მიუხედავად იმისა, რომ მთავარი პროკურორი იუსტიციის მინისტრთან ერთად პერიოდულად ასაჯაროებს გირგვლიანის, რობაქიძის, ჟვანიას და სხვა რეზონანსული საქმეების გამოძიებასთან დაკავშირებულ სიახლეებს, ჯერჯერობით, არც ერთი მათგანი დასრულებული არ არის.
“გურია ნიუსის” კითხვაზე, რატომ გაჭიანურდა ზემოხსენებული საქმეების გამოძიება, არჩილ კბილაშვილმა განაცხადა:
“მომხმარებელი ყოველთვის მართალია. ამ შემთხვევაშიც, გარკვეული ანალოგიით, სიმართლე თქვენს მხარეზეა. არც ჩათვალოთ ეს როგორც თავის მართლება, უბრალოდ ფაქტებს აღვნიშნავ.
სანდრო გირგვლიანის საქმე: უკრაინაში მივავლინეთ გამომძიებელი, რომელმაც უკვე დაკითხა მელნიკოვი გირგვლიანის და ასევე აზარაშვილის საქმესთან დაკავშირებითაც. ეს ის საქმეა, რომელშიც დათა ახალაია იმხილება. გირგვლიანის საქმესთან დაკავშირებით ბოლოში ვართ გასული, თუკი ამ სიტყვებს _ “ახლოს ვართ, ბოლოში ვართ, მალე იქნება”, ჯერ კიდევ ფასი შერჩენია. ვფიქრობთ, რომ მაისისთვის გაცნობებთ გამოძიების პოზიციას ამ საკითხზე.
ბუტა რობაქიძის საქმე: რობაქიძის საქმეზე ჩვენ დავექვემდებარეთ იმას, რომ გვსურს, დადგინდეს ობიექტური ჭეშმარიტება და როცა ბოლო მომენტში წარმოდგენილ იქნა ის ვიდეო-ფირი, ჩვენ არ შეგვეძლო თვალი დაგვეხუჭა და გვეთქვა, რომ ეს ვიდეო-ფირი არ გვაინტერესებს. აქ არის მხოლოდ და მხოლოდ ჭეშმარიტების დადგენის სურვილი. სწორედ ამიტომ დავნიშნეთ ექსპერტიზა და ველოდებით უცხოეთიდან ამ ექსპერტიზის პასუხს. ამას რა დროც მიაქვს, ვთვლი, რომ ჩვენს ძალებს მიღმაა.
აფრასიძეების საქმე: აფრასიძეებთან დაკავშირებითაც მიმდინარეობს გამოძიება. ეცერში მივლენილი გვყავდა ჯგუფი, რომელმაც ჩაატარა საგამოძიებო მოქმედებები. რაღაცეები ამ სტადიაზეც დადგენილია, უფრო სწორად, დადგენილია მნიშვნელოვანი ნაწილი, მაგრამ იმისთვის, რომ საქმე დასრულებულად გამოვაცხადოთ, რაღაცეებია კიდევ დასადგენი.
26 მაისის საქმე: ძალიან ინტენსიურად ვიძიებთ 26 მაისის საქმეს და ვინძლო რომ 26 მაისამდე ეს საკითხიც იქნას გადაწყვეტილი და გამოძიების მიერ დადგენილი.
ზურაბ ჟვანიას საქმე: ეს არის საქმე, რომელსაც ყველაზე მეტად ესაჭიროება მშვიდი და წყნარი გამოძიება. ჩვენ ვფიქრობთ, ასეთი პირობები შევუქმნათ გამომძიებელს, რომელიც მართლაც კარგად მუშაობს, აანალიზებს ყველა შექმნილ მდგომარეობას. აქაც იკვეთება ძალიან საგულისხმო სიახლე, მაგრამ უფრო მეტი კონკრეტიკა, რას ავლენს ეს სიახლე და რას ცვლის, არ შეგვიძლია, რადგან ეს საქმეს ავნებს. გვაქვს ოპტიმიზმის საფუძველი, რომ ამ საქმეში მნიშვნელოვანი გარემოებები დავადგინოთ. საზოგადოებას მოვუწოდებთ მოთმენისკენ. სადაც ის ითმენდა 2005 წლის 3 თებერვლიდან დრტვინვით თუ უდტვინველად, რომ ეს საქმე ისე იყო წინა ხელისუფლების მიერ გახსნილად გამოცხადებული, რომ არ სჯეროდა ამის, გვადროვოს კიდევ რამდენიმე ხანი. დაგვერწმუნეთ, ჩვენზე მეტად არავის არ სურს ეს თემა გახსნილად გამოცხადდეს,” _ გვითხრა კბილაშვილმა.
