როგორც მათ აღნიშნეს, დაკავებულის ჯანმრთელობის მდგომარეობა საკმაოდ დამძიმდა და ამიტომ მოითხოვენ მისი სიცოცხლის ცოტათი მაინც გახანგრძლივებისთვის შეიცვალოს აღმკვეთი ღონისძიებები.
მაია ნიკოლეიშვილი, სამედიცინო ექსპერტი: “კიბოს მკურნალობის სრული კურსის ჩატარება და მისი სრულიად გამოჯანმრთელებაგამორიცხულია. არის კიბოს დიაგნოზით ადამიანების გამოჯანმრთელების შემთხვევები, მაგრამ, სამწუხაროდ, ეს ის შემთხვევა არ არის, ეს არის დაბალდიფერენცირებული ხორხის კიბო, რომელიც ძალიან ცუდი პროგნოზით გამოირჩევა და ჩვენ სახეზე გვაქვს ის მეტასტაზები, რომლებიც ვითარდება და ახლა, ამ ბოლო დაკავებისას, კიდევ იქნა აღნიშნული კომპიუტერულ ტომოგრაფიული კვლევებით. სასჯელაღსრულების სამკურნალო დაწესებულება ყველაფერს აკეთებს, რაც შეუძლია, მაგრამ ამოწურა რესურსი ამ ადამიანის სიცოცხლის შენარჩუნებისა და გახანგრძლივებისთვის. სწორედ ამიტომ ჩვენ უნდა დავაყენოთ საკითხი, რომ მოხდეს მისთვის აღმკვეთი ღონისძიების შეცვლა ან მისჯის შემთხვევაში სასჯელის გადავადება. მე იმედი მაქვს, რომ დღევანდელ პირობებში ადამიანის სიცოცხლე აღარ არის ჩალის ფასი და დღევანდელი ხელისუფლება თავის ჰუმანურ დამოკიდებულებას ადამიანის მიმართ სასამართლოს სახით კიდევ ერთხელ დაამტკიცებს. მე დღეის მდგომარეობით არ მეგულება უფრო მძიმე ავადმყოფი, ვიდრე ტარიელ ფოცხვერიაა. მხოლოდ იმიტომ, რომ ჩვენ ადრე რაღაც “კლიშეებში” ვიყავით ჩასმულები და რახან ის “კანონიერი ქურდია” და მხოლოდ ამიტომ არ უნდა იცოცხლოს, დარწმუნებული ვარ ასეთი მიდგომა აღარ იქნება. მჯერა სასამართლო ამ ყველაფერს გაითვალისწინებს”.
ტარიელ ფოცხვერიას ოჯახის ადვოკატმა, ლედი დუგლაძემ და დაკავებულის ადვოკატმა თინა ნაკაშიძემ აღნიშნეს, რომ ფოცხვერიას ექიმის დანიშნულებით დღეში სამჯერ უკეთდება ძლიერი ნარკოტიკული ტკივილგამაყუჩებელი და მისი დაღუპვა უბრალო გაცივებამაც კი შეიძლება გამოიწვიოს. გარდა ამისა, მას აქვს ღვიძლის ციროზიც.
როგორც გაირკვა, ტარიელ ფოცხვერია ამჟამად იმყოფება მე-18 სამკურნალო დაწესებულებაში.
შეგახსენებთ, რომ ტარიელ ფოცხვერია ამნისტიით გათავისუფლების შემდეგ დაკავებულ იქნა 223-ე პრიმა მუხლით.
