პარლამენტარი ეკა ბესელია “გურია ნიუსთან” ამბობს, რომ შეხვედრაზე უმეტეს წილად საუბარი მოახლოებულ საპრეზიდენტო არჩევნებს დაეთმო.
_ დაახლოებით ერთ კვირაში გიორგი მარგველაშვილი თანამდებობას დატოვებს და ჩვენ უკვე დავგეგმავთ კამპანიებს რეგიონებში ანუ საარჩევნო შეხვედრებს მოსახლეობასთან. ამ მხრივ, მაჟორიტარ-დეპუტატებს განსაკუთრებული მნიშვნელობა ენიჭებათ, რათა მაქსიმალური ორგანიზება მოხდეს მოსახლეობასთან შეხვედრის დროს. დრო არც ისე ბევრია და სწრაფად უნდა მოხდეს საარჩევნო შტაბების გახსნა.
_ კოალიციაში მართლა ერთი კანდიდატზე იყო მხოლოდ საუბარი?
_ არა, თავდაპირველ ეტაპზე, როდესაც მოსაზრებების ჩამოყალიბება ხდებოდა, სახელდებოდა სხვადასხვა კანდიდატი. ეს ბუნებრივია. მაგრამ როდესაც მივუახლოვდით იმ ეტაპს, როდესაც გადაწყვეტილება უნდა მიგვეღო, იქ უკვე კონკრეტულად გიორგი მარგველაშვილის ირგვლივ შეჩერდა მოსაზრებები და არც ყოფილა საწინააღმდეგო საუბარი.
_ საპრეზიდენტო არჩევნებში სამი ქალბატონი აპირებს მონაწილეობის მიღებას, კოალიციაში არ ყოფილა ქალ კანდიდატზე საუბარი?
_ ქალ კანდიდატზე არ ყოფილა საუბარი. თუმცა, სალომე ზურაბიშვილზე რაღაც ეტაპზე საუბარი იყო, როგორც ვიცი ქალბატონი სალომე ამ საკითხს იხილავდა და ეს მას არ დაუმალავს, მე პატივს ვცემ მას პიროვნულად, მისი გამოცდილებების და თვისებების გამო. რაც შეეხება ქალების სიმრავლეს კანდიდატებს შორის, ეს ცუდი არ არის.
_ ბოლო პერიოდში საუბრობენ, რომ კოალიციაში განხეთქილებაა…
_ ჩვენ საარჩევნო კამპანიას ჩავატარებთ კოალიციურ რეჟიმში. შეიძლება რამდენიმე მუნიციპალიტეტში კოალიციაში შემავალ რომელიმე პარტიას არ ჰყავდეს წარმომადგენელი, მაგრამ ეს იმას არ ნიშნავს, რომ კოალიციაში რაღაც ხდება.
_ ქალბატონო ეკა, ოზურგეთში უკვე დაიწყო საარჩევნო შეხვედრები, სადაც კოალიციაში შემავალი პარტიების (რესპუბლიკური პარტია და თავისუფალი დემოკრატები) წარმომადგენლები არ იმყოფებოდნენ. ასევე, ოზურგეთის საკრებულოს თავმჯდომარის არჩევნების დროს კოალიციის აზრი ორ ნაწილად გაიყო. ერთი ნაწილი იქ მომხდარ მოვლენებს აპროტესტებს, მეორე ნაწილი კი საარჩევნო მარათონში ჩაერთო.
_ ოზურგეთში ძალიან მწვავედ დგას თვითმმართველობის თემა და საკმაოდ პრობლემურად. საერთოდ, ცუდია გუნდის შიგნით თუ ასეთი აზრთა სხვადასხვაობაა.
არის რამდენიმე რაიონი, სადაც გარკვეული პრობლემებია თვითმმართველობებში. მე ვიტყოდი, რომ ეს არ არის მაინცდამაინც გასაკვირი. თვითმმართველობაში ბევრ ადგილას დარჩა ძველი სიტუაცია. ჩვენ ხელოვნურად ამ პროცესის დაჩქარება არ გვინდა. ზოგან 2014 წელს მოხდება თვითმმართველობებში ცვლილება და ზოგან კიდევ 2014 წლამდე, მაგრამ ეს უნდა მოხდეს ბუნებრივად. ანუ ადამიანს უნდა მოუნდეს, როგორც ხდება ხოლმე, გადმოვიდეს ახლა გამარჯვებულ პარტიაში. ხომ არიან ადამიანები, რომლებიც იცვლიან თავის პოზიციას, ზოგი მარტივად, ზოგი _ რთულად.
_ პარტიიდან გამარჯვებულ პარტიაში გადასვლის ტენდენციები გახშირდა ამ ბოლო დროს.
_ კი, ეს ტენდენცია ყველგან არის. ჩემთანაც ასე არის, მე წარმოვადგენ ქალაქ ფოთს. “ერთიანი ნაციონალური მოძრაობის” ყოფილი წევრები ახლა ცდილობენ გადმონაცვლებას კოალიცია “ქართული ოცნებაში” შემავალ რომელიმე პარტიაში, იწყება გზების მოძებნა.
_ დისკომფორტს არ გიქმნით ამ ადამიანებთან ურთიერთობა?
_ გულწრფელად რომ გითხრათ, მე მიქმნის. პოლიტიკა ისეთი რამეა, რომ გაიძულებს ხშირად საკუთარი განწყობები და ემოციები გვერდზე გადადო და მიზანშეწონილობა დააყენო წინა პლანზე. თუმცა, ჩემში ხშირად ჭარბობს მეტი გულწრფელობა და ღიაობაა, ზოგჯერ მიჭირს ამ ემოციებზე უარის თქმა. მე მიჭირს იმ ადამიანებთან ჩვეულებრივი ურთიერთობა, რომლებიც ვიცი, რომ ძალიან ცუდ რაღაცებში იყვნენ ჩართულები. რა თქმა უნდა, ყველას უნდა მისცე შანსი. ბევრ ადამიანს უდგება გულწრფელობის დრო, როდესაც იცვლის პოზიციას. მსაჯულებად არ უნდა ვიქცეთ. მე მგონი რაღაც პრინციპულობა აუცილებელია პოლიტიკაშიც, რათა ყველაფერი არ აირიოს.
_ და ბოლოს, ურეკში შემდგარ შეხვედრაზე იყო თუ არა ოზურგეთში კარვების აქციაზე საუბარი?
_ დღეს ამაზე ასე საჯაროდ არ ყოფილა საუბარი თუმცა მე ვიცი, რომ ზვიად კვაჭანტირაძეს აქვს სურვილი ამ საკითხზე ესაუბროს პრემიერს.
