ქუთაისის საქალაქო სასამართლოში ადგილობრივი თვითმმართველობის ახალგაზრდობის, კულტურის, განათლებისა და ძეგლთა დაცვის სამსახურის უფროსის წინააღმდეგ არსებული საქმის წინამოსამზადებელი სასამართლო პროცესი შედგა. რომლის არსებითი განხილვა 7 მაისსაა ჩანიშნული. პროცესის დასრულების შემდეგ კომენტარი გააკეთა ბრალდებულის ადვოკატმა, მალხაზ ველენჯაშვილმა, რომელმაც სასმართლოზე 2 შუამდგომლობა დააყენა: მტკიცებულების დაუშვებლობის და სისხლის სამართლის დევნის შეწყვეტის თაობაზე, თუმცა სასამართლომ არცერთი მათგანი არ დააკმაყოფილა.
,,როგორ შეიძლება, მოხდეს საქმის წარმოება მაშინ, როცა ბრალდების საფუძველიც კი არ არსებობს, პროკურატურას აქვს 15 ჩვენება და არცერთ მათგანში არ მოიხსენიება თეიმურაზ ცამციშვილი. თავიდანვე დავაყენე შუამდგომლობა მტკიცებულების დაუშვებლობასთან დაკავშირებით. გაურკვეველია, ვისზე და რაზე დაიწყეს გამოძიება. როგორ შეიძლება ასეთ სასაცილო საქმეზე საერთოდ ადამიანის დაკითხვა. დაწყებული გამოძიება არის უსაფუძვლო და არასწორად არის წამოწყებული. საქმეში არ არსებობს არცერთი მტკიცებულება, არ არის დაფიქსირებული, რის საფუძველზე დაიწყოგამოძიება. პროკურორმა განაცხადა, რომ მომდევნო განხილვაზე წარმოადგენს ყველაფერს. ეს დარღვევაა! თუ რაიმე სახის მტკიცებულება გააჩნიათ, დღესვე უნდა წარმოედგინათ“, _ განაცხადა ველენჯაშვილმა
ცამციშვილი მედიასთან მოკლე კომენტარით შემოიფრაგლა და აღნიშნა:
“თბილისიდან ქუთაისამდე მანძილის დადგენას თუ საქმის არსებითი განხილვა დასჭირდებოდა, არ მეგონა. ველოდები ამ საქმის ობიექტურად დასრულებას. იმედი მაქვს, ერთხელ და სამუდამოდ, გაარკვევენ მანძილს დედაქალაქიდან ქუთაისამდე“.
დაცვის მხარის ბრალდებებს უარყოფს დასავლეთ საქართველოს საოლქო პროკურატურის განყოფილების პროკურორი, რევაზ თოფურია. მისი თქმით, გამოძიებას საკმარისი ფაქტები და მტკიცებულებები გააჩნია საქმის წარმოებისა და სისხლის სამართლის დევნის განსახორციელებლად. ამ შემთხვევაში, ჩვენ, ბრალდების მხარეს, სრული მტკიცებულება გვქონდა, რომ პასუხისგებაში მიგვეცა ეს პირი. დაცვის მხარის მიერ გაკეთებული განცხადება აბსოლუტურად დაუსაბუთებელი არის. ის ზეპირსიტყვიერად ამყარებს თავის მოსაზრებებს გარემოებებზე. ჩვენ დავასაბუთეთ ყველა ის გარემოება და შემთხვევა, რაც საჭირო იყო, რომ სასამართლოს გაეთვალისწინებინა ამ ადამიანის საქმეში. მე არ მითქვამს, რომ მტკიცებულებებს მომდევნო პროცესზე წარმოვადგენდი. ჩვენ აღვნიშნეთ, რომ, ვინაიდან მოსამზადებელი სხდომა იყო, საქმის არსებითი განხილვის დროს მოხდებოდა იმ გამოკვლევების და მტკიცებულებების განხილვა და წარდგენა, რომელთან დაკავშირებით ხდება ამ პირების მიმართ სისხლის სამართლის დევნა“, _ განაცხადა თოფურიამ “გურია ნიუსთან“ საუბრისას
დღევანდელ სასამართლო პროცესს პოლიტიკური განცხადებების გარეშე არ ჩაუვლია. “ნაციონალური მოძრაობის“ და საპარლამენტო უმცირესობის წევრი, გია თევდორაძე მომხდარს პოლიტიკურ დევნად მიიჩნევს და სასამართლო პროცესს სასაცილოდ და არასერიოზულად აფასებს.
პროკურატურა ცამციშვილს ბიუჯეტის თანხის გაფლანგვასა და სამსახურეობრივი უფლებამოსილების ბოროტად გამოყენებაში ედავება. საუბარია ქალაქის მერიასა და „შპს“-ს შორის გაფორმებულ ხელშეკრულებაზე. აღნიშნული შპს მერიისთვის მიკროავტობუსებით მომსახურებას უზრუნველყოფდა. ბრალდების მხარის განცხადებით, ხელშეკრულებების შესწავლის შედეგად დადგინდა, რომ მერიამ შპს-ს ზედმეტი თანხა გადაურიცხა. კერძოდ, საუბარია იმაზე, რომ მერიამ თბილისიდან ქუთაისამდე გასავლელად საჭირო თანხაზე მეტი გადარიცხა. ამ საქმეზე თეიმურაზ ცამციშვილის წინააღმდეგ გამოძიება სისხლის სამართლის კოდექსის 182 მუხლის „ბ“ და „გ“ მუხლებით მიმდინარეობს.
