2012 წლის განმავლობაში საგარეო საქმეთა სამინისტროს 14 ქვედანაყოფში აუდიტორული შემოწმება განხორციელდა. სამინისტროდან მოწოდებული დოკუმენტაციიდან ირკვევა, რომ რამდენიმე საელჩოში საბიუჯეტო თანხების არამიზნობრივად ხარჯვის ფაქტები გამოვლინდა.
ამერიკის შეერთებულ შტატებში საქართველოს საელჩოს შიდა აუდიტის ანგარიში თარიღდება 2012 წლის 19 ნოემბრით. ანგარიშში გამოვლენილი ფინანსური დარღვევებიდან განსაკუთრებით საინტერესო ფაქტს წარმოადგენს 2011 წელს ელჩის თემურ იაკობაშვილის მიერ გაწეული გაურკვეველი და შეუსაბამო ხარჯები. ირკვევა, რომ ელჩმა 1055.72 აშშ.დოლარი ალიასკაზე საკუთარი მეუღლისთვის ავიაბილეთის შესაძენად გადაიხადა.
2011 წლის განმავლობაში, ელჩის სარგებლობაში არსებული პლასტიკური ბარათით გაწეული ხარჯებიდან (საელჩოს ანგარიშზე გახსნილია ორი სადებეტო პლასტიკური ბარათი რომელთაგან ერთს იყენებს ელჩი), 6898,12 აშშ დოლარის ოდენობის ხარჯებზე არ არის წარმოდგენილი ხარჯების დამადასტურებელი პირველადი დოკუმენტები. ამ ხარჯების საბანკო ამონაწერის შესწავლისას გარკვეული და დადგენილი იქნა მხოლოდ 1400.82 აშშ დოლარის ოდენობის ხარჯების დანიშნულება და მათი შესაბამისობა ხარჯების საბიუჯეტო კლასიფიკაციასთან მიმართებაში. დანარჩენ 5497,3 აშშ დოლარის ხარჯებზე მიზნობრიობა დადგენილი ვერ იქნა. გამომდინარე აღნიშნულიდან, 5497,3 აშშ დოლარი ბიუჯეტის სასარგებლოდ ექვემდებარება ანაზღაურებას საგანგებო და სრულუფლებიანი ელჩის მიერ.
2013 წლის ქონებრივი დეკლარაციის მიხედვით, გასულ წელს, ელჩმა 80 556 აშშ დოლარის შემოსავალი მიიღო.მისმა მეუღლემ იანა ფრემერმა კი, რომელიც საქართველოს ატლანტიკურ საბჭოში მკვლევარის თანამდებობაზე მუშაობს – 11 250 აშშ. დოლარი.
ინფორმაციას ელჩის მიერ საბიუჯეტო თანხების არამიზნობრივად ხარჯვის შესახებ თავისუფლების განვითარების ინსტიტუტი ( IDFI) ავრცელებს.
“გურია ნიუსი” თემურ იაკობაშვილთან დაკავშირებას ცდილობს და მის კომენტარს აღნიშნულ ფაქტთან დაკავშირებით უახლოეს ხანში შემოგთავაზებთ.
