დანიშვნა კანონის ფარგლებში უნდა მოხდეს და ეს ყველაფერი კანონის დაცვით უნდა ხდებოდეს. თითოეულ გათავისუფლებაზე და დანიშვნაზე არის ძალიან ბევრი ჭორი და რთულია იმის დამტკიცება, რამდენად შეესაბამება ეს ყველაფერი სიმართლეს. თავად პიროვნება, რომლის უფლებები დაირღვა, უნდა მოდიოდეს თანამშრომლობაზე და მერე ქმედითი იქნება ნებისმიერი ადამიანისადმი დახმარება, _ თქვა შეხვედრის დროს თამაზ ტრაპაიძემ.
საიას იურისტმა ჯაბა ზერეკიძემ კი, საზოგადოებას გააცნო თუ რამდენი ადამიანი იქნა სამსახურიდან გათავისუფლებული 2012 წლის 1 ოქტომბრიდან დღემდე.
_ საზოგადოებაში არსებობს გარკვეული აზრები, ჭორები, ინფორმაცია, რომელიც მიანიშნებს, რომ საჯარო პირები სამსახურიდან თავისუფლდებიან გარკვეული ნიშნით და ხდება ზეწოლა, მაგრამ ამის დამტკიცება არის რთული. ოზურგეთის მუნიციპალიტეტის გამგეობიდან გამოვითხოვეთ საჯარო ინფორმაცია, რომლის შესაბამისად აღმოვაჩინეთ, რომ 2012 წლის 1 ოქტომბრიდან დღემდე, გნთავისუფლებული არის 25 ადამიანი, აქედან 12 ადამიანს სახელშეკრულებო ვადა გაუვიდა, ოთხის შემთხვევაში კი გარკვეული სტრუქტურული ერთეულის ლიკვიდაცია მოხდა. როგორც ირკვევა, ერთი ადამიანი გარდაიცვალა და რვა პირი გათავისუფლებული იქნა პირადი განცხადების საფუძველზე. საჯარო ინფორმაციით ისიც ირკვევა, რომ ახალდანიშნული კადრები არცერთი არ არის საკონკურსო წესით შერჩეული და ისინი მოვალეობის შემსრულებლებლად არიან დანიშნული, _ თქვა ჯაბა ზერეკიძემ.
“ახალგაზრდა პედაგოგთა კავშირის” წარმომადგენელმა ლევან მჟავანაძემ შეხვედრაზე განაცხადა, რომ მოვალეობის შემსრულებლად დანიშვნა, ერთგვარ ტენდეციად იქცა საქართველოში: – რამდენიმე დღის წინ, ინტერნეტში სტატისტიკას ვეძებდი და სკოლების დირექტორების 70% არის მოვალეობის შემსრულებლები. მარტო თვითმმართველობაში კი არ ხდებოდა მოვალეობის შემსრულებლა დანიშვნა, ეს მასობრივად იყო საქართველოში, პოლიტიზაცია ხდება, პირველ რიგში. ეს საკითხი აუცილებლად უნდა მოგვარდეს, _ გვითხრა ლევან მჟავანაძემ.
საის მიერ ორგანიზებულ ღონისძიებაზე არასამთავრობო ორგანიზაციის წარმომადგენლებმა განაცხადეს, რომ კარგი იქნება, ახალი კადრები საკონკურსო წესით თუ დაინიშნება და არ მოხდება ის, რაც იყო აქამდე.
როგორც ცნობილი გახდა, ოზურგეთში ამ ეტაპზე 8 ახალი რწმუნებული დაინიშნა. ოზურგეთის მუნიციპალიტეტის გამგეობის პრესამსახურის ხელმძღვანელის ნინო სალუქვაძის თქმით, რწმუნებულების დანიშვნა მოსახლეობის აზრთა გათვალისწინებით ხდება. იურისტების თქმით კი, მათი დანიშვნა კონკურსის გარეშე ხდება.
