“მე-9 არხის” დახურვასთან დაკავშირებით “გურია ნიუსთან” კომენტარს აკეთებს ტელეკომპანია “მაესტროს” დამფუძნებელი მამუკა ღლონტი.
_ ბატონო მამუკა, რამდენიმე დღის წინ თქვენ გავრცელეთ განცხადება, რომ ხელისუფლების გარკვეულ შტოს სურს ტელეკომპანია “მაესტროს” დასუსტება. დღეს ვრცელდება ინფორმაცია, “მე-9 არხის” დახურვის შესახებ. რა კომენტარს გააკეთებდით ტელევიზიის დახურვაზე?
_ მივესალმები ბიძინა ივანიშვილის იმ ნაბიჯს, რომ მას არ სურს ეჭვის ნატამალიც კი იყოს ამ არჩევნების წინ იმასთან დაკავშირებით, რომ მის მფლობელობაში არის რომელიმე ტელევიზია, თუმცა ძალიან დამწყდება გული, ამ ტელევიზიამ არსებობა რომ შეწყვიტოს. “მე-9 არხმა” რაიმე ფორმით უნდა გააგრძელოს ფუნქციონირება. რაც მეტი ტელევიზია იქნება ამ ქვეყანაში, მით უკეთესი.
_ თქვენ შესთავაზებთ “მაესტროში” მუშაობას მე-9 არხის ჟურნალისტებს?
_ მე ეგ ინფორმაცია ერთი საათის წინ შევიტყე და დეტალურად არაფერი ვიცი. ახლაც, ამ წუთებში თათბირზე ვიმყოფები, ჯერჯერობით ვერაფერს გეტყვით.
_ ბატონო მამუკა, ვრცელდება ვერსია, რომ “მაესტროდან” კადრების გადინებით და “მე-9 არხის” დახურვით ტელეკომპანია “იმედის” გაძლიერებას აპირებენ, ეთანხმებით ამ ვერსის?
_ ამ ვერსიაზე ვერაფერს გეტყვით, მაგრამ გეტყვით იმას, რომ “იმედს” ჰქონდა აგრესიული შეტევა “მაესტროს” ჟურნალისტებზე, მაგრამ მხოლოდ ერთი ჟურნალისტის წაყვანა მოახერხა და თავისი გეგმა ჩაეშალა. “მაესტრომ ” ძალიან ჩააჩოჩა რეიტინგულად “იმედი” და წლის ბოლომდე, ალბათ, “იმედი” გადაინაცვლებს სულ სხვა ადგილას, ვიდრე არის.
_ რას გულისხმობთ, უარეს ადგილას თუ პირიქით?
_ რა თქმა უნდა, უფრო უარეს ადგილას.
