_ ეს პრეზიდენტის მიერ დანაშაულის აღიარებაა, _ მიაჩნია სამართალმცოდნე ლევან ალაფიშვილს _ დიახ, ასეა! პრეზიდენტის ამ განცხადებაში მკაფიოდ წერია, რომ ნასამართლობას მოუხსნის “სასჯელმოხდილ პირებს”. სამი კვირის წინ საჯაროდ ვამბობდი, რომ პრეზიდენტმა თენგიზ გუნავასთვის ნასამართლობის მოხსნით კანონი, სისხლის სამართლის კოდექსის 78-ე მუხლის მე-3 პუნქტი დაარღვია-თქო, რადგან ამ ნორმაში შავით თეთრზე წერია: “სასჯელმოხდილს შეწყალების აქტით შეიძლება მოეხსნას ნასამართლობა.” – თენგიზ გუნავა კი არ გახლდათ და არც დღეს არის სასჯელმოხდილი, _ განმარტავს ალაფიშვილი.
მისივე თქმით, ამ კანონდარღვევისთვის პრობლემას არ წარმოადგენდა და კანონის წინაშე თანასწორობის დამკვიდრებისათვის სავალდებულო იყო პრეზიდენტის იმპიჩმენტის არათუ პროცედურების დაწყება, არამედ უზენაესი სასამართლოს პლენუმის მიერ პრეზიდენტის მხრივ კანონდარღვევის – სამსახურებრივი უფლებამოსილების გადამეტებისა თუ ბოროტად გამოყენების დასჯადი ქმედების ჩადენის დადასტურებაც.
_ სამწუხაროდ, ღრმადპატივცემულმა ხალხის რჩეულებმა ამ ყველაფერს წაუყრუეს, სხვა უფრო მნიშვნელოვანი საქმეებითა და ხალხზე ზრუნვით იყვნენ დაკავებულნი. დღეს კი, კანონდამრღვევმა პრეზიდენტმა ისარგებლა მათი უმოქმედობით საჯაროდ დაადასტურა კიდეც გუნავას შემთხვევაში ჩადენილი კანონდარღვევა და უფრო შორსაც აპირებს წასვლას – პირობით მსჯავრდებულებსაც მოვუხსნი ნასამართლობასო; ანუ გუნავას საქმეზე შექმნილ პრეცედენტს (რომელიც ხახვივით შემრჩაო) მასობრივ ხასიათს მივცემო. კვლავ გავიმეორებ, სისხლის სამართლის კოდექსის 78-ე მუხლის მე-3 პუნქტი ამბობს: “სასჯელმოხდილს შეწყალების აქტით შეიძლება მოეხსნას ნასამართლობა.” – არც თენგიზ გუნავა და არც პირობითი მსჯავრის ქვეშ მყოფნი არ არიან სასჯელმოხდილნი, შესაბამისად მათთვის ნასამართლობის მოხსნა არის კანონდარღვევა, _ ამბობს ალაფიშვილი და დასძენს, რომ ამ ყველაფერს ხელი პარლამენტარებმა შეუწყვეს.
_ ამ ყველაფერს დიდად დაკავებულმა და მჭმუნვარე კანონმდებლებმა შეუწყვეს ხელი. პრეზიდენტი, მე თუ სხვა “რიგითი” მოქალაქე კანონის წინაშე თანასწორნი რომ ვიყოთ ამის სადარაჯოზე სწორედ ისინი უნდა იყვნენ. ამისთვის ავირჩიეთ და ვუხდით ხელფასს. საბანკო ანგარიშის შემოწმებისას იმაზე კი არ იფიქრონ რამდენი დარჩათ დასახარჯი, იმაზე უნდა ფიქრობდნენ იმ ამომრჩევლებმა და გადასახადის გადამხდელებმა რამდენი მოიკლეს რომ მათ ანგარიშზე ბიუჯეტიდან თანხა ჩარიცხულიყო.
თვე სრულდება თენგიზ გუნავასთვის ნასამართლობის მოხსნიდან, როგორ დავიჯერო 50 დეპუტატი ვერ შეგროვდა, რომლებიც პრეზიდენტის იმპიჩმენტის დაწყებას და კანონიერების/კანონის წინაშე თანასწორობის პრინციპის დაცვა-დამკვიდრებას ხელმოწერით დაადასტურებდა. იმასაც ვერ დავიჯერებ, ამ მარტივი კანონდარღვევების დამნახავ-შემფასებელი იურისტი ვერ მოიძებნა ხელისუფლებაში. ძნელი დასაჯერებელია, რომ საჯარო სამსახურში ვერ მოიძებნა ადამიანი, რომელიც თუნდაც გაასაჩივრებდა პრეზიდენტის განკარგულებას, რომლითაც თენგიზ გუნავას მოეხსნა ნასამართლობა.
ეგებ ვცდები და მართლაც აღარ არსებობს პარლამენტში უმრავლესობა, რომელიც კანონის სადარაჯოზე იდგება (და არა საკუთარი სუბიექტურიმ პოლიტიკური, ფინანსური თუ სხვა ინტერესების მსახურების ღვაწლში დაშვრება); ეგებ მართლაც ვცდები და იუსტიციის სამინისტროში, სამართალდამცავ უწყებებში ან პარლამენტში მართლაც არ/ვერ მოიძებნება ორიოდ კვალიფიციური იურისტი. თუ ეს ყველაფერი ასეა, მაშინ წასული ყოფილა ჩვენი საქმე და ეგაა, _ ამბობს ალაფიშვილი, რომელიც პარლამენტარებს მიმართავს და აფრთხილებს, რომ ისინი “ძალიან სახიფათო პრეცედენტების შექმნაში მონაწილეობენ”.
_ ხალხის რჩეულნო, გახსოვდეთ, რომ პრეზიდენტისეული ამ კანონდარღვევების, სასამართლოსა და კანონზე ძალადობის თანამონაწილენი თქვენც ხართ – იქნებ მასზე მეტად პასუხისმგებელნიც კი იყოთ. ხვალ როგორი სინდისით გინდათ ისაუბროთ კანონის დაცვაზე, დემოკრატიასა თუ ადამიანის უფლებებზე, როგორ გინდათ გაამართლოთ ადმინისტრაციული თუ მცირე სისხლის სამართლებრივი გადაცდომისთვის ადამიანის დასჯა, როდესაც პრეზიდენტი თქვენი მეცადინეობით წაახალისეთ (მავანი იტყვის – მხარი დაუჭირეთო) უფრო დიდი და მასობრივი კანონდარღვევების ჩადენაში, _ დასძენს ალაფიშვილი.
