მერაბიშვილის და ჭიაბერაშვილის პროცესზე ვიდეო და ფოტო გადაღება აკრძალეს

მისი განცხადებით, კანონმდებლობის მიხედვით, “საზოგადოებრივი არხის” გარდა, არც ერთ მედია საშუალებას პროცესზე არ ჰქონდა ვიდეო და ფოტო გადაღების უფლება.

ვანო მერაბიშვილი დაეთანხმა ადვოკატს _ მან სასამართლო პროცესზე მთავარი პროკურატურა გააკრიტიკა. მისი განცხადებით, პროკურატურას არ სურს, ეს პროცესი საზოგადოებრივი არხის გარდა სხვა მედია საშუალებებმა გააშუქონ. მერაბიშვილმა პროკურატურას მოუწოდა, 4 500-კაციანი მოწმეთა სია გონივრულ რიცხვზე დაიყვანონ და ისე მოხდეს მოწმეების დაკითხვა. მისი თქმით, 4 500 მოწმე არის უპრეცედენტო შემთხვევა სისხლის სამართლის საქმეში. მათ დაკითხვას დაახლოებით 7-8 წელი სჭირდება. მისი განცხადებით, არც ერთ სხვა სასამართლო პროცესზე 200 მოწმეზე მეტი არ ჰყოლიათ და არც დაუკითხავთ.

მერაბიშვილმა მოწმეთა მასიური დაკითხვა წინასაარჩევნო ფაქტად შეაფასა და აღნიშნა, რომ ხელისუფლება ამით ყველას მიანიშნებს, რომ ვინც “ნაციონალურ მოძრაობას” გაეკარება, იგივე დაემართება რაც მას: _ ეს არის სამარცხვინო პროცესი, პროკურატურას საზოგადოების რცხვენია. ამიტომ ცდილობს, პროცესზე გადაღების შეზღუდვას. პირველ არხზე მასობრივი შეტევა მიმდინარეობს. მათ უარი უთხრეს “ნაციონალურ მოძრაობას” წინასაარჩევნო პოლიტიკურ რეკლამაზე.

ვანო მერაბიშვილმა მოსამართლეს მიმართა, პროცესის გადაღების ნება ყველასთვის მისცენ და საზოგადოებას აჩვენონ, როგორი სამარცხვინო პროცესი მიმდინარეობს: _ პროკურატურას არ მიეცეს უფლება მხოლოდ პირველი არხის მეშვეობით მოახდინოს ამ სამარცხვინო სასამართლო პროცესის გაშუქება.

ზურაბ ჭიაბერაშვილი დაეთანხმა მერაბიშვილის მოთხოვნას ვიდეო და ფოტო გადაღებასთან დაკავშირებით და მოსამართლეს თხოვა, ნება დაერთო ყველა მედია საშუალებისთვის ფოტო და ვიდეო გადაღებაზე _ იგი საქმის გასაჩივრებას აპირებს ევროპის სასამართლოში და სჭირდება მტკიცებულებები, ფოტო და ვიდეო ჩანაწერის სახით, თუ რა ხდება პროცესზე.

მოსამართლე თეიმურაზ დგვარელმა პროკურატურის შუამდგომლობა დააკმაყოფილა და განაცხადა: “ იმ მედია საშუალებებს, რომლებსაც ოფიციალური განცხადებით არ მოუმართავთ ფოტო და ვიდეო გადაღების შესახებ, დაიტოვონ ის მასალა, რაც გადაღებული აქვთ და შეწყვიტონ გადაღება.”