ასე უპასუხა საქართველოს სასჯელაღსრულების, პრობაციისა და იურიდიული დახმარების საკითხთა მინისტრმა სოზარ სუბარმა, ევროპარლამენტის თავდაცვისა და უშიშროების ქვეკომიტეტის თავმჯდომარის არნო დანჟანის ხელმძღვანელობით დელეგაციას, რომელმაც ციხეში ვანო მერაბიშვილი მონახულების შემდეგ განაცხადა: “იმედგაცრუებულები ვართ, რომ მასთან შეხვედრის შესაძლებლობა არ ეძლევათ ოჯახის წევრებს, რაც მისთვის ძალიან რთულია. არ აქვს კომუნიკაცია გარე სამყაროსთან, თუ არ ჩავთვლით ევრო პარლამენტარების ვიზიტებს. არ ვარ დარწმუნებული, რომ წინააღმდეგობაში მოდიოდეს საქართველოს კანონმდებლობასთან, რომ ოჯახის წევრებს მასთან შეხვედრის შესაძლებლობა ჰქონდეს და სწორედ ამიტომ ვართ შეწუხებულები. ვანო მერაბიშვილმა წონაში საგრძნობლად დაიკლო. ჩვენ გვქონდა საუბარი მისი მდგომარეობის შესახებ, ჩვენთვის ეჭვგარეშეა, რომ გამოძიება უნდა დასრულდეს, ჩვენ არ ვაყენებთ ამ საკითხს, მაგრამ შეწუხებულები ვართ იმ ფაქტის გამო, რომ წინასწარი დაკავება უნდა იყოს გამონაკლისი და მე ამ კონკრეტულ შემთხვევაში არ ვარ დარწმუნებული, რომ ეს დაკავება იყო გამართლებული. ეს არ არის პოლიტიკური ვიზიტი, ჩვენ მოვინახულეთ ადამიანი, რომელიც ევრო პარლამენტს ხშირად სტუმრობდა.”
მინისტრის განცხადებით, ძიების ეტაპზე ბრალდებულის მონახულებას მკაცრად არეგულირებს კანონი და გამონაკლისების დაშვების უფლება მის უწყებას არ აქვს.
“კანონში პირდაპირ წერია, როდის, ვის აქვს მონახულების უფლება. სასჯელაღსრულების სამინისტრო ამაში ვერ ჩაერევა. ძიების ეტაპზე ამ პიროვნების მონახულებას მკაცრად არეგულირებს კანონი და გამონაკლისის დაშვების უფლება ჩვენს სამინისტროს არ აქვს.
ისედაც გაუგებარი იქნება გამონაკლისი ჩვენ ან პროკურატურამ, რომ დაუშვას. ვფიქრობ, საზოგადოება ასეთი გამონაკლისის დაშვებით კმაყოფილი არ დარჩება და ზოგადად, თანასწორობა არის ის ღირებულება, რომელსაც უნდა ეფუძნებოდეს ჩვენი ქვეყანა და ეფუძნება კიდეც.”
არნო დანჟანის განცხადებაზე _ “ვანო მერაბიშვილმა წონაში საგრძნობლად დაიკლო,” სასჯელაღსრულების მინისტრმა განაცხადა, რომ მისი ინფორმაციით, შსს ყოფილი მინისტრი და “ნაციონალური მოძრაობის” ყოფილი გენმდივანი ვანო მერაბიშვილი ვარჯიშობს და წონაში დაკლების მიზეზი სავარაუდოდ ეს არის.
“წონასთან დაკავშირებით ვერაფერს გეტყვით. მე როგორც ვიცი ვარჯიშობს და ალბათ ამის ბრალია. ყოველ შემთხვევაში საკვები მოსწონს. პრეტენზია არ აქვს. ექიმის ნახვის უფლება აქვს ნებისმიერ პატიმარს, მერაბიშვილსაც…
დღეს რომ ჯანდაცვაა ციხეებში, ასეთი არ ყოფილა არასდროს. არც საბჭოთა კავშირის პერიოდში და არც დამოუკიდებლობის მიღების შემდეგ. ჰოლანდიაზე და ნორვეგიაზე არ ვლაპარაკობ. მარტივ ციფრს გეტყვით. ვანო მერაბიშვილის დროს, როდესაც იყო პრემიერ-მინისტრი და შს მინისტრი, ერთ პატიმარზე 168 აშშ დოლარი იხარჯებოდა. დღეს ერთ პატიმრის ჯანდაცვაზე 680 აშშ დოლარი იხარჯება.
სხვათაშორის, ეს ადამიანები არც ერთხელ არ დაინტერესებულან, თუ რა მოხდა საქართველოში 2006 წლის იანვარში გირგვლიანის მკვლელობასთან დაკავშირებით. რატომ გამოაქვეყნა ადამიანის უფლებათა ევროპულმა სასამართლომ ასეთი მკაცრი განაჩენი საქართველოს ძველი ხელისუფლების წინააღმდეგ, ქართული სახელმწიფოს წინააღმდეგ გირგვლიანის მკვლელობასთან დაკავშირებით. არ დაინტერესებულან იმ ათეულობით მკვლელობით, რომელიც ქუჩაში ხდებოდა.
მათი მმართველობის პერიოდში 800-მდე პატიმარი გარდაიცვალა იმის გამო, რომ მათ ჯანმრთელობას სათანადო ყურადღება არ ექცეოდა. კარგი იქნება იმ ისტორიას გადახედონ, გადახედონ სახალხო დამცველის მოხსენებებს რა ხდებოდა ციხეებში, როგორი წამება იყო და შემდეგ ილაპარაკონ იმ პირობებზე, რომლებშიც იმყოფებიან დღევანდელი პატიმრები.”- განაცხადა სუბარმა.
