დარგის სპეციალისტებმა გამოთქვეს მოსაზრებები, რომ სხვა ქვეყნებიდან ნარჩენების შემოტანა, რასაც ითვალისწინებს აღნიშნული კანონპროექტი, ჰესების ასაშენებლად განკუთვნილი ცემენტისთვის, დაუშვებელია. გასათვალისწინებელია რადიაციული ფონი, რომელიც მძიმე ნაცრის შემოტანას შეიძლება მოჰყვეს საქართველოში.
მათ ენერგეტიკის სამინისტროს თურქული კომპანიების ლობირებაში დასდეს ბრალი, რომელიც გეგმავენ სამშენებლო მიზნებისთვის ნაცრის შემოტანას თურქეთიდან და გამოთქვეს მოსაზრება ბიზნეს ინტერესები გაიმიჯნოს ეკოლოგიური ინტერესებისგან.
კანონპროექტი გარემოს დაცვისა და ბუნებრივი რესურსების კომიტეტმა განიხილა და ჩვენ მის თავმჯდომარეს, გია ცაგარეიშვილს ვთხოვეთ კომენტარი.
_ ბატონო გია, რამდენად ეთანხმებით სპეციალისტების და არასამთავრობოების მიერ სხდომაზე წარმოდგენილ არგუმენტებს, რომლებიც ამტკიცებენ, რომ ამ კანონპროექტის მიღება არ შეიძლება?
_ არ მომწონს, რომ ჩემ კომიტეტში ბიზნეს ინტერესები იხილება, ეს არ არის ჩემი საქმე. მე მართალია ირიბად დაინტერესებული ვარ, ჩვენი საწარმოების განვითარებით, მაგრამ მთავარი ამოსავალი წერტილი ჩემთვის არის გარემოს დაცვის პრობლემები. ის საკითხები, რაც ეხება ბიზნესს, უნდა განხილულიყო დარგობრივი ეკონომიკის კომიტეტში.
_ გასაგებია, მაგრამ თქვენ თუ ხართ იმ არგუმენტების მომხრე, რაც დღევანდელ სხდომაზე გარემოს დამცველი ორგანიზაციების მხრიდან გამოითქვა?
_ ჩემთვის მისაღებია ის არგუმენტები, რასაც გარემოს დამცველები ამბობენ. საქართველოში უხვად მოიპოვება ნაცარი, ამიტომ მე უფრო მყარი არგუმენტები მჭირდება აღნიშნული კანონპროექტის მიღებისთვის, რატომ არ შეიძლება ქართული ნაცრის გამოყენება იგივე მიზნებისთვის. რად გვინდა ჩვენ ამის სხვა ქვეყნიდან შემოტანა, ჯერჯერობით ამ კითხვაზე პასუხები ვერ მივიღეთ.
_ ეს კითხვები თუ დაუსვით თავად ენერგეტიკის სამინისტროს, რომელიც არის კანონპროექტის ავტორი და ინიციატორი?
_ ეს კითხვები მუდმივად არის ბჭობის საგანი. ენერგეტიკის სამინისტროს უნდა მეტი ჰესი, მეტი ინვესტიცია, ჩვენ გვინდა, რომ ეკოლოგიური პირობები იყოს დაცული. არა ვართ მშენებლობების წინააღმდეგი, არამც და არამც! პირველი ოქტომბრიდან უკვე რამდენიმე ჰესის მშენებლობაზე გაიცა ნებართვა. ანუ სადაც არ არის საშიში, იქ ჩვენც თანახმა ვართ მშენებლობაზე. როცა საჭიროა პროექტის მოდიფიცირება, მაგალითად “დარიალჰესზე” მიდის მოლაპარაკება, რომ ინვესტორმა მაქსიმალურად დაიცვას ეკოლოგიური მოთხოვნები.
მე ენერგეტიკის მინისტრმა მითხრა, რომ ჩვენი ნაცარი არ შეესაბამება სტანდარტებს. ამიტომ, მოვითხოვეთ ლაბორატორიულად მისი შემოწმება.
_ ბატონო გია, საქართველოში გვაქვს თუ არა ლაბორატორიები, სადაც აღნიშნული მასალის კვლევა ჩატარდება?
_ არ ვიცი. გარემოს დაცვის სამინისტროს რომ არ აქვს, ეგ ვიცი. ჩვენ ჩავიბარეთ გაჩანაგებული გარემოს დაცვის სამინისტრო. გვჭირდება ლაბორატორიები, მუშაობა, იმის ანალიზი, რა შემოვიტანოთ, როგორ გავაკეთოთ და ასე შემდეგ.
_ კანონპროექტის განხილვა საკითხის უკეთ შესწავლის მიზნით გადადეთ. როდის გაიმართება მისი შემდგომი მოსმენა?
_ პარლამენტი ივლისში განაგრძობს სხდომებს და მაშინ განვიხილავთ ამ კანონპროექტსაც. თუმცა მის მიუღებლობაში ტრაგედიას ვერ ვხედავ.
