ბიზნესმენი ვალერი შოშიაშვილი, რომელსაც გაბუნიას საადვოკატო ბიურო იცავს, იმ კონკრეტული გამომძიებლის და პროკურორის ვინაობას ასახელებს, რომლებიც მისი ბიზნესის ტერორს ეწეოდნენ. ის ორ სამართალდამცველს ასახელებს: ბექა ბასილაიას და ზაზა მალუძეს.
ვალერი შოშიაშვილის განცხადებით:“2010 წლის 10 აპრილს, ჩემს მობილურ ტელეფონზე განხორციელდა ზარი. უცნობი გამეცნო როგორც პროკურატურის თანამშრომელი ვინმე ბექა ბასილაია. მან მთხოვა სასწრაფოდ გამოვცხადებულიყავი მთავარ პროკურატურაში, რომელიც მდებარეობს გულუას მოედანთან. იქ მისვლის შემდეგ მან ამიხსნა, რომ უნდა წარმედგინა ჩემი კომპანიების საბუღალტრო დოკუმენტაცია, რისთვისაც მომცა სამი დღის ვადა. გარკვეული პერიოდის შემდეგ, ბექა ბასილაიას მოთხოვნის საფუძველზე დოკუმენტაცია გადავიტანე აუდიტის სამსახურში. აქვე მინდა აღვნიშნო, რომ არანაირი მიღება-ჩაბარების აქტი აუდისტის სამსახურს არ წარუდგენია. აუდიტის ეზოში დამხვდა ვინმე მამუკა ლაშხია და ეთერ სახოკია, მათი მითითებით, ჩემი კომპანიების საბუღალტრო დოკუმენტაცია მოვათავსეთ შენობის პირველ სართულზე შესასვლელში.”
რამდენიმე დღის შემდეგ, ვალერი შოშიაშვილი მამასთან ერთად დაიბარეს პროკურორ ზაზა მალუძის სამუშაო ოთახში და მოთხოვეს, რომ აღნიშნული ქონება, რაც კი გააჩნდა, უნდა გადაეცათ კონკრეტული პირისთვის უსასყიდლოდ. მას შემდეგ, რაც ბიზნესმენებმა განუცხადეს, რომ ყველა ქონება ბანკის სასარგებლოდ იყო დატვირთული,პროკურორმა განუცხადა, რომ ეს ფაქტი მისთვის ცნობილი იყო და ამაში ვერანაირ პრობლემას ვერ ხედავდა და ალტერნატიულ ვარიანტს გამოძებნიდა. და გამოძებნა კიდეც… ვალერი შოშიაშვილს 8 ათას ლარიანი გრემის კულტურის სახლი 700 000 ლარად აყიდინეს.
“გურია ნიუსი” დაინტერესდა, ზემოთ დასახელებული სამართალდამცველები, ბექა ბასილაია და ზაზა მალუძე კვლავ მუშაობენ თუ არა პროკურატურაში.
მთავარი პროკურატურის პრესასთან და საზოგადოებასთან ურთიერთობის სამმართველოს უფროსმა ხათუნა პაიჭაძემ გაგვიცხადა, რომ ბექა ბასილაია ნამდვილად პროკურატურაში მუშაობს გამომძიებლად.
ჩვენს კითხვაზე, _ რას მოიმოქმედებს პროკურატურა, როცა ასეთ სერიოზულ ბრალდებებს უყენებენ მათ თანამშრომელს, ხათუნა პაიჭაძემ განაცხადა, რომ სწორედ იმიტომ შეიქმნა მთავარი პროკურორის ბრძანებით 12 კაციანი სპეციალური ჯგუფი, რომ პროკურორებისა და გამომძიებლების მიმართ არსებული მსგავსი პრეტენზიები შეისწავლოს. ამის შემდეგ, ინდივიდუალურად მოხდება გადაწყვეტილების მიღება ამა თუ იმ პროკურორთან დაკავშირებით.
რაც შეეხება ზაზა მალუძეს, ჩვენი ინფორმაციით, ისიც აგრძელებს საქმიანობას, ოღონდ შინაგან საქმეთა სამინისტროში. შსს-ს პრესასთან და საზოგადოებასთან ურთიერთობის სამმართველოს ხელმძღვანელმა ნინო გიორგობიანმა აღნიშნული ინფორმაცია ჩვენთან დაადასტურა, თუმცა უარყო ის ფაქტი, რომ ზაზა მალუძე რაიმე ხელმძღვანელ თანამდებობაზე იმყოფება.
ჩვენს კითხვაზე, შეისწავლიან თუ არა ზაზა მალუძის საქმეს, ნინო გიორგობიანმა განაცხადა, რომ ამ ეტაპზე კომენტარისგან თავს შეიკავებენ.
ბიზნესმენის განცხადებით, მისი დატერორების მცდელობა ოქტომბრის არჩევნების შემდეგაც გრძელდებოდა:
“ოქტომბრის არჩევნების შემდეგ მე მივმართე ადვოკატ დიმიტრი გაბუნიას და მამუკა მდინარაძეს, რათა აღდგენილიყო სამართლიანობა და დამნაშავეები დასჯილიყვნენ. 19 ოქტომბერს მე დამიკავშირდა ბექა ბასილაია და მთხოვა შეხვედრა მთავარ პროკურატურაში, შეხვედრას ესწრებოდა პროკურორი ზაზა მალუძე, რომელმაც მითხრა, რომ 2000 ლარის გადახდის შემთხვევაში (შეიძლებოდა თანხის კიდევ უფრო შემცირება) გაფორმდებოდა საპროცესო განრიდება და დამიბრუნებდნენ ბუღალტრულ საბუთებს. მე თავი შეურაცხყოფილად ვიგრძენი და დავპირდი, რომ დამნაშავეები დაისჯებოდნენ. ბექა ბასილაიამ ამაზე მიპასუხა, რომ სამწუხაროა ახალი პოლიტიკური ხანა რომ დადგა, თორემ სხვანაირად გაგისწორდებოდიო.”
