შეხვედრას ესწრებოდნენ ადგილობრივი მედიის წარმომადგენლები, ადვოკატი კახა ჩავლეშვილი, ასევე არასამთავრობო სექტორის წარმომადგენლები, პარტია “დემოკრატიული მოძრაობის” ოზურგეთის შტაბის ხელმძღვანელი თამარ ნადირიძე, პარტია “ნაციონალური მოძრაობის” ოზურგეთის რაიონული ორგანიზაციის თავმჯდომარე მიხეილ გოგოტიშვილი და წევრები, ოზურგეთის მაჟორიტარი დეპუტატის ბიუროს ხელმძღვანელი მურთაზ ფოცხიშვილი, პარტია “ქართული ოცნების” წარმომადგენლები, ასევე ოზურგეთის მუნიციპალიტეტსი საკრებულოს საზოგადოებასთან ურთიერთობის სამსახურის უფროსი ნანა თავდუმაძე.
რედაქტორის თეა იოსელიანის განცხადებით, მიწვეულები იყვნენ მუნიციპალიტეტის გამგეობის წარმომადგენლებიც, თუმცა, ისინი პრესკონფერენციას არ დასწრებიან.
რამდენიმე დღის წინ, “გურიის მოამბეს” ადგილობრივმა ხელისუფლებამ ორთავე ოფისზე სასყიდლიანი უზუფრუქტი გაუუქმა, რის შედეგადაც, როგორც “გურიის მოამბის” წარმომადგენლები აცხადებენ, რედაქცია ოფისის გარეშე რჩება. უზუფრუქტის გაუქმების შესახებ, კი ოფიციალურად ოზურგეთის მუნიციპალიტეტის საკრებულოს თავმჯდომარის, ავთანდილ სურგულაძის მიერ გადაწყვეტილებებშია ნათქვამი.
პირველი გადაწყვეტილება ეხებოდა “გურიის მოამბის” ძველ ოფისს, რომლის გაუქმებასაც თავად რედაქცია ითხოვდა, ხოლო მეორე ოფისის იჯარის გაუქმების საფუძვლად ოზურგეთის საკრებულოს გადაწყვეტილებაში ოზურგეთში სტატისტიკის სამსახურის განთავსების აუცილებლობა სახელდება.
“გურიის მოამბის” უფლებებს კომპანია “შარაშიძე და პარტნიორების” ადვოკატი კახა ჩავლეშვილი დაიცავს.
კახა ჩავლეშვილი: “საკრებულოს თავმჯდომარის გადაწყვეტილება ხელშეკრულების შეწყვეტის შესახებ დაუსაბუთებელია; ამასთან არსებობს მტკიცებულებები, რომლებიც ადასტურებენ, რომ მან ეს გადაწყვეტილება მიიღო არა სახელმლწიფოებრივი ან საზოგადოებრივი საჭიროებების გამო, არამედ სხვა პირის უკანონო მოთხოვნით. ასეთი მოთხოვნა დიდი ხანია რომ იდგა, ადასტურებს საჯარო გამოსვლებში ოზურგეთის მუნიციპალიტეტის საკრებულოს ყოფილი თავმჯდომარე ალეკო მამეშვილი, რომელიც განმარტავს, რომ მან არ შეასრულა უკანონო მოთხოვნა. ამასთანავე, მინისტრი ნარმანია უარყოფს ასეთი მოქმედების აუცილებობას. არსებობს ასევე სხვა მტკიცებულებებიც, რომლებიც ადასტურებენ ზეწოლის ფაქტს.”
ოზურგეთის მუნიციპალიტეტთან გაფორმებული ხელშეკრულების ასლი მოწმობს, რომ ხელშეკრულება უზუფრუქტით ქონების გადაცემის შესახებ დადებულია “უვადოდ, იურიდიული პირის არსებობის ვადით”.
ნანა თავდუმაძემ შეხვედრის მონაწილეებს საკრებულოს თავმჯდომარის მიერ გავრცელებული განცხადება გააცნო, რომელშიც ნათქვამია: “ოზურგეთის მუნიციპალიტეტსა და შპს “გურიის პრესკლუბთან” გაფორმებულია სასყიდლიანი უზურფრუქტი, რომლის მე-7 მუხლის 7.2. პუნქტის “გ” ქვეპუნქტი “მესაკუთრეს”, ანუ მუნიციპალიტეტს უფლებას ანიჭებს, რომ სახელმწიფო ან საზოგადოებრივი საჭიროებისათვის ცალმხრივად შეწყვიტოს ხელშეკრულება.”
რაც შეეხება შ.პ.ს. “გურიის პრესკლუბს”, ვითვალისწინებთ რა, ამ მედიასაშუალების ინტერესს, ოზურგეთის მუნიციპალიტეტი მზად იყო და ახლაც მზად არის შპს “გურიის პრესკლუბს” გადასცეს ის ფართი, რომელზეც ხელშეკრულების გაუქმება მოითხოვა შპს “გურიის მოამბემ” (“გურიის მოამბე” იგივე შენობის პირველ სართულზე სასყიდლიანი უზურფრუქტით ფლობდა სამ ოთახს, ხელშეკრულება შ.პ.ს. “გურიის მოამბის” დირექტორის ვლ. მანაბდის განცხადების საფუძველზე ა.წ. 16.07 გაუქმდა).
ვფიქრობ, წარმოდგენილი დოკუმენტები ამ დროისათვის არსებულ კითხვებს პასუხგაუცემელს არ დატოვებს არც ახლა და არც მომავალში,” _ აცხადებს ავთანდილ სურგულაძე.
