ფირცხალავას . მტკიცებით, კომახიძე ბუტა რობაქიძის მკვლელობის ამსახველი ვიდეოს ყიდვას ცდილობდა, რომ შემდეგ სარფიანად გაეყიდა.
“გურია ნიუსი” შვეიცარიაში დაუკავშირდა კომახიძეს, რომელმაც ყოფილი პოლიციელის ბრალდებას აბსურდული უწოდა: “როგორ უნდა გამეყიდა ეს კადრები, ან ვისთვის უნდა მიმეყიდა, ვინ იყიდდა ჩემგან, როცა თვითონ ჰქონდათ ეგ კადრები? ეს კადრები უნდა მეყიდა და მერე მიშას მომხრეებისთვის მიმეყიდა ბუტა რობაქიძის ოჯახის წინააღმდეგ? სრული აბსურდია ან რა ჯგუფი მყავს თბილისში, საიდან მოაქვთ ასეთი აბსურდული ბრალდება?”
ჟურნალისტი ვახო კომახიძე ამბობს, რომ ფირცხალავას მიერ დღეს გავრცელებული კადრები, სავარაუდოდ, ფალსიფიცირებულია: “როგორ ფიქრობთ, ეს კადრები რომ ადრე არსებულიყო, არ გამოიყენებდნენ იმ ბიჭების წინააღმდეგ? ბუტას მეგობრების დაპატიმრება სწორედ იმის გამო ვერ მოახერხეს, რომ იარაღის არსებობას ვერ უმტკიცებდნენ. ალბათ, ამ ვიდეოს ექსპერტიზა ჩაუტარდება და მისი ავთენტურობა დამტკიცდება. დღეს უკვე არსებობს ტექნოლოგია, რომელიც მონტაჟს ან ფალსიფიკაციას აღმოაჩენს.”
ირაკლი ფირცხალავას სახელი ვახტანგ კომახიძის ორ დოკუმენტურ ფილმში ფიგურირებს. ბუტა რობაქიძის გარდა, ის საჩოგბურთო კორტებთან ჩატარებული სპეცოპერაციის მთავარი მონაწილეცაა. ჟურნალისტი ვარაუდობს, რომ ფირცხალავას მიერ მისი სახელის უარყოფით კონტექსტში გაჟღერება სწორედ ამ ფილმებით გაღიზიანებს უკავშირდება.
“ფირცხალავა არის ადამიანი, რომელიც ფიგურირებს ვაზაგაშვილის მკვლელობის საქმეშიც. ის არის დონაძის მეგობარი და გაღიზიანებულია ჩვენს მიერ გადაღებული დოკუმენტური ფილმებით. სწორედ ჩვენი ნაპოვნია ფრაზა _ “არაფერი აქვთ”, როდესაც მასალა შენელებულად გავშიფრეთ. ჩვენი მთავარი მტკიცებულება ის იყო, რომ ამ ბავშვს ტყვია მოხვედრილი ჰქონდა ხელებაწეულს, ანუ გამორიცხული იყო, რომ ის წინააღმდეგობის გაწევისას მოეკლათ,” _ ამბობს ვახტანგ კომახიძე.
ირაკლი ფირცხალავას მიერ მოპოვებული კადრები დღეს ტელეკომპანია “რუსთავი 2”-მა სრულად გაავრცელა, რის გამოც, მოგვიანებით, ბოდიში მოიხადა.
