ზვიად კვაჭანტირაძე: “თხილის ფასის შესახებ ასეთი სისულელის თქმა როგორ შემეძლო?”

_ დეპუტატი შეგვპირდა, რომ მისი არჩევის შემთხვევაში თხილის ფასი გაიზრდებოდა, _ ითქვა წინასაარჩევნო შეხვედრაზე.

საპასუხოდ დავით ბაქრაძემ მოსახლეობასთან ასეთი მოსაზრება გამოთქვა _ თუ დეპუტატი დაგპირდათ, რომ ხუთი ლარი იქნება თხილის ფასი, მაშინ მას პასუხი აუცილებლად უნდა მოსთხოვოთ. რომ გეტყვის, თხილის ფასი იქნება ხუთი ლარი და ხმა მომეციო, დანაპირებს კი არ შეასრულებს, ამით საქმეს გიფუჭებს, რადგან იმ დანაპირებზე აწყობ მომავალს და შემოსავალს ელოდები.

მოსახლეობამ დავით ბაქრაძეს ოზურგეთის დეპუტატთან ზვიად კვაჭანტირაძესთან დააბარა, რომ ის ხალხს ხშირად შეხვდეს.

ირინე სალუქვაძე, დავით ბაქრაძის მხარდამჭერი: _ ბატონი ზვიად კვაჭანტირაძე 2012 წლის არჩევნების პერიოდში ოზურგეთში დადიოდა ყველა სოფელში და ხალხს პირდებოდა, ოღონდ ხმა ჩვენ მოგვეცი და თხილის ფასი აიწევა, ყველაფერი უკეთესობისკენ შეიცვლებაო. კაცი პარლამენტში შევიდა და მხოლოდ ტელევიზორში ვხედავთ. დეპუტატი კვირაში ერთხელ მაინც უნდა ჰქონდეს ამომრჩეველთან შეხვედრა, რომ გაჭირვებულმა ადამიანმა მისი პრობლემის შესახებ უამბოს, მან კი პარლამენტში დააყენოს საკითხი. არ გვჭირდება ისეთი დეპუტატები, რომლებიც ხალხისთვის არ არიან. ცხრა თვეა შევყურებ ახალ ხელისუფლებას და დაპირების გარდა არაფერი არ გაუკეთებიათ.

_ ქალბატონო ირინე, თქვენ იმყოფებოდით დეპუტატის ბიუროში და განაცხადეთ თქვენი პრობლემის შესახებ?

_ ძალიან ხშირად მომიკითხავს ბატონი ზვიადი და არ არის ოზურგეთში. დეპუტატის ყველა დაპირება აუცილებლად უნდა შესრულდეს. სოფელს მიხედვა უნდა _ სოფლიდან იწყება მთელი საქართველო. თუ სოფელი არ იქნება, რა უნდა ვქნათ? თუ გლეხის შრომას არ დააფასებ, სოციალურ პრობლემებს არ გადაჭრი, ასეთი არც დეპუტატი გვინდა და არც პრეზიდენტი. დეპუტატი არის მუნიციპალიტეტის სახე, რომელმაც უნდა მოუსმინოს ხალხს.

“გურია ნიუსი” პარლამენტარ ზვიად კვაჭანტირაძეს დაუკავშირდა.

_ ბატონო ზვიად, დავით ბაქრაძის შეხვედრის დროს მისმა მხარდამჭერებმა განაცხადეს, რომ 2012 წელს წინასაარჩევნოდ მათ თხილის ფასის გაზრდას დაპირდით და წელს ერთი კილოგრამი თხილის ფასი 5 ლარი უნდა ყოფილიყო.

_ თხილის ფასის შესახებ ასეთი სისულელის თქმა როგორ შემეძლო? განა არსებობს ქვეყნად მაჟორიტარი, ან თუნდაც მთავრობა, რომელსაც შეუძლია საბაზრო ეკონომიკის პირობებში თხილის მყარი ფასი დააწესოს? დავით ბაქრაძის ელექტორატმა რომ უფრო უარესი შეკითხვები და პრეტენზიები არ გამოთქვა, ის მიკვირს. ეჭვი არავის ეპარება, რომ ნაციონალების ყველა შეხვედრა, ტრადიციულად, სპექტაკლია. ყველას აქვს საკუთარი როლი ამ სპექტაკლში.

_ მოსახლეობის თქმით, თქვენ ხალხს იშვიათად ხვდებით.

_ რაც შეეხება მოსახლეობასთან შეხვედრის სიხშირეს, ამ თემასაც მუდმივად ატრიალებენ. ჩემთან, და მით უმეტეს, ჩემს ბიუროსთან ურთიერთობის პრობლემა მოსახლეობას არ აქვს. ძალიან ბევრს ჩემთან პირადი შეხვედრა იმიტომ აინტერესებს, რომ მატერიალური დახმარება, სწავლების თანხის გადახდა, სამსახურში მოწყობა მთხოვოს. დეპუტატს თავისი უფლებამოსილებები გააჩნია _ არც ერთი განცხადება არ დამიტოვებია რეაგირების გარეშე. როგორც შეგვიძლია, ვეხმარებით ხალხს. ჩემი ბიურო ძალიან გამართულად მუშაობს. უკვე საქმე ისე გვაქვს აწყობილი, რომ ოზურგეთში შემოსულ განცხადებაზე რეაგირების წერილს იმავე დღეს ვამზადებთ, ხელს ვაწერ ქუთაისში ან თბილისში და იმავე დღეს ვაგზავნით დანიშნულების ადგილზე. ახლა არც ტექნიკური პრობლემები გვაქვს _ ბიურო უკვე სრულადაა აღჭურვილი სათანადო ტექნიკური საშუალებებითაც და ეს ძალიან აჩქარებს წერილებზე და მომართვებზე რეაგირებას. ვერავინ იტყვის, რომ ჩემთან შემოსული თუნდაც ერთი განცხადება ან თხოვნა დავტოვე უყურადღებოდ. ახლა საარჩევნო კამპანია უფრო აქტიურ ფაზაში შევა და როგორც ადრე ვწერდი, აუცილებლად გაძლიერდება შემოტევები ყველა მხრიდან, როგორც ოპონენტების მხრიდან, ისევე მათ მიერ დაქირავებული ადამიანების მხრიდან. ეს შემოტევები იქნება უფრო და უფრო აქტიური, მაგრამ დარწმუნებული ვარ, რომ კამპანიას ღირსეულად ჩავატარებთ და “ქართული ოცნების” კანდიდატი გიორგი მარგველაშვილი გაიმარჯვებს დამაჯერებლად, რადგანაც ქართველი ხალხი ნამდვილად ვეღარ აიტანს სხვა პოლიტიკური პლატფორმის და ორიენტაციის მქონე პრეზიდენტთან კოჰაბიტაციას. კოჰაბიტაციამ ძალიან ბევრი ზიანი მოგვიტანა და ეს უნდა დასრულდეს 27 ოქტომბერს, _ გვითხრა ზვიად კვაჭანტირაძემ.