_ გამგებელი, რამდენიმე ორშაბათია, საერთოდ არ გვხვდება, ასე შეიძლება? ასე შვრებოდა წინა ხელისუფლება, ხალხს არ ხვდებოდა საერთოდ, არ გვინდა ბატონო, ჩვენ მოადგილე და მრჩეველი, გვინდა გამგებელთან შეხვედრა! მოისმინოს ჩვენი გაჭირვების შესახებ, ამიტომ მივეცით ხმა ახალ ხელისუფლებას. ხალხზე ამის მეტად არ უნდა იზრუნონ? არაა ბიუჯეტში ფულიო, აღარაა ერთჯერადი დახმარებებიო, აბა, რისთვის გვიხაროდა და რისთვის არიან ამ კაბინეტებში, მარტო თავიანთი ხელფასისთვის? სანამ ეგ “ნაციონალები” ამ კაბინეტებში იქნებიან, ჩვენი საშველი არ იქნება. გამგებელი “ნაციონალებს” აბრალებს, მაგენი გვიშლიან ხელსო, “ნაციონალები” ამბობენ, ფული ახალ ხელისუფლებას აქვსო, მათ ხელშია მთელი ძალაუფლება და მათ უნდა დაგეხმაროთო, _ მუნიციპალიტეტის გამგებელთან შეკრებილი მოქალაქეები ჟურნალისტებს თავიანთი გაჭირვების შესახებ უყვებოდნენ.
ნატალია რამიშვილი: ამდენი ადამიანი, რამდენიმე ორშაბათია, რაც გამგებელს ველოდებით და ვერ ვნახეთ. ავადმყოფი ქმარი მყავს, სადაცაა ხელში ჩამაკვდება, ოპერაცია აქვს გასაკეთებელი, მივედი სოციალურ სამსახურში და იქ მითხრეს, ეგ ჩვენი პრობლემა არააო. რამდენი ხანი სხვის სახლში ვცხოვრობთ, რადგან სტიქიამ ძალიან დაგვაზარალა, ელემენტარულს ვითხოვთ.
მადლენა შევარდნაძე: ჩემმა მეზობლებმა, ვისაც ანალოგიური პრობლემა ჰქონდათ, აიღეს ფული და მე სამი თვეა, იგივე დახმარებას გთხოვთ, ასე მითხრეს, სანამ არ იკივლებ, მანამდე ყურადღებას არ მოგაქცევენო. მყავს 35 წლის გოგო, ავადმყოფი, არ წავალ მანამადე, სანამ არ მომიწერთ ხელს და თანხას არ გადამირიცხავენ, ყველაზე მეტი გაჭირვებული ვარ, მიკვდება ბავშვი. სოციალურმა სამსახურმა იმხელა ქულები მომცა, აზრი არ აქვს იქ მისვლას. მე რომ არ მიჭირდეს, არ მოვალ თქვენთან სათხოვნელად.
ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე “გურია ნიუსთან” ასეთ კომენტარს აკეთებს:
მოგეხსენებათ, რომ საქართველოში არის მძიმე სოციალური ფონი, ეკონომიურად ძალიან უჭირს ხალხს, გასაგებია. მაგრამ არის კატეგორია, რომლებიც პროვოცირებას ეწევიან, პირდაპირ გეუბნებით, არიან პროვოკატორები, “ნაციონალებიდან” მართულნი. ადამიანები, რომლებიც წლების მანძილზე მიჩვეულნი იყვნენ დახმარებას, იმ გაგებით, რომ შემდეგ იყენებდნენ თავიანთი პოლიტიკური მიზნების გასახორციელებლად. ჩვენ არ ვართ საქველმოქმედი ფონდი, მითხარით, სად მაქვს იმის თანხა, რომ ოპერაციები დავაფინანსო? კი ბატონო, უსახლკარობის თანხით დავეხმარებით. დაიცალა ფული ბიუჯეტში, “ნაციონალებმა” შეჭამეს. არ აქვს მუნიციპალიტეტის გამგეობას იმის საშუალება, რომ ასე ყველა მოქალაქეს ფული აძლიოს, მანახეთ ასეთი კანონი სადმე”, _მიმართა შარაშენიძემ მოქალაქეებს.
_ ბატონო კოტე, ერთჯერად დახმარებები შეწყდა? ჩვენი ინფორმაციით, ბიუჯეტში თანხა არ არის…
_არ არის ერთჯერადი თანხები, ბიუჯეტში ფული ამოწურულია, _ გვითხრა შარაშენიძემ.
ვრცელ მასალას და მოქალაქეების კომენტარებს “გურია ნიუსის” მკითხველი გაზეთში იხილავს.
