სააკაშვილი დამენიას ოჯახს გმირის თანამებრძოლებთან ერთად ეწვია

მან ეროვნული გმირის, 2004 წელს სამაჩაბლოში დაღუპული ეროვნული გმირის ზაზა დამენიას ოჯახი მოინახულა, ზაზას თანამებრძოლებთან _ ვახტანგ ბწკილიშვილთან და ელგუჯა ხუბაშვილთან ერთად. მოინახულა. ამ ბიჭების სიცოცხლე მან გადაარჩინა.

_ ზაზამ დაამტკიცა, რომ ის ჩვენზე მეტი იყო, _ განაცხადეს მათ.

შეხვედრაზე იმყოფებოდნენ გუბერნატორი ვალერი ჩიტაიშვილი და მისი მოადგილე ლელა თავართქილაძე. პრეზიდენტის სტუმრობას არ დასწრებია მუნიციპალიტეტის საკრებულოს თავმჯდომარე ავთანდილ სურგულაძე და არც გამგებლის მოვალეობის შემსრულებელი კოტე შარაშენიძე.

პრეზიდენტს დამენიას ოჯახში რამდენიმე დღის წინათაც ელოდნენ, თუმცა მაშინ სააკაშვილის ეს ვიზიტი მოულოდნელად გადაიდო და ოჯახს დაპირდნენ, რომ პრეზიდენტი აუცილებლად რამდენიმე დღეში ეწვეოდა.

მიხეილ სააკაშვილი ზაზა დამენიას დედ-მამას, მეუღლესა და შვილს გულთბილად ესაუბრა, მოესიყვარულა მათ და განაცხადა, რომ ზაზა დამენიას სახელი უკვდავი იქნება:

მიხეილ სააკაშვილი: “ჩამოვიყვანეთ ელგუჯა და ვახტანგი, რომელთაც ზაზა გადაეფარა მაშინ საკუთარი სიცოცხლის ფასად. ეს ბიჭები ახლა სახელმწიფო სამსახურში მუშაობენ და თავიანთ სიცოცხლეს ზაზას უნდა უმადლოდნენ. 2004 წელს ჩვენ დავკეტეთ შავი ხვრელი, რომლითაც საქართველოში შემოდიოდა კონტრაბანდა, შემოდიოდნენ კრიმინალები და გაჰქონდათ მოპარული ქონება. ეს იყო სამხედრო პოლიციური ოპერაცია, რომელსაც შეეწირა ზაზა და კიდევ ბევრი ჩვენი მებრძოლი. თუ არა ამათი თავდადება, საქართველოს არ ექნებოდა არც ხელფასების, არც პენსიების, არც გზების დასაგები ფული, არც ენერგეტიკის მოწესრიგების სახსრები და რაც მთავარია, მაშინ ბიჭებმა აგვაცილეს პირველი დიდი შენაერთი, რუსეთის სამხედრო კოლონა, მეორე მხარეს, როკის გვირაბთან მომდგარი. მაშინ რუსეთი ემზადებოდა ფართომასშტაბიანი შემოჭრისთვის და საქართველო არ იყო მზად. ვისაც ჰგონია, რომ 2008 წელს შემთხვევით დაიწყო ომი, იმან კარგად უნდა გაიხსენოს, რა ხდებოდა წინა წლებში. ზაზა დამენია იყო სანგარში თავის თანამებრძოლებთან ერთად. ამ დროს შეუგდო ხელყუმბარა რუსეთიდან შემოსულმა ჯგუფმა და ზაზა გადაეფარა თავისი სხეულით. ზაზა დამენიას ისტორია ზუსტად იმას აჩვენებს, რომ მრავალი წელია, ვიმყოფებით შეტევის ქვეშ. ძალიან ვწუხვარ, რომ ბევრი რამ ისევ უკუღმა დადგა, იმიტომ, რომ ციხიდან გაუშვეს რუსეთის ჯაშუშები. ერთ-ერთი ისეთი, რომელიც 2004 წელშიც აძლევდა ინფორმაციას მტერს ჩვენი ჯარების განლაგების შესახებ, ცხინვალის გარშემო. ეს არის დადასტურებული ერთმნიშვნელოვნად. ზუსტად ჰქონდათ კოორდინატები, სად უნდათ დაერტყათ, სად უნდა შემოეგდოთ ყუმბარები. ხალხი ციხეებიდან გაუშვეს, ლამის, გმირებად. ძალიან ვწუხვარ, რომ ბოლო დღეებში რუსეთის ელჩებმა მიიღეს ინსტრუქცია და რამდენიმე ქვეყანაში გამოაქვეყნეს სტატია, სადაც ციტირებენ საქართველოს პრემიერ-მინისტრის აზრს, რომ ომში არის დამნაშავე საქართველო. ეს არის ძალიან საშიში რაღაცა და ამიტომ ჩვენ უნდა ფრთხილად მოვეპყროთ ჩვენს გამონათქვამებს, რადგან ეს პირდაპირ აზარალებს საქართველოს საქმეს. აი, კორეაში გახმოვანდა, ორი დღის წინ, რუსეთის ელჩის წერილი, სადაც პირდაპირ ციტირებენ, ბიძინა ივანიშვილი ამბობსო და თქვენ არ გინდათო? კორეელები ამბობენ, თქვენ რაღაზედ გვეჩხუბებითო… იგივე ინსტრუქციები მიიღეს საქართველოშიც და ერთი სიტყვით იმ ქვეყნებში, რომლებიც მხარს გვიჭერენ. რუსეთი აქედან უნდა წავიდეს და მთელი საქართველოს დეოკუპაცია მოხდეს. ასე რომ, გმირს უნდა ერქვას გმირი, ჯაშუშს ჯაშუში, ღალატი არის ღალატი. თუ ასე არ ვიფიქრეთ, ახალი ზაზა დამენიები აღარ გაიზრდებიან!”