“ჩნდება ეჭვი, რომ კოაბიტაცია გადაიზარდა კორუფციაში”

რათა თბილისსა და სხვა ქალაქებში შეწყდეს გამწვანებული ტერიტორიებისა და ხე-ნარგავების მასობრივი განადგურების პროცესი,” _ სწორედ ამ მიზნით შეიკრიბნენ 7 აგვისტოს მოქალაქეები კანცელარიასთან.

ნინო ტორაძე აქციის მონაწილე: “მოგეხსენებათ, იპოდრომზე რაც ხდება, გზა გაიყვანეს და შენდება კორპუსები. მშენებლობაზე იქაც აბსოლუტურად უკანონოდ გაიცა ნებართვა. ფაქტობრივად, უბანმა დაკარგა ვეებერთელა სარეკრეაციო ზონა. მთელი უბანი ვარჯიშობდა იქ და ახლა გამონაბოლქვის ბუდე გახდა. ამან ასევე დიდი პრობლემა შეუქმნა საბურთალოს ქუჩის მაცხოვრებლებს, მოძრაობა ცალმხრივი გახდა და იქ სადაც ადრე საცობი არ იყო, ახლა არის კატასტროფული მდგომარეობა. ჩვენ ვემხრობით კანონის ცვლილებას, რომელიც არ დაუშვებს სარეკრეაციო ზონების უკანონოდ გასხვისებას და ვითხოვთ, მწვანე ზოლის აღდგენას, იმ წესებით, რაც ადრე იყო. ჭადარი ძალიან დიდ ჰაერის გამწმენდ ფუნქციას ასრულებდა. რაც შეეხება ალერგიას, მხოლოდ ერთი თვე არის პრობლემური ჭადარი, როცა ყვავილობს, დანარჩენ თვეებში ის ასრულებს ჰაერის გამწმენდ ფუნქციას და ასე ხელაღებით მისი გაჩეხვა არ შეიძლება”.

აქციაზე აღმაშენებლის ხეივანი მე-12 კილომეტრის მცხოვრებლებიც იმყოფებოდნენ. მათი თქმით, მერიამ ადრე მიცემული დაპირება გადათქვა და პარკის მაგივრად მათი სახლების ახლოს ქარხნის მშენებლობის ნებართვა გასცა.

75 წლის თამარ თათანაშვილი ამბობს, რომ 25-წლიანი ნარგავები აქვს და მისი გაჩეხვა უნდათ. გარდა ამისა, ის შენობა, სადაც შესახლებულები არიან, მათ არ ეკუთვნით და მუდამ გამოსახლების შიშში არიან: “დიღმის სარემონტო ქარხნის დასახლებაში ვცხოვრობ. ახლა არენდით არის გაცემული ეს ადგილი. მუშტიკრივზე გადადიან. იარაღით გვაშინებენ. ასთმიანი ქალი ვარ, ჰაერი მინდა. ჩემს მეუღლეს ამის გამო შეტევა მოუვიდა”, _ ამბობს ის და თავის დაწვითაც იმუქრება.

გარემოსდამცველი ლაშა ჩხარტიშვილის თქმით, რომელიც ორგანიზებას უწევდა ბაღ-პარკების დაცვის აქციას, გარემოს დაცვისა და ბუნებრივი რესურსების მინისტრისგან ვერ მიიღეს კონკრეტული პასუხი და ახლა უშუალოდ პრემიერ მინისტრისგან ითხოვენ, დაინტერესდეს ქალაქის სარეკრეაციო ზონების გასხვისების პრობლემით: “გარემოს დაცვის მინისტრი, სულ მცირე, გულგრილობას იჩენს ამ საკითხთან მიმართებაში და მისი შეფასებები, თითოეულ ხეს უნდა სდიოს, ან არ უნდა სდიოს ქალაქში არასერიოზულია და არაკომპეტენტური. მე არ ვიცი, არ აძლევენ ამის უფლებას, თუ რაშია საქმე, მაგრამ თბილისი არის უმძიმეს მდგომარეობაში. ყოველდღე იჩეხება ხეები, ამაზე გარემოს დაცვის სამინისტრო ჩუმად არის და არ იზიარებს ჩვენს პოზიციას, რომელიც გულისხმობს იმას, რომ თვითმმართველობის ხელში აღარ იყოს ექსკლუზიურად ბაღ-პარკების მართვა. პრემიერ-მინისტრისგან ვითხოვთ დაავალოს ხათუნა გოგალაძეს, შეასრულოს თავისი ფუნქციები , ხოლო არჩილ კბილაშვილს _ ამ საქმეების პროკურატურაში დროული გამოძიება”.

როგორც ჩხარტიშვილი აცხადებს, პირველი საჩივარი გასული წლის ნოემბერში შეიტანეს პროკურატურაში. რიგ შემთხვევაში ძიება დაწყებულია და არ დამთავრებულა, ზოგზე საერთოდ არ დაუწყიათ მოკვლევა. მისი თქმით, ჩნდება ეჭვი, რომ კოაბიტაცია გადაიზარდა კორუფციაში და სპეციალურად არ ხდება რეკრეაციულ ზონებში უკანონო მშენებლობების საქმეების გამოკვლევა: “თუ არ მოახდენენ რეაგირებას ჩვენს მოთხოვნებზე, უკვე საქმე გვექნება ან სამსახურებრივ გულგრილობასთან, არ კორუფციულ გარიგებასთან,” _ აცხადებს ლაშა ჩხარტიშვილი.